Read Southern Dagaare Tom 14 Bible Online

Tom 14 - Southern Dagaare bible

Tom 14

¹A lɛ ne o zu la da e a Ikoniyo teŋɛ poɔ, a saŋ Pɔɔl ane Banabase naŋ da kpɛ a Gyuumine puoruudie poɔ. Ba da yeli la yɛlɛ velaa ka a Gyuumine ane Giriki noba yaga da sage de a Yeezu yɛlɛ.

²Kyɛ a Gyuumine banaŋ naŋ da ba sage de a Yeezu yɛlɛ da tɔ la a Nemboore-yobo[26] eŋ, a sãã ba teɛroŋ ka ba zɔɔrɔ ne a yɔɔmine.

³A lɛ zuiŋ, a Pɔɔl ane Banabase da be la a be kɔɔre a da yele yɛlɛ a Daana yuori eŋɛ kyɛ ba zoro dabeɛ̃. A Daana da di la O yelbiri maaloo danseɛ, a da vɛŋ ka yelwulii ane toŋkpeɛne tu ba zie a nyɛ eebo.

⁴Kyɛ a teŋɛ deme da wɛle la taa, ka ba mine da are ko a Gyuumine, kyɛ ka ba mine meŋ da are ko a apostoliimine.

⁵A Nemboore-yobo ane a Gyuumine ane ba namine naŋ da boɔrɔ ka ba dɔgre a apostoliimine kyɛ za ba ne kubo,

⁶a Pɔɔl ane Banabase da baŋ ne a la a da zo gaa Lisitera ane Dɛɛbe naŋ da waa Lekaniya tenne ane a paaloŋ na naŋ ŋmaagyili o;

⁷a da moɔlɔ a yelnoore a be.

⁸A Lisitera teŋɛ poɔ, dɔɔ kaŋ da be la a be a gbɛre zeŋ a yi a o dɔgebo saŋ zaa a daŋ ba kyɛŋ togitogi zaa.

⁹O da kyɛllɛ la a yɛlɛ a Pɔɔl naŋ da yele. A Pɔɔl da kaara o la tĩĩ a wa nyɛ ka o taa la yeldeebo naŋ na toɔ̃ e ka o nyɛ sammo.

¹⁰Ka a Pɔɔl da yeli ne kɔkɔkpeɛŋaa, “Vaa-iri are dendeŋ.” Ka a dɔɔ da vaa-iri are a piili kyɛnɛ.

¹¹A nembeɛoŋ naŋ da wa nyɛ bonna a Pɔɔl naŋ da e, ba da kyeere la yaga zaa ne a Lisitera deme kɔkɔre, “A ŋmemɛ sigi wa la te zie a taa nensaala waaloŋ!”

¹²Ba da boɔle la a Banabase ka Ziyo, kyɛ da boɔle a Pɔɔl ka Hɛɛme, bonso, ona la da yele a yɛlɛ zaa.

¹³A Ziyo puoruudie da are la a teŋkpoŋ niŋesogɔ. A Ziyo bagmaala da taa la naadɛɛ ane tepuuri a wa ne, o ne a nembeɛoŋ da boɔrɔ la ka ba maale bagre.

¹⁴A apostoliimine, Banabase ane Pɔɔl naŋ da wa woŋ a lɛ, ba da kyeɛre la ba kparre ne posaanaa, kyɛ zo kpɛ a neŋyaga poɔ a kyeerɛ yele:

¹⁵“N bamine, bonso ka yɛ erɛ a ŋaa? Te meŋ waa la nensaalba aŋa yɛ naŋ waa lɛ, kyɛ te taa la a yelnoore wa ne ka te wa ko yɛ ka yɛ na bare a bonweere ama kyɛ wa a Naaŋmen naŋ voorɔ zie, a Onaŋ naŋ iri a saluoni ane a teŋɛ ane a mane ane a boma zaa naŋ be a poɔ.

¹⁶A dakoroŋ saŋ na, O da bare la a nemboorɔ zaa ka ba erɛ seŋ lɛ ba naŋ boɔrɔ.

¹⁷Anealɛzaa, O da maŋ taa la dansediribe ka ba wullo a O tonveɛle; a korɔ yɛ saa ka yɛ boma maŋ maale, a maŋ ko yɛ bondirii kyɛ e ka yɛ taa popeɛloŋ.”

¹⁸Ane a ba yeluu ŋa zaa, ba da ba toɔ̃ pigi a noba sori ka ba na ta maale a bagre ko ba.

¹⁹Kyɛ a Gyuumine da yi la Antoɔki ane Ikoniyo a wa a be, a da wa leɛre a nembeɛoŋ teɛroŋ. Lɛ la ka ba da za a Pɔɔl ne kubo kyɛ vu o yi ne a teŋɛ poɔ a te bare a be a teɛre ka o kpie la.

²⁰Kyɛ a potuuribo naŋ da wa ŋmaagyili o, o da iree la a da leɛ kpɛ a teŋkpoŋ poɔ. Zie naŋ da wa nyaa, o ne Banabase da gaa la Dɛɛbe.

²¹Ba naŋ da wa te moɔle a yelnoore a Dɛɛbe poɔ a nyɛ potuuribo yaga a be, ba pãã da leɛ gaa la Lisitera, a yi a be gaa Ikoniyo ane a Antoɔki.

²²A be, ba da yeli la yɛlɛ teɛ a potuuribo a ko ba faŋ paalaa ka ba na eŋ faŋ a kyɛnɛ a ba yeldeebo poɔ, a yele, “A ferɛɛ la ka te nyɛ dɔgroŋ yaga kyɛ pãã kpɛ a Naaŋmen naaloŋ poɔ.”

²³Ba naŋ da wa kaa-iri nembɛrɛ a puoruu laŋne yie zaa poore baare, ba pãã da leŋ la noɔre, a puori eŋ ba kyɛ de ba ko a Daana, a Onaŋ yɛlɛ ba naŋ da sage de.

²⁴Lɛ la ka ba da tu Pisidiya a te gaa Pamfiliya.

²⁵Ba naŋ da wa kanne a Naaŋmen yelbiri a Pɛɛga teŋɛ poɔ, ba da sigi la Ataleya.

²⁶Be la ka ba da kpɛ gbori a gaa Antoɔki, a be la ka a noba da daŋ sɔre a Naaŋmen maaloo ko ba ane a toma na ba naŋ da toŋ baare.

²⁷Ba naŋ da wa te ta, ba da boɔle la a puoruu laŋne deme lantaa, a manne a toma zaa Naaŋmen naŋ da de ba toŋ ne, ane a lɛ O naŋ yuo a yeldeebo dendɔre a ko a Nemboore-yobo meŋ.

²⁸A Pɔɔl ane Banabase da be la a potuuribo zie ka a kɔɔre belaa.