Read Southern Dagaare Tom 26 Bible Online

Tom 26 - Southern Dagaare bible

Tom 26

¹A Ageripa da yeli ko la a Pɔɔl, “Fo taa la sori a na tu fo meŋɛ noɔre yɛlɛ.” Lɛ la ka a Pɔɔl da teɛ o nu kyɛ piili yele yɛlɛ a na faa o meŋɛ:

²“Naa Ageripa, N taa la zunoɔ ane N naŋ are fo niŋesogɔ zenɛ a na tu n meŋɛ noɔre a kyaare a yɛlɛ na zaa a Gyuumine naŋ de duoro ne ma,

³bonso, fo baŋ la a Gyuumine sããkommine yɛlɛ ane a ba nɔkpeɛne zaa; azuiŋ, N sɔrɔ fo la ka fo di kannyiri kyɛ kyɛlle woŋ a n yɛlɛ.”

⁴“A Gyuumine zaa baŋ la n nyɔvore yɛlɛ a yi n biiluŋ saŋ, N naŋ da laŋ kpɛ ne maa meŋɛ noba a Gyɛruzɛlɛm poɔ, a yi a piiluu saŋ.

⁵Ba baŋ ma la ka a kɔɔre, ka ba naŋ na sage yeli yelmeŋɛ, ka a Faraziimine laŋne naŋ tuuro a te puoruu yɛlɛ kyerete poɔ la ka N da poɔ.

⁶Kyɛ pampana ŋa, N are la a kyɛ ka ba dire n sɛrɛɛ a kyaare ne a teɛretɔroo[41] N naŋ taa ne a noɔre na Naaŋmen naŋ da eŋ ko a te sããkommine zuiŋ.

⁷A noɔre ŋa la ka a te bale pie ne bayi da kyellɛ ka ba nyɛ a eebo ba zie kyɛ da moɔ nimiri puoro tensogɔ ane ŋmenaa zaa. N Ba Naa, a teɛretɔroo ŋa zuiŋ la ka a Gyuumine ŋmaara yɛlɛ tuoro ma!

⁸Bonso, ka yɛ kanzaa kontoɔ̃ sage de ka Naaŋmen maŋ e la ka a kuuni leɛ-iri?”

⁹“Serɛzaa, maa meŋɛ da sage deɛ la ka a seŋɛɛ la ka N e yɛlɛ yaga sãã a Yeezu, a Naazɛrɛ Bie yuori.

¹⁰Kyɛ a lɛ la ka N da e a Gyɛruzɛlɛm poɔ. A Naaŋmen bagmaalkare da ko ma la sori ka N te nyɔge a nensonne eŋ nempagdie poɔ. A lɛ yoŋ naane, ka ba naŋ wa di ba sɛrɛɛ a yeli ka ba seŋ ne la kũũ, N meŋ da maŋ sage la.

¹¹N da maŋ dɔgre ba la gbɛɛ yaga a puoruuderi poore, kyɛ da maŋ erɛ aneɛ ka N fere ba ka ba to Naaŋmen; kyɛ a n suuri naŋ da iri ba zu yaga zuiŋ, da eɛɛ la ka N digi ba te kpɛ ne paaloŋ yobo.”

¹²“A teɛroŋ ŋa N naŋ da taa zuiŋ, a Naaŋmen bagmaalkare da ko ma la sori kyɛ toŋ ma ka n gaa Damasko,

¹³N Ba Naa, N naŋ da yi a sori a ŋmentantuo gbaŋgbaŋ saŋ, N da nyɛ la veɛloŋ kaŋ sazu poɔ ka o kyaane te gaŋ ŋmenaa naŋ maŋ kyaane, ka o kyaane laare ma, a laŋ ne n sotutaaba.

¹⁴Te zaa naŋ da wa le teŋɛ, N da woŋ la kɔkɔre naŋ yele yɛlɛ korɔ ma ne Hiburu kɔkɔre, ‘Sɔɔl, Sɔɔl, bonso ka fo dɔgrɔ ma? Fo na pere la, ka fõõ wa de fo gbɛɛ teɛrɛ ne goore.’

¹⁵Ka N da soore, ‘Aŋ la fo Daana?’ Ka a Daana yeli sɔge, ‘Maa Yeezu la, maa la ka fo dɔgrɔ.

¹⁶Kyɛ iri are, bonso N wa la fo zie a yeli ŋa zuiŋ, ka N iri fo ka fo waa n tontonɔ kyɛ di a N danseɛ a yɛlɛ ama fo naŋ nyɛ ane anaŋ N naŋ na wuli fo.

¹⁷N na faa fo la yi ne a fo noba zie ane a Nemboore-yobo[42] zie, a ba zie la ka N tonɔ fo

¹⁸ka fo te yuo ba nimie ka ba na bare ligruŋ toma kyɛ kpɛ kyaane poɔ, a yi Setaana naaloŋ poɔ kyɛ kpɛ Naaŋmen naaloŋ poɔ, ka a lɛ na vɛŋ ka ba nyɛ yelbebe sudi kyɛ kpɛ a banaŋ yeldeebo naŋ e ka ba leɛ nensonne poɔ.’

¹⁹A lɛ puoriŋ, Naa Ageripa, N da ba zagre ka N tu a nyaabo na N naŋ da nyɛ yi a tenvelaa[43] poɔ.

²⁰Kyɛ N da daŋ manne la a yɛlɛ ko a banaŋ naŋ da be a Damasko poɔ, Gyɛruzɛlɛm poɔ a laŋne a Gyudiya paaloŋ zaa ane a Nemboore-yobo meŋ zie, ka ka ba leɛ ba eebo a leɛ wa Naaŋmen zie, a wa tonɔ toma naŋ wullo ka ba leɛ la ba eebo.

²¹A yeli ŋa zuiŋ la ka a Gyuumine da nyɔge ma a Naaŋmen die poɔ, a da erɛ aneɛ ka ba ko ma.

²²Naaŋmen la gu ma taa a wa ta a zenɛ bebiri, lɛnso ka N are a kyɛ a dire danseɛ bibiiri ane nembɛrɛ zie, a ba yele yelzaa ka anaŋ a Ŋmen-yelmanneba ane Moozul naŋ da yeli ka a na e la:

²³ka a ferɛɛ la ka a Mɛzaaya[44] woŋ tuo kyɛ pãã waa a nendɛndɛŋ soba naŋ na leɛ-iri a kuuni poɔ. O na moɔle la a veɛloŋ yɛlɛ a ko a te noba ane a Nemboore-yobo.”

²⁴O naŋ da naŋ tuuro a o noɔre yɛlɛ, a Fɛstu da tanne yelee la, “Pɔɔl, fo zu ba kyebe! A fo ganzan-yaga eɛɛ la ka fo zu gyɛre!”

²⁵Kyɛ ka a Pɔɔl yeli, “Nakpoŋ Fɛstu, N zu ba gyɛre kyɛ a yelmeŋɛ la ka N sereŋ yele.

²⁶Serɛzaa, a naa baŋ la a yɛlɛ ama kyɛ ona la ka N yele a yɛlɛ korɔ a ba zoro dabeɛ̃, bonso N baŋ ka a yɛlɛ ama kanzaa ba bale o bammo, bonso a yɛlɛ ama naŋ e ba sɔgle.

²⁷Naa Ageripa, fo sage de la a Ŋmen-yelmanneba yɛlɛ be? N baŋ ka fo sage deɛ la.”

²⁸Ka a Ageripa soore a Pɔɔl, “Fo teɛre ka fo na toɔ̃ e la ka N leɛ Kiristabie wieouŋ lɛ be?”

²⁹Ka Pɔɔl da leɛ yeli, “Ka a na e wieouŋ bee ka a na kɔɔre, N puoro korɔ la Naaŋmen ka ka a ta e fo yoŋ, kyɛ a banaŋ zaa naŋ kyɛllɛ a n yɛlɛ a zenɛ bebiri ŋa, meŋ na waa ŋa N naŋ waa, kyɛ ka a banzɔlɔ ama eŋ ta poɔ.”

³⁰Lɛ la ka a naa da vaa-iri, ka a gɔbena ane a Bɛɛnese ane a banaŋ naŋ da zeŋ a be meŋ da iri;

³¹kyɛ ba naŋ da wa te yire, ba da yeli ko la taa, “A dɔɔ ŋa ba erɛ yeli zaa naŋ seŋ ne kũũ bee pɔgebo.”

³²A Ageripa da yeli ko la Fɛstu, “Ba da na toɔ̃ bare la a dɔɔ ŋa, ka o naŋ da ba yeli ka o na gaa la a nakpoŋ zie.”