Read Southern Dagaare Tom 13 Bible Online

Tom 13 - Southern Dagaare bible

Tom 13

¹A Antoɔki puoruu laŋne deme poɔ, Ŋmen-yelmanneba ane wulwulibo da be la a be: Banabase ane Simeon ba naŋ boɔlɔ Nega[23], Lusiyo naŋ yi Saarin ane Manayɛn naŋ da waa a naa Hɛrɔde[24] sɛrɛɛdiibu zie neɛ kaŋ ane Sɔɔl.

²Ba naŋ da leŋ noɔre kyɛ da puoro a Daana, a Vooroŋ Soŋ da yeli ko ba la, “Yɛ iri Banabase ane Sɔɔl ko ma, N boɔle ba la tonnoɔre kaŋ eŋɛ.”

³Ba naŋ da wa leŋ a noɔre a puori baare, ba da pare la ba nuuri ba zu kyɛ toŋ ba ka ba gɛrɛ.

⁴A Vooroŋ Soŋ naŋ da toŋ ba ka ba yi a lɛ, ba da sigi la Selusiya, a da yi be a kpɛ gbori gaa Saapuru.

⁵Ba naŋ da wa te ta Salame, ba da moɔle la a Naaŋmen yelbiri a Gyuumine puoruu deri poore. Gyɔɔn da be la ba zie a soŋnɔ ba.

⁶Ba naŋ da yoɔrɔ a Salame teŋɛ a te ta Pafo, ba da nyɛ la yelbeere erɛ kaŋ naŋ da waa a Gyuumine kaŋwaa Ŋmen-yelmanna ka o yuori di Baa-yeezu.

⁷O da be la a gɔbena Sɛregyiyo Pɔɔlo naŋ da e neɛ naŋ taa yɛŋ zie. A gɔbena da boɔle la a Banabase ane Sɔɔl a boɔrɔ ka o kyɛlle woŋ a Naaŋmen yelbiri.

⁸Kyɛ a yelbeere erɛ Elima (a yuori tɛge la a lɛ a Giriki kɔkɔre poɔ) da pigi la ba sori, a da erɛ aneɛ ka a gɔbena ta sage de a Naaŋmen yelbiri.

⁹Kyɛ a Sɔɔl na yuori kaŋ naŋ da di Pɔɔl, da paale ne la a Vooroŋ Soŋ. A Pɔɔl da kaa o la tĩĩ

¹⁰kyɛ yeli, “Fõõ sebɛlbɛllɛ bie, mennoŋ zaa dɔndɔmɔ, fo paale ne la bɛllɛ kyɛ e golgole soba. Fo koŋ bare a Daana sobie naŋ tori gɔŋbaroo be?

¹¹Pampana ŋa, kyɛlle woŋ, a Daana zɛge la O nu a na zɔɔ ne fo. Fo na zɔŋ la te ta saŋ kaŋ, a koŋ la nyɛ a ŋmenaa.” A tɔntɔbaalɛ lɛ, ka o deɛ zɔŋ a yɔ gbaala boɔrɔ neɛ naŋ na tagra o.

¹²A gɔbena naŋ da nyɛ a yɛlɛ naŋ e, o da sage deɛ la, bonso, o noɔre da maaɛ la ne a yelbie ba naŋ da kanne kyaare ne a Daana.

¹³Lɛ la ka Pɔɔl ane o taaba da yi a Pafo a kpɛ gbori gaa Pɛɛga naŋ be Pamfiliya paaloŋ poɔ. Gyɔɔn eŋ da bare ba la kyɛ leɛ gaa Gyɛruzɛlɛm;

¹⁴kyɛ ba da yi la a Pɛɛga a gaa Antoɔki naŋ be Pisidiya paaloŋ poɔ. A pɛnnoo bebiri daare, ba da gaa kpɛ la a puoruudie poɔ a te zeŋ.

¹⁵Ba naŋ da wa kanne a Naaŋmen nɔɛ ane a Ŋmen-yelmanneba gama baare, a puoruudie nembɛrɛ da toŋɛɛ la ka ba wa yeli ko ba, “N yɔɔmine, ka yɛnee wa taa yelbiri zaa ka yɛ yeli teɛ a noba, yɛ wa yeli.”

¹⁶Lɛ la ka Pɔɔl da iri are kyɛ lɔɔ o nu a piili yele, “Yɛnee Izerayɛl biiri ane banaŋ naŋ zoro Naaŋmen, yɛ kyɛlle woŋ.

¹⁷A Izerayɛl noba ŋa poɔ la ka Naaŋmen da kaa-iri a te sããkommine, a e ka ba waa gandaare a saŋ na ba naŋ da be a Igyipiti teŋɛ poɔ. O da taa ba la yi ne a be ane O ganda-nu.

¹⁸O da laŋ kpɛ ne ba la aŋa yuomo lezaayi a wɛgyɛŋ poɔ.

¹⁹O naŋ da wa te ŋma tenne ayopoĩ a Kena teŋɛ poɔ, O da ko ba la a ba teŋɛ ka o e ba gbandi-bon

²⁰ka a te e ŋa yuomo kɔɔraanaare ane lezaayi ne pie. A lɛ puoriŋ, O da ko ba la sɛrediribe a te ta a Ŋmen-yelmanna Saamuwɛl saŋ.

²¹Lɛ la ka ba da sɔre Naaŋmen ka O ko ba naa, ka Naaŋmen da ko ba Sɔɔl, a Kisi bidɔɔ naŋ da e a Bɛŋgyamen bale neɛ ka o di naaloŋ yuomo lezaayi.

²²A Naaŋmen naŋ da wa yage a Sɔɔl a naaloŋ zu, O da eɛɛ la ka Davil di a naaloŋ. A Naaŋmen da di la a Davil danseɛ a yeli, ‘N nyɛ la Davil, a Gyɛse bidɔɔ, ka o waa N yɛŋ neɛ. Ona la na toŋ a N poboɔre yɛlɛ zaa.’

²³A dɔɔ ŋa biiri poɔ la ka Naaŋmen da ko a Izerayɛl biiri a Yeezu ka O e a ba Faara, a seŋ O naŋ da eŋ noɔre lɛ;

²⁴O naŋ da naŋ ba wa sɛre, Gyɔɔn da daŋ moɔle la meŋɛ-leɛbo suobu yɛlɛ ko a Izerayɛl noba zaa.

²⁵A Gyɔɔn naŋ da wa te baara a o toma, o da soore ba la, ‘Yɛ teɛre ka N waa la nembuo? Maa naane o. Ai, kyɛ neɛ kaŋ na tu la n puori wa; N ba seŋ ne O nɔɔteɛ mie loruu.’ ”

²⁶“N yɔɔmine, yɛnee a Aboraham boorɔ ane yɛ banaŋ naŋ zoro Naaŋmen, tenee la ka ba tere a faabo yelbiri ŋa.

²⁷Kyɛ a banaŋ naŋ kpeɛrɛ a Gyɛruzɛlɛm ane ba wederebɛ da ba baŋ O bee a baŋ a Ŋmen-yelmanneba yelyelii ba naŋ da maŋ kanne a pɛnnoo bebiri daare tɛgɛ. Ba da di la O kũũ sɛrɛɛ a ko O ka ka a yelbie ama na tu a tuubu.

²⁸Aneazaa ka ba da ba nyɛ yelzaa ka O e a seŋ ne koobo, kyɛ ba da yeli ko la Pilato ka o ko O.

²⁹Ba naŋ da wa e ka a yɛlɛ zaa ba naŋ da sɛge kyaare ne O nyɛ eebo, ba pãã da yage O la a daa zu a te ũũ.

³⁰Kyɛ Naaŋmen da eɛɛ la ka O leɛ-iri a kuuni poɔ;

³¹a da de O meŋɛ wuli a banaŋ naŋ da tu O yi a Galili a do a Gyɛruzɛlɛm beri yaga. Pampana, ba na la e O dansediribe a ko a noba.

³²Kyɛ te taa la a yelnoore na Naaŋmen naŋ da eŋ noɔre ka O na ko la te sããkommine a wa na ko yɛ.

³³O da eɛɛ la ka a tu a tuubu, tenee a ba biiri zie, a e ka Yeezu leɛ-iri a kuuni poɔ a seŋ ba naŋ sɛge a yieluŋ gane ayi soba poɔ lɛ, ‘Fõõ la N Bidɔɔ; zenɛ ka N dɔge fo.’

³⁴A Naaŋmen naŋ da e ka a Yeezu leɛ-iri a kuuni poɔ a koŋ la kpi zaa, O da yeli la ŋaa: ‘N na ko yɛ la a nɔsonne na N naŋ da eŋ ko Davil.’

³⁵A lɛ zuiŋ, O da la yeli la a yieluŋ gane zie kaŋ, ‘Fo koŋ sage ka a fo Nensoŋ wɛ.’

³⁶A Davil naŋ da wa te toŋ a Naaŋmen poboɔbo baare, o da kpie la ka ba ũũ o a o sããkommine zie ka o poɔ̃;

³⁷kyɛ a Onaŋ Naaŋmen naŋ e ka O leɛ-iri a kuuni poɔ ba nyɛ poɔ̃mo.

³⁸N yɔɔmine, yɛ baŋ a yeli ŋa velaa, ka a neɛ ŋa zie la ka ba tu a moɔle a yelbebe sudi yɛlɛ ko yɛ;

³⁹Neɛ na zaa naŋ sage de a Yeezu ŋa yɛlɛ, na nyɛ la faabo a yi a yelbebe na zaa poɔ a Moozul nɔɛ naŋ da kontoɔ̃ faa.

⁴⁰Yɛ gu yɛmenne velaa ka a yɛlɛ na a Ŋmen-yelmanneba naŋ da yeli ta pɔge yɛ:

⁴¹‘Nyɛ, yɛnee nen-elaareba ŋa! Ka nɔmaa kpɛ yɛ kyɛ ka yɛ wɛ, bonso, N tonɔ la toma a yɛ bebie ama poɔ, toma na yɛ naŋ daŋ koŋ sage de, haali gba ka neɛ kaŋ wa yeli ko yɛ.’ ”

⁴²A Pɔɔl ane Banabase naŋ da wa yire, a noba da sɔre ba la ka ba leɛ wa a pɛnnoo bebiri naŋ waana a wa manne a yɛlɛ na zaa ba naŋ da manne ko ba.

⁴³A lammo yɛlɛ naŋ da wa baare ka a noba yaare, a Gyuumine ane a puoruu nimizeɛ deme naŋ da kpɛ a Gyuumine puoruu da tu la a Pɔɔl ane Banabase puori ka ba yeli ko ba ka ba eŋ faŋ a taa a Naaŋmen garaaseɛ velaa.

⁴⁴A pɛnnoo bebiri naŋ da la wa ta, a teŋɛ noba yaga zaa zie da laŋ la taa a na kyɛlle a Daana yelbiri.

⁴⁵Kyɛ a Gyuumine naŋ da wa nyɛ a noba ka ba waa yaga lɛ, ba da erɛ la nyuuri; a toorɔ Naaŋmen zoma, a kyɛ da ŋmeɛrɛ nɔkpeɛne ne a Pɔɔl.

⁴⁶Lɛ la ka Pɔɔl ane Banabase da ba zo dabeɛ̃, a kyɛ yele, “Yɛnee la seŋ ne ka ba daŋ moɔle a Naaŋmen yelbiri ko, kyɛ yɛ naŋ zagre ka yɛ de zuiŋ, a kyɛ nyɛ ka yɛ ba seŋ ne a nyɔvore naŋ ba taa baaroo taabo, te gɛrɛ la a Nemboore-yobo[25] zie.

⁴⁷A lɛ zuiŋ la ka a Daana da ko te noɔre a yele, ‘N eɛɛ la ka fo waa veɛloŋ ko a Nemboore-yobo ka ka fo na e ka faabo ta a tendaa ziiri zaa.’ ”

⁴⁸A Nemboore-yobo naŋ da wa woŋ a yelbie ama, ba poore da pɛle la yaga zaa, ka ba puuro a Daana ane O yelbiri, kyɛ a banaŋ zaa Naaŋmen naŋ da kaa-iri ka ba nyɛ nyɔvo-babaaraa da sage de la a yɛlɛ.

⁴⁹Lɛ la ka a Daana yelbiri da yaare a paaloŋ na zaa poɔ.

⁵⁰Kyɛ a Gyuumine da tɔ la a teŋɛ pɔgeyoe naŋ da puoro Naaŋmen ne nimizeɛ ane a teŋɛ nenzuri eŋ ka ba dɔgre a Pɔɔl ane Banabase, kyɛ da digi ba ka ba yi a ba paaloŋ poɔ.

⁵¹Lɛ la ka ba da piŋ ba gbɛɛ uuruŋ ane posaanaa eŋ ba kyɛ gaa Ikoniyo.

⁵²A potuuribo da paale ne la popeɛloŋ ane a Vooroŋ Soŋ.