Read Southern Dagaare Tom 20 Bible Online

Tom 20 - Southern Dagaare bible

Tom 20

¹A dɔɔne naŋ da wa baare puoriŋ, Pɔɔl da toŋ boɔle la a potuuribo. O naŋ da wa yeli yɛlɛ teɛ ba a kyɛ ko ba o gaabo yaane baare, o da yi gaa la Masedoniya.

²O naŋ da wa yɔ a tenne anaŋ, a yeli yɛlɛ yaga teɛ a potuuribo, o da wa la Girise,

³a wa kpɛ a be kyuuri ata. A Pɔɔl da nara la ka o kpɛ gbori gaa Seeriya, kyɛ a Gyuumine naŋ da bo faaloŋ kyaare ne o zuiŋ, o da leɛ la o teɛroŋ a leɛ tu Masedoniya.

⁴Piruse bidɔɔ, Sopata naŋ yi Bɛreya da tu o la gaa, ka Arestaku ane Sekundi naŋ yi Tɛsalonika da tu o gaa, ka Gayose naŋ yi Dɛɛbe ane Timoti meŋ da tu o gaa, a laŋne Takyiku ane Terofimu naŋ yi Ezeya meŋ da tu o la gaa.

⁵Ba da de la weɛ a te kyɛllɛ te Turose poɔ;

⁶kyɛ a Boroboro Dambo tigri bebie puoriŋ la ka te da kpɛ gbori Filipae poɔ a gɛrɛ. Te da de la bebie anuu kyɛ te ta Turose a pɔge ba, ka te da zeŋ be bebie ayopoĩ.

⁷A koseɛraa bebi-dɛndɛŋ daare, te naŋ da wa lantaa ka te ŋmaa boroboro, Pɔɔl ne ba da yeli la yɛlɛ, o naŋ da boɔrɔ ka ka zie wa nyaa ka o iri gaa zuiŋ. O da yeli la yɛlɛ ka a kɔɔre te ta tensogpozentaa.

⁸Fentele yaga da be la a peɛzudie poɔ, benee te naŋ da lantaa.

⁹Pɔlbile kaŋ yuori naŋ da di Yutaaku da zeŋ la a takoro noɔreŋ a gbire kyuuro, a Pɔɔl naŋ da yele yɛlɛ. A Pɔɔl naŋ da yeli a yɛlɛ ka a te kɔɔre, a pɔlbile da gbiree la gaa tɔɔre a da yi a peɛzuderi naŋ mɛ dɔgle taa ata soba zu a le. Ba naŋ da wa te zɛllɛ o, ka o kpie la.

¹⁰Kyɛ Pɔɔl da sigi te zuuni la o zu, a nyɔge o zɛle eŋ o nuuriŋ kyɛ yeli, “Yɛ ta zoro dabeɛ̃, bonso, a o vooroŋ naŋ ba sigi.”

¹¹Lɛ la ka a Pɔɔl da leɛ do a peɛzudie, kyɛ o naŋ da wa te ŋmaa a boroboro a ɔɔ baare, o da naŋ yeli ne ba la yɛlɛ ka a te ta zivɛlemɛ, kyɛ pãã da gaa.

¹²Kyɛ ba da taa la a pɔlbile na ka o waa vore a kuli ne, ka ba poore da pɛle yaga zaa.

¹³Te da de la weɛ a te kpɛ a gbori a gaa Azɔ, be la ka te da boɔrɔ ka te gaa te de a Pɔɔl, bonso, o meŋɛ la da nare a lɛ biŋ, a da boɔrɔ ka o gaa be ane gbɛɛ.

¹⁴O naŋ da wa pɔge te a Azɔ poɔ, o da kpɛ la a gbori ka te gaa Mitelen.

¹⁵Te da kpɛ la gbori a be a gaŋ Kyiose naŋ are kyaare a Mitelen a zie naŋ da wa nyaa. A naŋ da la nyaa zie, te da wa ta la Samose, ka zie da la nyaa ka te ta Miletu.

¹⁶A Pɔɔl da nare la o teɛroŋ poɔ ka o te lanne a Efesu teŋɛ, ka o na ta wa kɔɔre a Ezeya poɔ. O da kyerɛ la ka ka a naŋ wa taa eebo, ka o ta Gyɛruzɛlɛm a Pɛnteko bebiri daare.

¹⁷Pɔɔl da be la a Miletu poɔ kyɛ toŋ boɔle a puoruu laŋne nembɛrɛ naŋ be a Efesu poɔ.

¹⁸Ba naŋ da wa o zie, o da yeli ko ba la: “A yi a bebi-dɛndɛŋ, a n gbɛre naŋ kpɛ a Ezeya paaloŋ te ta ŋaa, yɛmenne baŋ la lɛnɛɛ N naŋ da kpeɛrɛ a yɛ poɔ,

¹⁹a tonɔ korɔ a Daana ne meŋɛ sigruu ane nentaŋ, kyɛ sage de yɛlɛ na zaa a Gyuumine naŋ da erɛ ka a korɔ ma dɔgroŋ.

²⁰N da ba sɔgle ka N e yelzaa naŋ taa sommo, a da moɔlɔ a yelbiri korɔ yɛ, a wullo yɛ neŋyaga poɔ ane a yɛ yie poore,

²¹N da di la danseɛ ko a Gyuumine ane Giriki noba ka ba leɛ ba eebo yi ba yelbebe poɔ a wa Naaŋmen zie kyɛ taa yeldeebo ne a te Daana Yeezu.

²²Pampana ŋa, a Vooroŋ Soŋ noɔre sagoo zuiŋ, N gɛrɛ la Gyɛruzɛlɛm, kyɛ N ba baŋ yeli naŋ na e ma a be,

²³ka a yeli ŋa a Vooroŋ Soŋ naŋ maŋ yeli ko ma a teŋkpoŋ zaa poɔ N naŋ maŋ wa te kpɛ, ka ba na page ma la kyɛ ka N nyɛ dɔgɛɛ be yoŋ naane.

²⁴Kyɛ N ba de n nyɔvore ka o dɔgle bonzaa zu, ka maa na toɔ̃ toŋ a tonnoɔre na a Daana Yeezu naŋ ko ma, ona la ka N di a Ŋmen-yelnoore garaaseɛ danseɛ.”

²⁵“Kyɛ pampana ŋa, N baŋ ka yɛ bama poɔ N naŋ yɔ a kanne a Naaŋmen naaloŋ yɛlɛ, yɛ kanzaa daŋ koŋ la nyɛ ma zaa.

²⁶Azuiŋ, a zenɛ bebiri, N yele korɔ yɛ la, ka N ba taa saanaa zaa ka yɛ kanzaa wa wɛ,

²⁷bonso, N da ba sɔgle ka N manne a Naaŋmen poboɔbo zaa ko yɛ.

²⁸Yɛ kaara yɛmenne zie ane a peere zaa a Vooroŋ Soŋ naŋ e ka yɛ kaara a zu, yɛ kaara a Naaŋmen puoruu laŋne deme velaa. Bana la ka O faa ne O meŋɛ Bidɔɔ zẽẽ.

²⁹N baŋ ka a N gaabo puoriŋ, noba mine naŋ waa ŋa gboŋgbo-faare na wa kpɛ la yɛ poɔ, a koŋ bare a peere.

³⁰A Noba mine gba na yi la yɛ poɔ, a yele yeltulo, ka a potuuribo na tu ba puori.

³¹Azuiŋ, yɛ baŋ ne a, a ta inni ka yuomo ata tensogɔ bee ŋmenaa, ka N ba nage ka N kpãã yɛ ane nentaŋ.

³²Pampana ŋa, N de yɛ la ko Naaŋmen ane a Naaŋmen yelbiri garaaseɛ. A yelbiri taa la kpeɛ̃õ a na e ka yɛ baa, kyɛ ka o ko a yɛ banaŋ zaa naŋ pɛgeyi a o gbandiruŋ.[34]

³³N ba taa zɛnzɛŋ ne neɛzaa libiri bee salema bee bonsuuri.

³⁴Yɛmenne baŋ ka N da toŋ la toma ane n nuuri a bɔ bonzaa maa ne n taaba naŋ da boɔrɔ.

³⁵A yɛlɛ ama zaa poɔ, N wuli yɛ la ka toma tommo poɔ la ka te na toɔ̃ soŋ a nembaalba, kyɛ teɛre a yelbie a Daana Yeezu meŋɛ naŋ da yeli, ‘A e la maaloo yaga ka fo tere a gaŋ fo naŋ derɛ.’ ”

³⁶A Pɔɔl naŋ da wa yeli a yɛlɛ baare, o da gbi la dumo ka o ne ba zaa da laŋ puori.

³⁷Ba zaa da koŋee la yaga, a da nyɔge a Pɔɔl kori kyɛ moore o.

³⁸Ba poore da sããɛ la ane yeli na o naŋ da yeli ko ba, ka ba koŋ la nyɛ o zaa. A lɛ puoriŋ, ba da taa o la gaa ne a gbori zie.