Read Southern Dagaare Gyn 9 Bible Online

Gyn 9 - Southern Dagaare bible

Gyn 9

¹A Yeezu naŋ da wa tɔlɔ gɛrɛ, O da nyɛ la dɔɔ kaŋ ba naŋ da dɔge ka o zɔŋ.

²A Yeezu potuuribo da soore O la, “Wulwullo, a dɔɔ ŋa yelbieri la so ka ba dɔge o ka o zɔŋ bee a o dɔgrebɔ yelbieri la so?”

³Ka a Yeezu da yeli sɔge, “A o meŋɛ bee o dɔgrebɔ ba e yelbieri. Ba da dɔge o la ka o zɔŋ ka ka Naaŋmen toma na tu o zie sãã.

⁴Zie naŋ naŋ waa veɛloŋ a ferɛɛ la ka te toŋ a soba na naŋ toŋ te toma. Zie sɔɔrɔ la ka neɛzaa koŋ la toɔ̃ toŋ toma.

⁵N naŋ naŋ be a teŋɛzu, maa la a teŋɛzu kyaane”

⁶A Yeezu naŋ da wa yeli a ŋaa baare, O da toore la nentaare lɔɔ teŋɛ, a bu tɛne ne a nentaare, a de sɔ ne a zɔŋ nimie,

⁷kyɛ da yeli ko o, “Gaa te pɛge a Silom koɔ̃-puu zie koɔ̃ poɔ” (a Silom tɛgɛ la: Ba Naŋ Toŋ Neɛ). Lɛ la ka a dɔɔ-zɔŋ da gaa te pɛge o niŋe a da leɛ wa a Yeezu zie, a nyɛrɛ.

⁸A dɔɔ ŋa laŋkpɛtaaba ane banaŋ naŋ da maŋ nyɛ o ka o sɔrɔ boma da piili soorɔ la taa, “A dɔɔ ŋa naane da maŋ zeŋ sɔrɔ na be?”

⁹Ka ba mine da yele, “Ona la.” Ka ba mine meŋ da yele, “Ai, ona naane, yitaa la.” Ka a dɔɔ meŋɛ da yele, “Maa la.”

¹⁰Kyɛ ka ba da naŋ soorɔ O, “Wola ka a fo nimie pãã e yuori?”

¹¹Ka a dɔɔ da yeli sɔge, “A dɔɔ na ba naŋ boɔlɔ Yeezu la da bu tɛne a de sɔ n nimie, kyɛ da yeli ko ma, ‘Gaa te pɛge a Silom gbɛtɛre koɔ̃ poɔ.’ Lɛ la ka N da gaa te pɛge a deɛ nyɛrɛ.”

¹²Ka ba da soore a dɔɔ, “Yeŋ ka O be?” Ka a dɔɔ da yeli, “N ba baŋ.”

¹³Ba da taa la a dɔɔ na naŋ da waa zɔŋ wa ne a Faraziimine zie.

¹⁴A pɛnnoo bebiri kaŋ daare la ka a Yeezu da bu a tɛne sɔ ne a dɔɔ-zɔŋ nimie ka a yuori.

¹⁵Lɛ la ka a Faraziimine meŋ da piili soorɔ a dɔɔ lɛ o naŋ da e nyɛrɛ. Ka a dɔɔ da yeli ko ba, “A Yeezu la da bu tɛne sɔ a n nimie, ka n da te pɛge ne koɔ̃ a nyɛrɛ.”

¹⁶Ka a Farazii noba mine da yeli, “A dɔɔ ŋa ba yi Naaŋmen zie, bonso, O ba tuuro a pɛnnoo bebiri daare tuulo.” Kyɛ ka ba mine meŋ da yeli, “Wola ka neɛ naŋ e yelbe-erɛ na toɔ̃ e a yelwulii ama?” Wɛltaa da kpɛ la a noba poɔ.

¹⁷Lɛ la ka a Faraziimine da laboreŋ soore a dɔɔ, “Boŋ ka fo na yeli kyaare ne a dɔɔ ŋa naŋ yuo a fo nimie?” Ka a dɔɔ da yeli, “O waa la Ŋmen-yelmanna.”

¹⁸A Gyuumine da ba sage de ka a dɔɔ da e la zɔŋ kyɛ leɛ nyɛrɛ, ka a lɛ vɛŋ ka ba da boɔle o dɔgrebɔ

¹⁹a da soore ba, “A yɛ bidɔɔ la a ŋa yɛ naŋ yeli ka yɛ dɔge ne o la zɔnnoŋ be? Wola ka a ta ka o nyɛrɛ pampana ŋa?”

²⁰Ka a o dɔgrebɔ da yeli sɔge, “Te baŋ ka te bie la, ka te laŋ dɔge o ne zɔnnoŋ;

²¹kyɛ te ba baŋ lɛ a naŋ ta ka o nyɛrɛ pampana ŋa, bee a baŋ neɛ na naŋ yuo a o nimie. Yɛ soore o, o waa la nyembulo. Yɛ vɛŋ ka o yeli o meŋɛ yɛlɛ.”

²²A dɔɔ dɔgrebɔ da yeli la a ŋaa ba naŋ da zoro a Gyuumine dabeɛ̃ zuiŋ. Bonso, a Gyuumine da laŋ la noɔre ka ka neɛzaa wa yeli ka Yeezu la a Mɛzaaya,[12] ba na digi la o soba bare a ba puoruu die poɔ.

²³Lɛnso ka a o dɔgrebɔ da yeli, “O waa la nyembulo, yɛ soore o.”

²⁴Azuiŋ ba da leɛ boɔle la a dɔɔ ŋa naŋ da zɔŋ a boyi soba a yeli ko o, “Yeli a yelmeŋɛ Naaŋmen niŋesogɔ! Te baŋ ka a dɔɔ ŋa waa la yelbe-erɛ.”

²⁵Ka a dɔɔ da yeli sɔge, “Maa eŋ ba baŋ ka O waa la yelbe-erɛ bee ka O ba waa. Yelyenaa yoŋ la ka N baŋ. N da zɔŋɛɛ la, kyɛ pampana, N nyɛrɛ la.”

²⁶Ka ba da soore o, “Wola ka O da e fo. Wola ka O da e yuo a fo nimie?”

²⁷Ka o da yeli sɔge ba, “N daŋ yeli ko yɛ la kyɛ ka yɛ koŋ kyɛlle woŋ. Boŋ la so ka yɛ la boɔrɔ ka N la maaleŋ manne ko yɛ? Yɛ meŋ boɔrɔ la ka yɛ leɛ O potuuribo be?”

²⁸Lɛ la ka ba da to o, a yele, “Fõõ la waa O potuuro kyɛ tenee eŋ waa la Moozul potuuribo.

²⁹Te baŋ ka Naaŋmen da yeli la yɛlɛ ko Moozul kyɛ a dɔɔ ŋa eŋ, te ba baŋ zie na O naŋ yi wa.”

³⁰Ka a dɔɔ da yeli, “Nɔmaa yeli pãã la ŋa! Yɛ ba baŋ zie na O naŋ yi wa kyɛ Ona la yuo n nimie.

³¹Te baŋ ka Naaŋmen ba kyɛllɛ yelbe-erebɛ yɛlɛ, kyɛ O maŋ kyɛlle woŋ la neɛ naŋ puoro O kyɛ erɛ O poboɔbo yɛlɛ.

³²A yi a teŋɛ piiluu saŋ a wa te ta zenɛ, te daŋ ba woŋ ka neɛzaa yuo la neɛ ba naŋ dɔge ne zɔnnoŋ nimie ka o nyɛrɛ.

³³Ka a dɔɔ ŋa da ba yi Naaŋmen zie wa, O da kontoɔ̃ e yelzaa”

³⁴Ka ba da yeli sɔge o, “A fõõ ba naŋ dɔge fo zaa gbuli yelbieri poɔ, fõõ la boɔrɔ ka fo wuli te be?” Ba da digi o la bare a puoruu die poɔ.

³⁵A Yeezu da woŋ ka ba da digi la a dɔɔ bare a puoruu die poɔ, kyɛ O naŋ da wa nyɛ a dɔɔ, O da soore o la, “Fo sage de la a Nensaala Bie yɛlɛ be?”

³⁶Ka a dɔɔ da yeli sɔge, “Neŋkpoŋ, aŋ la O? Yeli ko ma, lɛ ka N na sage de O yɛlɛ.”

³⁷Ka Yeezu da yeli ko o, “Fo nyɛ O la. Ona la a soba na naŋ yele a yɛlɛ korɔ fo.”

³⁸Ka a dɔɔ da yeli, “Daana, N sage deɛ la.” O pãã da gbi la dumo a puori a Yeezu ne emmo.

³⁹Ka a Yeezu da yeli, “N wa la a teŋɛ ŋa zu sɛrɛɛdiibu zuiŋ, ka ka banaŋ naŋ ba nyɛrɛ na nyɛrɛ, kyɛ ka banaŋ naŋ nyɛrɛ leɛ zɔnne.”

⁴⁰A Farazii noba mine naŋ da peɛle a Yeezu a da woŋ a ŋaa O naŋ yeli, da yeli ko O la, “Fo sereŋ boɔrɔ ka fo yeli ka te zɔŋɛɛ la wɛ?”

⁴¹Ka a Yeezu da yeli ko ba, “Ka yɛnee da zɔŋ, yɛ da koŋ taa yelbieri. Kyɛ yɛ naŋ yeli, ‘Te nyɛrɛ la,’ a yɛ yelbebe na kyɛnɛ bebe la.”