Read Southern Dagaare Tom 8 Bible Online

Tom 8 - Southern Dagaare bible

Tom 8

¹A Sɔɔl da sage ne la a banaŋ naŋ da ko a Stefanuu. A bebiri na ne o zu, dɔgroŋ kpoŋ da le la a puoruu laŋne deme zu a Gyɛruzɛlɛm poɔ, ka a noba zaa da zo yaare a Gyudiya ane a Samareya paaloŋ poɔ, kyɛ te kyɛre a apostoliimine yoŋ.

²A puoruu nimizeɛ noba mine da ũũ la a Stefanuu kyɛ da koŋ o yaga zaa.

³Kyɛ Sɔɔl da iri la o nimiri eŋ a puoruu laŋne deme. O da maŋ kpɛ la yiri ŋa poɔ a yi te kpɛ yiri ŋa poɔ a nyɔgrɔ dɔbɔ ane pɔgeba vuuro a te eŋ nempagdie poɔ.

⁴A banaŋ naŋ da zo yaare da yi yoɔrɔ la, a moɔlɔ a yelbiri.

⁵Filipi da sigi gaa la a Samareya teŋkpoŋ poɔ a te moɔle a Mɛzaaya[15] yɛlɛ ko ba.

⁶A nembeɛoŋ naŋ da wa woŋ kyɛ nyɛ a yelwulii a Filipi naŋ da erɛ, ba da laŋ la noɔre a wa kyɛllɛ a yɛlɛ na o naŋ da yele,

⁷bonso, sefaare da kyeerɛ la yaga zaa kyɛ yire a noba enneŋ; ka noba yaga naŋ da waa gbɛrɛɛ bee wɔɔre da nyɛ sammo.

⁸A lɛ zuiŋ popeɛloŋ kpoŋ da be la a teŋkpoŋ na poɔ.

⁹Dɔɔ kaŋ yuori naŋ da di Saamon da daŋ erɛ la yelbeere a teŋkpoŋ poɔ, ka a Samareya teŋɛ noba nɔɛ da maa, kyɛ ka o da yele ka o waa la gandaa.

¹⁰A noba zaa, a yi ba bile a te tɔ ba kpoŋ soba da eŋ la toori a kyɛllɛ a o yɛlɛ, a yele, “A dɔɔ ŋa la a Naaŋmen kpeɛ̃õ na ba naŋ boɔlɔ Gandaa.”

¹¹Ba da eŋ la toori a kyɛllɛ o yɛlɛ, bonso, o da toŋ la nɔmaa toma ka a maa ba nɔɛ ka a kɔɔre.

¹²Kyɛ a Filipi naŋ da wa moɔlɔ a Naaŋmen naaloŋ yelnoore ane a Yeezu Kirista yuori yelnoore, ba da sage de la a Filipi yɛlɛ a de suobu, dɔbɔ ane pɔgeba.

¹³A Saamon meŋ gba da sage de la a yɛlɛ. O naŋ da wa de a suobu baare, o da be la a Filipi zie tegitegilɛ. A dɔɔ ŋa noɔre da maaɛ la ne a yelwulii ane a toŋseɛlɛ o naŋ da nyɛ.

¹⁴A apostoliimine naŋ da wa woŋ a Gyɛruzɛlɛm poɔ ka a Samareya noba sage de la a Naaŋmen yelbiri, ba da toŋ la Piita ane Gyɔɔn ba zie.

¹⁵A ba bayi da sigi la a Samareya a te puori ko ba, ka ka ba na toɔ̃ de a Vooroŋ Soŋ,

¹⁶(bonso, a Vooroŋ Soŋ da naŋ ba sigi wa ba kanzaa zie sɛre. Suobu yoŋ la ka ba da de a Daana Yeezu yuori eŋɛ).

¹⁷Lɛ la ka a Piita ane a Gyɔɔn da de ba nuuri pare ba zuri ka ba da de a Vooroŋ Soŋ.

¹⁸A Saamon naŋ da wa nyɛ ka a apostoliimine de ba nuuri pare a noba zuri ka ba nyɛ a Vooroŋ Soŋ, o da ko ba la libie,

¹⁹a yele, “Yɛ ko n meŋ a kpeɛ̃õ ŋa ka maa meŋ wa de n nuuri pare neɛzaa zu ka o soba meŋ nyɛ a Vooroŋ Soŋ.”

²⁰Kyɛ ka a Piita da yeli ko o, “Ka fõõ ne a fo libiri zaa wɛ, bonso, fo teɛre ka fo na toɔ̃ da la a Naaŋmen kyɔɔtaa ne libiri!

²¹Fo nu kye a toma ŋa poɔ, bonso, fo poteɛrɛ ba veɛlɛ Naaŋmen zie.

²²Leɛ a fo eebo yi a fo potuyɛlɛ poɔ, kyɛ sɔre a Daana ka anaŋ wa taa eebo ka O di a fo poteɛre faare suuri ko fo.

²³Bonso, N nyɛɛ la ka fo taa la pokpegri kyɛ ka potuoloŋ bɔnzɔlɔ leŋ fo taa.”

²⁴Ka a Saamon da yeli sɔge, “Yɛ puori sɔre a Daana ko ma ka a yɛlɛ ama kanzaa fo naŋ yeli ta page ma.”

²⁵A Piita ane a Gyɔɔn naŋ da wa di a yɛlɛ ama danseɛ a kyɛ manne a Daana yelbiri baare, ba da la leɛ gaa la a Gyɛruzɛlɛm, a moɔlɔ a yelnoore a Samareya tembilii yaga poore.

²⁶A Daana maleke pãã da yeli ko la a Filipi, “Iri tu a sapare nudoloŋ seŋ sori naŋ yi Gyɛruzɛlɛm a sigre Gaza.” (A sori ŋa e la a wɛgyɛŋ sori.)

²⁷A lɛ la ka o da vaa-iri gaa. A Etopiya teŋɛ dɔɔ kaŋ naŋ da waa dɔɔ-varaa da e la Kandase sɛrediribe neŋkpoŋ. A dɔɔ ŋa da e la a Etopiya pɔgenaa tontonɔ naŋ da kaara a pɔgenaa libie zu. O da wa la Gyɛruzɛlɛm ka o wa puori

²⁸kyɛ pãã da leɛ kulo. O da zeŋ la o wie toriko poɔ a kanna a ŋmen-yelmanna Azaaya gansɛgraa.

²⁹Lɛ la ka a Vooroŋ Soŋ da yeli ko a Filipi, “Gaa a wie toriko ŋa zie a te do kpɛ zeŋ poɔ ba poɔ.”

³⁰A Filipi pãã da zo ta la a wie toriko a woŋ a dɔɔ-varaa naŋ kanna a Ŋmen-yelmanna Azaaya gane. O da soore o la, “Fo baŋ la a yɛlɛ ama fo naŋ kanna tɛgɛ be?”

³¹Ka o yeli sɔge, “N na e la wola baŋ a tɛgɛ ka neɛ kaŋ ba wuli ma?” O pãã da boɔle la a Filipi ka o do kpɛ a wie toriko poɔ ka ba laŋ zeŋ.

³²A gane zie na o naŋ da kanna la ŋa: “O da waa ŋa peroo ba naŋ taa gaa ne o koobo zie, aŋa pilee naŋ are neɛ naŋ ŋmaara o kɔɔloŋ niŋesogɔ gbilli lɛ, o da ba haa o noɔre.

³³Ba da eŋ O la vi poɔ a ba di O sɛrɛɛ ne yelmennoŋ. Aŋ na toɔ̃ manne a O saŋ noba yɛlɛ? Bonso, ba iri la o nyɔvore yi a teŋɛzu.”

³⁴A dɔɔ-varaa da soore la a Filipi, “Nembuo yɛlɛ la ka a Ŋmen-yelmanna ŋa da yele? O meŋɛ yɛlɛ la ka o da yele bee neɛ kaŋ yɛlɛ la?”

³⁵Lɛ la ka Filipi pãã da piili a manna a Ŋmen-yelmanna sɛgebo ŋa, a moɔle a Yeezu yelnoore ko o.

³⁶Ba naŋ da naŋ be a sobiriŋ gɛrɛ, ba da wa ta la koɔ̃ mine; ka a dɔɔ-varaa yeli, “Nyɛ, koɔ̃ la be kyɛ! Boŋ la na pigi n suobu deebo?”

³⁷[Ka Filipi yeli, “Fo na de la a suobu ka fõõ wa sage de a yɛlɛ ne fo poɔ zaa.” Ka a dɔɔ-varaa da leɛ yeli sɔge, “N deɛ la ka Yeezu Kirista la a Naaŋmen Bie.”]

³⁸O da eɛɛ la ka a toriko are ka ba zaa bayi sigi te kpɛ a koɔ̃ poɔ ka a Filipi ko o a suobu.

³⁹Ba naŋ da wa yi a koɔ̃ poɔ, a Daana Vooroŋ da de la a Filipi gaa ne ka a dɔɔ-varaa da ba la nyɛ o, kyɛ o pãã da de la o sori gɛrɛ ne popeɛloŋ.

⁴⁰Kyɛ a Filipi da nyɛ la o meŋɛ ka o be Azotu teŋɛ poɔ, kyɛ o naŋ da tɔlɔ a paaloŋ na poɔ, o da moɔlɔ la a yelnoore a tenne zaa poore a te ta a Sezaareya teŋɛ.