Read Southern Dagaare Tom 16 Bible Online

Tom 16 - Southern Dagaare bible

Tom 16

¹A Pɔɔl da gaa la Dɛɛbe meŋ a yi be gaa Lisitera. A Yeezu potuuro kaŋ da be la a Lisitera teŋɛ poɔ ka o yuori di Timoti. O ma da waa la Gyuumine pɔgeyaa naŋ sage de a Yeezu yɛlɛ, kyɛ ka o saa da waa Giriki neɛ.

²O da taa la yosoŋ a yelderebɛ naŋ da be a Lisitera ane Ikoniyo poɔ.

³A Pɔɔl da boɔrɔ la ka a Timoti tu o; lɛ la ka o da e ka ba iri o dɛgre. Bonso, a Gyuumine naŋ da be a ziiri na poore zaa da baŋ ka a Timoti saa da waa la Giriki neɛ.

⁴Ba naŋ da yɔ yoɔrɔ a tenne poore, ba da manna korɔ la a yelderebɛ ka ba sagra a yɛlɛ na zaa a apostoliimine ane nembɛrɛ naŋ da yeli biŋ a Gyɛruzɛlɛm poɔ.

⁵Ka a lɛ da vɛŋ ka a puoruu laŋne deme yeldeebo da zɛge do saa, kyɛ ka ba noɔre da yɛllɛ bebiri zaa.

⁶Ba da tu la Firigyeya ane Galesiya paaloŋ tɔle, a Vooroŋ Soŋ naŋ da ba ko ba sori ka ba kanne a yelbiri a Ezeya poɔ zuiŋ.

⁷Ba naŋ da wa te ta Mesiya teŋɛ niŋe, ba da boɔrɔ la ka ba da te kpɛ Bitiniya poɔ, kyɛ a Yeezu Vooroŋ da ba sage ka ba kpɛ a be.

⁸Lɛ la ka ba da te beɛ a Mesiya teŋɛ bare kyɛ sigi gaa Turose.

⁹A tensogɔ saŋ, Pɔɔl da nyɛ la nyaabo kaŋ, ka Masedoniya dɔɔ kaŋ da are sɔrɔ o a yele, “Wa a Masedoniya poɔ, a wa soŋ te.”

¹⁰O naŋ da wa nyɛ a nyaabo, a daadaalɛ ka te da e aneɛ ka te gaŋ gaa a Masedoniya, te naŋ da baŋ ka Naaŋmen la boɔle te ka te gaa te moɔle a yelnoore ko ba zuiŋ.

¹¹Te da kpɛ la gbori a yi Turose kyɛ mɔŋ daadaa gaa Samoterase, ka a zie da wa nyaa ka te da gaa Neɛpoli,

¹²a da la yi a be gaa Filipae naŋ da waa Masedoniya teŋkpoŋ kaŋ kyɛ da be a Uroma noba nuuriŋ. Te da be la a teŋkpoŋ ŋa poɔ ka a kɔɔre belaa.

¹³A pɛnnoo bebiri daare naŋ da wa ta, te da yi la a teŋɛ poɔ a gaa baa kaŋ noɔre, te naŋ da teɛre ka puoruu zie be la a be. Te da zeŋ la a be a yeli yɛlɛ ko a pɔgeba naŋ da lantaa.

¹⁴Pɔge kaŋ naŋ da puoro Naaŋmen ka o yuori di Lidiya, a yi Tatira teŋɛ, a da waa yɛreyɛrɛ naŋ koɔrɔ pɛmɛ daaroŋ naŋ ba wono, da kyɛllɛ la a te yɛlɛ. A Daana da eɛɛ la ka o yuo o sukyiri a eŋ toori kyɛllɛ a yɛlɛ na a Pɔɔl naŋ da yele.

¹⁵A Lidiya ane o yideme naŋ da wa de suobu, o da sɔre te la a yele, “Ka yɛnee wa sage ka N waa la a Daana yelderɛ serɛzaa, yɛ wa kpeɛrɛ n yiri poɔ.” Kyɛ o da sɔre te la yaga zaa ka te da te sage.

¹⁶Daare kaŋ, te naŋ da gɛrɛ a puoruudie, te da tuori la pɔgsarlee kaŋ naŋ da waa gbaŋgbaa kyɛ da waa bageboorɔ, ka a o bageboge da yire libie yaga korɔ a o demee.

¹⁷O naŋ da tuuro te ane a Pɔɔl, a da ŋmeɛrɛ kpɛlle yele, “A noba bama waa la a Kpeɛ̃õ Zaa Naaŋmen gbaŋgbaare naŋ wa ka ba moɔle a faabo yɛlɛ ko yɛ.”

¹⁸O da erɛ la a ŋaa beri yaga, ka a Pɔɔl suuri da te iri yaga ka o leɛ yeli ko a sefaa, “A Yeezu Kirista yuori eŋɛ ka N yele korɔ fo, wa yi o eŋɛ.” Ka a sefaa da wa yi a gogo na poɔ.

¹⁹Kyɛ a o demee naŋ da wa nyɛ ka ba koŋ la baŋ nyɛrɛ a libie ba naŋ da nyɛrɛ, ba da nyɔge la a Pɔɔl ane Selase, a tage ba gaa ne a daa poɔ a nembɛrɛ zie.

²⁰Ba naŋ da taa ba wa ne a sɛrediribe zie, ba da yelee la, “A noba bama waa la Gyuumine, a wa dɔɔnɔ a te teŋɛ,

²¹a wullo a noba ka ba tuuro yel-erre te Uroma noba naŋ ba taa sori ka te tu bee a e.”

²²A nembeɛoŋ da iri zɔɔrɔ ne la a Pɔɔl ane Selase, ka a sɛrediribe da e ka ba yaare ba bonsuuri kyɛ e ka ba feɛ ba.

²³Ba naŋ da wa feɛ ba yaga baare, ba da pɔge ba la kyɛ tere noɔre ka a nempagdie kaara gu ba velaa.

²⁴Ba naŋ da ko o a noɔre ŋa zuiŋ, o da de ba la kpɛ te pɔge a dikpaare poɔ, a leŋ ba gbɛɛ mare kpulo.

²⁵Aŋa tensogpozentaa saŋ, Pɔɔl ane Selase da puoro la kyɛ yiele puubu yieluŋ korɔ Naaŋmen, ka a nempɔgre da kyɛllɛ wono.

²⁶Ba wa berɛ ka a zie gbigri yaga yaga zaa, ka a nempagdie daŋkyime da zɛŋ a sigi te tɔ a pare. A daadaalɛ ka a dendɔɛ zaa da yuori, kyɛ ka a nempɔgre zaa banzɔlɔ da lori.

²⁷A nempagdie kaara naŋ da wa dɔ̃ɔ̃ iri o goɔŋ poɔ a nyɛ ka a dendɔɛ zaa yuore, o da voɔ la o zɔɔzɔɔ-soɔ a da boɔrɔ ka o ko o meŋɛ, bonso, o da teɛre ka a nempɔgre da yi zoe la.

²⁸Kyɛ a Pɔɔl da zɛge la o kɔkɔre a kyeere yele, “Ta e fo meŋɛ yelfaa zaa, bonso, te zaa bebe la.”

²⁹A nempagdie kaara da eɛɛ la ka ba ko o vũũ, ka o da ŋmore kpɛ a nempagdie poɔ, a te le vɔgle a Pɔɔl ane Selase niŋesogɔ a miine ne dabeɛ̃.

³⁰Lɛ la ka o da taa ba yi ne yeŋ a te soore ba, “N bamine, wola ka N na e a nyɛ faabo?”

³¹Ka ba leɛ yeli sɔge, “Sage de a Daana Yeezu yɛlɛ, kyɛ fo na nyɛ la faabo, fõõ ne a fo yideme zaa.”

³²Ba da kanne la a Daana yelbiri a ko o ane banaŋ zaa naŋ da be a o yiri poɔ.

³³A tensogɔ na zaa, a gogo na poɔ, a nempagdie kaara da taa ba la a te pɛge ba felɛ. Lɛ la ka o ne o yideme zaa da de suobu a daadaalɛ.

³⁴O da taa ba la do ne o yiri, a te ko ba bondirii kyɛ ka o ne o yideme da taa popeɛloŋ, o naŋ da sage de a Naaŋmen yɛlɛ zuiŋ.

³⁵Zie naŋ da wa nyaa, a sɛrediribe da toŋ la a polisiri, a yele, “Vɛŋ ka a noba na gɛrɛ.”

³⁶A nempagdie kaara da ko la Pɔɔl a duoro a yele, “A sɛrediribe tere la noɔre ka ba bare yɛ ka yɛ gɛrɛ; azuiŋ, yɛ wa yi a gɛrɛ ne emmaaroŋ.”

³⁷Kyɛ ka Pɔɔl leɛ yeli sɔge, “Te waa la Uroma noba kyɛ ka ba ŋmɛ te noba poɔ, a page te, kyɛ ka te ba taa saanaa zaa. Kyɛ a pampana ŋa, ba boɔrɔ la ka ba sɔgle bare te be? A koŋ baŋ waa lɛ togitogi! Vɛŋ ka bamenne wa taa te yi ne.”

³⁸A polisiri da te yeli la a yɛlɛ ama ko a sɛrediribe, ka dabeɛ̃ da kpɛ ba, ba naŋ da wa woŋ ka ba waa la Uroma noba;

³⁹lɛ la ka ba da wa sɔre saanaa a yi ba zie. A lɛ puoriŋ, ba da taa ba la yi ne a te yeli ko ba ka ba yi a teŋɛ poɔ.

⁴⁰Ba naŋ da wa yi a nempagdie poɔ, ba da gaa la Lidiya yiri. Ba naŋ da wa te nyɛ a ba yɔɔmine ane ba yɔɔpuuli a yeli yɛlɛ teɛ a ba yeldeebo, ba pãã da yi la a be a gaa.