Read Southern Dagaare Uro 1 Bible Online

Uro 1 - Southern Dagaare bible

Uro 1

¹Maa Pɔɔl naŋ waa Yeezu Kirista tontonɔ, ba naŋ da boɔle ka N e apostolii, ka ba kaa-iri ka N moɔlɔ a Ŋmen-yelnoore.

²A yelnoore ŋa la ka Naaŋmen da daŋ tu a Ŋmen-yelmanneba zie a eŋ noɔre ka ba da sɛge eŋ a gansonne poɔ.

³A Ŋmen-yelnoore kyaare la a O Bidɔɔ naŋ da e Davil bale a nensaaloŋ poɔ,

⁴kyɛ ka a Vooroŋ Soŋ da wuli ka O waa la Naaŋmen Bie naŋ taa kpeɛ̃õ ne O naŋ leɛ-iri yi a kuuni poɔ. Ona la a Yeezu Kirista a te Daana.

⁵A Yeezu zie la ka te tu a nyɛ garaaseɛ a leɛ apostoliimine, ka ka te na taa a yeldeebo sagebo yɛlɛ wa ne a Nemboore-yobo[1] zie a O yuori zuiŋ,

⁶a pãã de ne yɛnee ba naŋ da boɔle ka yɛ wa leɛ a Yeezu soobo.

⁷A yɛ banaŋ zaa naŋ waa Naaŋmen poyɛŋ noba a be Urom teŋɛ poɔ, ka O da boɔle ka yɛ wa leɛ nensonne: Ka a te Saa Naaŋmen ane a te Daana Yeezu Kirista garaaseɛ ane maaroŋ be a yɛ zie.

⁸A dɛndɛŋ soba, N tu la a Yeezu Kirista zie a puoro Naaŋmen bareka korɔ yɛ zaa, bonso, ba ŋmɛ la a yɛ yeldeebo yɛlɛ yaare a tendaa zaa.

⁹Bonso, a Naaŋmen N naŋ tonɔ korɔ ne n poɔ zaa, a moɔlɔ a O Bidɔɔ yelnoore la n dansedire ka N daŋ ba inni ka N teɛre yɛ yɛlɛ wagre zaa n puoruu poɔ.

¹⁰N maŋ sɔrɔ la Naaŋmen, ka ka a naŋ wa e O poboɔbo ka N toɔ̃ wa yɛ zie.

¹¹Bonso, N taa la vɔlaa ka N nyɛ yɛ, ka ka N na toɔ̃ ko yɛ a Vooroŋ Soŋ kyɔɔtaare mine ka yɛ na taa faŋ,

¹²bee ka te na toɔ̃ teɛ taa yeldeebo.

¹³N yɔɔmine ane n yɔɔpuuli, N boɔrɔ la ka yɛ baŋ ka gbɛɛ yaga ka N da boɔrɔ ka N wa yɛ zie (kyɛ ka a naŋ wa tɔ zenɛ ka yɛlɛ naŋ pigi n sori) a wa e ka yɛ mine leɛ yeldeebo deme aŋa N naŋ da e ka a Nemboore-yobo noba mine leɛ yeldeebo deme.

¹⁴N taa la feroo toma a banaŋ niŋe naŋ yuo ane banaŋ niŋe naŋ ba yuo zie, a taa feroo toma a yɛmbaŋnema ane dambolo zie.

¹⁵A lɛnso ka N kyerɛ ka N moɔle a Ŋmen-yelnoore ko yɛ banaŋ meŋ naŋ be a Urom teŋɛ poɔ.

¹⁶N ba zoro a Ŋmen-yelnoore vi, bonso, o waa la Naaŋmen kpeɛ̃õ a ko neɛzaa naŋ taa yeldeebo ka o nyɛ faabo. A Gyuumine la a danweɛ deme, kyɛ ka a Giriki noba meŋ pãã tu.

¹⁷Bonso a Ŋmen-yelnoore poɔŋ la ka Naaŋmen maŋ iri O mennoŋ wuli a yi yeldeebo piiluu te ta yeldeebo baaraa; aŋa ba naŋ da sɛge a lɛ, “Soba na zaa naŋ e nemmeŋɛ, na taa la o nyɔvore ne yeldeebo.”

¹⁸A Naaŋmen supuriyaaraa sãã la sazu sigre waana ka O zɔɔ ne banaŋ zaa naŋ de ba yelfa-yɛlɛ ane potuoloŋ pigre ne a yelmeŋɛ.

¹⁹Bonso, bonna neɛ naŋ na toɔ̃ baŋ kyaare ne Naaŋmen sãã la weliweli ba zie, bonso, Naaŋmen iri a la wuli ba.

²⁰A yi a tendaa piiluu saŋ zaa, Naaŋmen kpeɛ̃õ naŋ ba taa baaroo ane O Naaŋmennoŋ waaloŋ, aneazaa ka nimiri koŋ baŋ nyɛ a, kyaane ko ba la a yi O bommaale zie ka ba baŋ a tɛgɛ. Azuiŋ ba ba taa gaafara zaa na tere;

²¹aneazaa ka ba da baŋ la Naaŋmen kyɛ ba da ba eŋnɛ O aŋa Naaŋmen bee a puori O bareka, kyɛ ba da leɛ taa la teɛroŋ laama, ka a ba dambol-yɛŋ da leɛ ligi.

²²Ba naŋ de bamenne ka ba waa la yɛmbaŋnema, ba da leɛ la dambolo;

²³a de puubu naŋ seŋ ka ba de ko Naaŋmen naŋ koŋ baŋ kpi a korɔ tebɛ naŋ yi ne nensaala naŋ na baŋ kpi, bee bon-ɛgre, bee doŋgbɛɛ anaare, bee bonvuuri.

²⁴Azuiŋ Naaŋmen da bare ba la ko ba sukyie vɔlfaare, ka ba erɛ kɔkɔr-yɛlɛ ne bamenne enne,

²⁵bonso, ba da de la a yelmeŋɛ naŋ kyaare Naaŋmen a tɛge ne zirii kyɛ puoro, a tonɔ korɔ bon-iraa kyɛ bare a Boma Ire, Ona la taa puubu tegitegilɛ! Ameena.[2]

²⁶A ŋaa zuiŋ, Naaŋmen da bare ba la ko ba vɔlfa-dɛgɛ. A ba pɔgeba da de la dɔɔ ane pɔge sɛŋgaabo yɛlɛ naŋ tu sori tɛge ne sɛŋgaabo yɛlɛ naŋ ba tu sori.

²⁷A lɛ ne o zu meŋ ka a dɔbɔ da bare dɔɔ ne pɔge sɛŋgaabo yɛlɛ naŋ tu sori, kyɛ kpimare dɔɔ ne dɔɔ bɔtaa eŋɛ, a erɛ yɛlɛ naŋ e vi yaga ane ba dɔɔ taaba, a lɛ zuiŋ ba da nyɛ la dɔgroŋ na ba yelfaare naŋ bɔ ko ba.

²⁸Kyɛ ba naŋ da ba nyɛ ka a seŋɛɛ la ka ba ko Naaŋmen O gyeremɛ zuiŋ, a Naaŋmen da bare ba la ka ba taa ba teɛre faare a erɛ yelfaare naŋ ba seŋ ka ba e.

²⁹Ba da paale ne la potuoloŋ boorɔ zaa, faaloŋ, bombɔ-gaŋne ane yosãã. Ba da paale ne la nyuuri, neŋko, zɔɔzɔɔ-yɛlɛ, bɛllɛ, nyaayɛlɛ ane pozu,

³⁰yosaanema, noba naŋ kyiire Naaŋmen, a e zontooreba, a erɛ zukpeɛ-yɛlɛ, a wullo bamenne, a waa noba naŋ boɔrɔ yelfaare sobie, a waa noba naŋ ba sagra ba dɔgrebɔ nɔɛ,

³¹a waa dambolo, a waa noba naŋ ba taa yeldeebo, a waa noba sukyie naŋ dare, kyɛ ka ba taa nimikuoni.

³²Ba baŋ la a Naaŋmen bege, a baŋ ka noba na naŋ erɛ a yɛlɛ ama seŋ ne la kũũ; kyɛ ba da ba erɛ a yelfaare ama yoŋ, kyɛ ba gba da maŋ bokpɛ la noba naŋ erɛ a yɛlɛ ama.