Read Southern Dagaare Uro 10 Bible Online

Uro 10 - Southern Dagaare bible

Uro 10

¹N yɔɔmine ane n yɔɔpuuli, n poboɔbo ane puoruu N naŋ puoro korɔ Naaŋmen kyaare ne a Gyuumine la, ka ba nyɛ faabo.

²N na baŋ di la ba danseɛ ka ba sereŋ boɔrɔ la Naaŋmen ne ba poɔ zaa, kyɛ ba niŋe ba kyaane.

³Bonso, ba naŋ da be babammo poɔ a kyaare ne a mennoŋ na naŋ yi Naaŋmen zie, a kyɛ da boɔrɔ ka ba biŋ bamenne mennoŋ, ba da ba sigri bamenne ko a Naaŋmen mennoŋ.

⁴Bonso, a Kirista la a bege baaroo zie ka ka mennoŋ na bebe ko neɛzaa naŋ sage de.

⁵Moozul sɛgɛɛ la a kyaare ne a mennoŋ na naŋ yi a bege poɔ, ka, “a soba na naŋ erɛ a yɛlɛ na tuuro a la o nyɔvore poɔ.”

⁶Kyɛ a mennoŋ na naŋ yi yeldeebo poɔ yelee la, “Ta yeli fo sukyiri poɔ, ‘Aŋ la na do tenvelaa[14] poɔ?’ ” (a te taa a Kirista sigi wa ne).

⁷“Bee, ‘Aŋ la na sigi a bogzuluŋ naŋ ba taa baaroo poɔ?’ ” (a te taa a Kirista wa yi ne a kuuni poɔ).

⁸Kyɛ a bege yeli ka boŋ? “A yelbiri peɛle fo la, o be la fo nɔgbɛmɛŋ ane fo sukyiri poɔ” (a lɛ tɛgɛ la, a yeldeebo yelbiri na te naŋ moɔlɔ);

⁹bonso, ka fõõ yeli ne fo noɔre ka Yeezu e la Daana kyɛ sage de ne fo sukyiri ka Naaŋmen da eɛɛ la ka O leɛ-iri kuuni poɔ, fo na nyɛ la faabo.

¹⁰Bonso, neɛ maŋ sage de la ne o sukyiri a leɛ nemmeŋɛ, ka neɛ meŋ yeli ne o noɔre a nyɛ faabo.

¹¹A gansoŋ yelee la, “Neɛzaa kyebe naŋ na sage de O yɛlɛ kyɛ ka vi di o.”

¹²Bonso, tɛɛtɛɛ ba kye Gyuumine ane a Giriki noba sogɔŋ; a Daana ne O zu la e ba zaa Daana, a korɔ neɛzaa naŋ sɔre bon yi O zie.

¹³Bonso, “Soba na zaa naŋ boɔle a Daana yuori na nyɛ la faabo.”

¹⁴Kyɛ wola ka ba na boɔle soba na ba naŋ ba sage de yuori? Ka wola ka ba na e sage de neɛ na ba naŋ daŋ ba woŋ O yɛlɛ? Ka wola ka ba na e woŋ O yɛlɛ ka neɛ ba kyebe a na moɔle a O yɛlɛ?

¹⁵Kyɛ wola ka ba na moɔle O yɛlɛ ka ba naŋ ba toŋ ba? Aŋa ba naŋ da sɛge lɛ, “Nyɛ a noba naŋ moɔlɔ a Ŋmen-yelnoore waabo naŋ veɛlɛ lɛ!”

¹⁶Kyɛ ba zaa naane da sage de a Ŋmen-yelnoore; bonso, Azaaya yelee la, “Daana, nembuo la da sage de a te duoro?”

¹⁷Azuiŋ, yeldeebo maŋ yi la bonna ba naŋ woŋ zie, ka bonna ba naŋ woŋ meŋ yi a Kirista yelbiri poɔ.

¹⁸Kyɛ N soorɔ la, ba mɔɔ ba woŋ a be? Serɛzaa ba woŋee la; bonso: “A ba kɔkɔre yi ta la a tendaa zaa, ka ba yelbie ta a andonɛɛ lamboe zaa.”

¹⁹N laboreŋ soorɔ la, a Izerayɛl biiri ba baŋ a tɛgɛ be? Moozul da dɛndɛŋ yelee la: “N na e la ka yɛ taa nyuuri ne a noba na naŋ ba e paaloŋ; a paaloŋ na deme naŋ waa dambolo ka N na de e ka yɛ suuri iri.”

²⁰Lɛ la ka Azaaya da ba zo dabeɛ̃ kyɛ yeli: “Banaŋ naŋ da ba bɔ ma la nyɛ ma; N de la N meŋɛ wuli a banaŋ naŋ ba soore N yɛlɛ.”

²¹Kyɛ a kyaare ne a Izerayɛl biiri yɛlɛ, O yelee la, “A bebi-gbuli zaa ka N teɛ N nuuri a kyaare ne noba naŋ zagre N yɛlɛ kyɛ leɛ ba kpaare ko ma.”