Read Southern Dagaare Tom 4 Bible Online

Tom 4 - Southern Dagaare bible

Tom 4

¹A Piita ane a Gyɔɔn naŋ da naŋ yele a yɛlɛ korɔ a noba, a Naaŋmen bagmaalba ane a Naaŋmen die guguribo neŋkpoŋ ane a Sadusiimine da wa la ba zie.

²Ba suuri da iree la yaga ane ba naŋ da kanna a noba kyɛ moɔlɔ ka a Yeezu zie la ka kuuni leɛ-iruu be.

³Azuiŋ, ba da nyɔge ba la te pɔge ka zie te nyaa bonso, zie deɛ da maaɛ la.

⁴Kyɛ a noba yaga naŋ da woŋ a yelbiri da sage deɛ la. Ba da ta ŋa noba turaanuu.

⁵A nyaazie daare, a ba namine ane a ba nembɛrɛ ane a Naaŋmen begɛ wulwulibo da laŋ la taa a Gyɛruzɛlɛm poɔ,

⁶ba ne Anaase a Naaŋmen bagmaalkare neŋkpoŋ ane Kayefa ane Gyɔɔn ane Alɛzanda ane a banaŋ zaa naŋ da yi a Naaŋmen bagmaalkare neŋkpoŋ boorɔ poɔ.

⁷Ba naŋ da e ka a nempɔgre wa are ba sogɔŋ, ba da soore ba la, “Boŋ kpeɛ̃õ bee aŋ yuori eŋɛ la ka yɛ da e a yeli ŋa?”

⁸Lɛ la ka Piita naŋ da paale ne a Vooroŋ Soŋ da yeli ko ba, “Yɛnee, a noba namine ane ba nembɛrɛ,

⁹ka tenee are a kyɛ a zenɛ bebiri, ka yɛ soorɔ te a kyaare ne a yelvelaa te naŋ e ko neɛ kaŋ naŋ da beɛrɛ, ka o nyɛ laafeɛ,

¹⁰a ferɛɛ la ka yɛ zaa baŋ, a laŋne a Izerayɛl noba zaa ka a Yeezu Kirista, a Naazɛrɛ Bie na yɛ naŋ da kpa a dagaraa zu, ka Naaŋmen e ka O leɛ-iri a kuuni poɔ, yuori eŋɛ la ka a dɔɔ ŋa nyɛ laafeɛ a are dendeŋ yɛ niŋesogɔ.

¹¹A Yeezu ŋa la: ‘a kuuri na yɛnee, a mɛmeɛrebɛ naŋ da zagre bare; Ona la leɛ a yiri pare kuuri.’

¹²Faabo ba la kye neɛ kanzaa zie, bonso, yuori zaa ba kye a teŋɛzu kyɛ Naaŋmen naŋ tere a nensaalba poɔ ka te na tu a nyɛ faabo.”

¹³Ba naŋ da wa nyɛ lɛ a Piita ane Gyɔɔn naŋ da yele a yɛlɛ a ba zoro dabeɛ̃ kyɛ ka ba da baŋ ka ba da ba e noba naŋ zanne gane, ba nɔɛ da maaɛ la. Kyɛ ba da baŋ ka ba da waa la a Yeezu potuuribo.

¹⁴Kyɛ ba naŋ da nyɛ a dɔɔ na naŋ da nyɛ a sammo ka o are kɔge ba, ba da ba la taa nɔkpeɛne zaa na ŋmɛ a yeli ŋa poɔ.

¹⁵Azuiŋ, ba da tere la noɔre ka ba taa ba yi ne a sɛrediribe zie, kyɛ ka ba nyɛ taa ne a yɛlɛ.

¹⁶Ba da soore la taa, “Boŋ ka te na e ne a noba bama? A e la weliweli ko banaŋ zaa naŋ be a Gyɛruzɛlɛm poɔ ka ba e la yelwulaa; te kontoɔ̃ yeli ka a ba waa lɛ.

¹⁷Ka tenee boɔrɔ ka a yɛlɛ ŋa ta gaa tɔɔre a noba poɔ, yɛ e ka te kpãã ba ka ba ta daŋ la porɔ a Yeezu yuori neɛzaa zie.”

¹⁸Lɛ la ka ba da boɔle ba a ko ba noɔre ka ba ta daŋ wa yele bee a wullo noba a Yeezu yuori eŋɛŋ zaa.

¹⁹Kyɛ a Piita ane Gyɔɔn da leɛ yeli sɔge ba la, “Yɛ teɛre nyɛ, a buo soba la seŋ ne eebo a Naaŋmen niŋesogɔ, te naŋ na sage a yɛ noɔre bee a Naaŋmen noɔre?

²⁰Tenee eŋ kontoɔ̃ bare bonna te naŋ nyɛ bee a woŋ yeluu.”

²¹Ba da leɛ fugi ba la kyɛ bare ba ka ba gɛrɛ, ba naŋ da ba baŋ lɛnɛɛ zaa ba naŋ na dɔgre ba a noba zuiŋ, bonso a noba zaa da puuro la Naaŋmen ane bonna naŋ e.

²²A dɔɔ gbɛre na ba naŋ da saŋ da nyɛ la yuomo lezaayi kyɛ dɔgle.

²³Ba naŋ da wa bare a Piita ane Gyɔɔn baare, ba da gaa la a ba bamine zie a te manne bon a Naaŋmen bagmaalkare ane a nembɛrɛ naŋ da yeli ko ba.

²⁴Ba naŋ da wa woŋ a yɛlɛ, ba da laŋ la taa a zɛge ba kɔkɔɛ a puori Naaŋmen a yeli, “Boma Zaa Daana, fõõ la da iri a saluoni ane a teŋɛ ane a mane ane boma zaa naŋ be a poɔ.

²⁵Fõõ la da vɛŋ ka a Vooroŋ Soŋ da tu a te sããkoma Davil, a fo tontonɔ zie, a yeli: ‘Bonso ka a Nemboore-yobo[10] suuri kpaara lɛ, kyɛ ka a noba teɛre teɛroŋ weere?

²⁶A teŋɛzu namine yi la tammo, ka a naaloŋ deme lantaa, a zɔɔrɔ ne a Daana ane a O Mɛzaaya.’[11]

²⁷Bonso, Hɛrɔde ane Ponsi Pilato ane a Nemboore-yobo ane a Izerayɛl noba da laŋ la taa a teŋkpoŋ ŋa poɔ a zɔɔ ne a Yeezu a fo tontonsoŋ, a onaŋ fo naŋ da sɔ kããsoŋ,

²⁸ka ka O e a bonna a fo nu ane a fo poteɛrɛ naŋ nare biŋ ka fo e.

²⁹Pampana ŋa, Daana, kaa nyɛ a ba fugibu kyɛ soŋ a fo tontonema ka ba moɔle a fo yelbiri kyɛ ta zoro dabeɛ̃,

³⁰kyɛ ka fo teɛ fo nu a saŋ na baaloŋ, a erɛ yelwulii ane toŋkpeɛne a fo tontonsoŋ Yeezu yuori eŋɛ.”

³¹Ba naŋ da wa puori baare, a zie na ba naŋ da lantaa da gbigree la kyɛ ka ba da paale ne a Vooroŋ Soŋ a da moɔlɔ a Naaŋmen yelbiri ane ba faŋ zaa.

³²A noba banaŋ zaa naŋ da sage de a yɛlɛ da taa la teɛroŋ yeni ane sukyiri yeni, ka ba kanzaa da ba yeli ka a bon o naŋ da taa waa la o yoŋ soobo; ba zaa da laŋ la boma.

³³A apostoliimine da di la danseɛ kpeɛŋaa zaa a kyaare ne a Daana Yeezu kuuni poɔ leɛ-iruu, kyɛ ka Naaŋmen garaase-kpoŋ da be ba zaa zie.

³⁴Neɛzaa da ba be ba poɔ a dire bonzaa naŋ bonso, banaŋ zaa naŋ da taa wɛre bee yie da koɔre a la, a da taa a libie

³⁵a wa eŋ a apostoliimine nuuriŋ, ka ba de poŋ ba zaa a seŋ a naŋ wono ba yeni yeni zaa lɛ.

³⁶Yuzɛb naŋ yi Sapuru kyɛ da waa Levi bale neɛ ka a apostoliimine da pore o yuori ka Banabase (a yuori tɛgɛ la, “neɛ naŋ maŋ yeli yɛlɛ dii o tɔ sukyiri.”).

³⁷O da koɔre la o weɛ a da taa a libie a wa eŋ a apostoliimine nuuriŋ.