Read Southern Dagaare Uro 11 Bible Online

Uro 11 - Southern Dagaare bible

Uro 11

¹N pãã soorɔ la, Naaŋmen mɔɔ gyɛ la a O noba bare be? A koŋ baŋ waa lɛ togitogi! Maa meŋɛ waa la Izerayɛl bie, a yi Aboraham boorɔ poɔ, a waa Bɛŋgyamen bale neɛ.

²Naaŋmen ba gyɛ a O noba O naŋ da daŋ baŋ bare. Yɛ ba baŋ lɛ a gansoŋ naŋ da yeli a Elaagya yɛlɛ be, a lɛ o naŋ da sɔre ka Naaŋmen iri O nimiri eŋ a Izerayɛl biiri?

³“Daana, ba ko la a fo Ŋmen-yelmanneba, ba ŋmore la a fo bagmaalkubo bare; Maa yoŋ la kyɛre, kyɛ ka ba naŋ boɔrɔ ka ba iri n nyɔvore.”

⁴Kyɛ wola ka a Naaŋmen da yeli sɔge o? “N taa la noba turi ayopoĩ naŋ ba gbi dumo a Baal niŋesogɔ.”

⁵A lɛ meŋ la ka a waa a zenɛ bebiri, a noba belaa naŋ bebe la ka Naaŋmen kaa-iri a O garaaseɛ zuiŋ.

⁶Kyɛ ka anaŋ wa e garaaseɛ zuiŋ la ka O kaa-iri ba, a koŋ la e ka ba toma zuiŋ la, ka lɛ naane, garaaseɛ koŋ la waa garaaseɛ.

⁷Ka boŋ pãã la? A Izerayɛl biiri da kɔŋ la bonna ba naŋ da boɔrɔ. A Naaŋmen neŋkaa-irri da nyɛ a la, kyɛ banaŋ naŋ kyɛre na da darɛɛ la,

⁸aŋa ba naŋ da sɛge lɛ: “Naaŋmen da eɛɛ la ka ba waa maaroŋ ba teɛroŋ poɔ, a ko ba nimie naŋ koŋ baŋ nyɛ ane tobo naŋ ba wono, a wa tɔ a zenɛ bebiri.”

⁹Ka Davil yeli: “Vɛŋ ka ba diibu tabole leɛ bɛraa a nyɔge ba taa, a e ba gbɛŋmɛ-le bon ane ba dɔgroo zie.

¹⁰Vɛŋ ka ba nimie sɔɔ ka ba ta nyɛrɛ, kyɛ ka ba woore dɔgle ba zu a e ka ba kɔɔ-guri tegitegilɛ.”

¹¹Lɛnso N soorɔ la, ba mɔɔ ŋmɛ la gbɛre a na le be? A koŋ baŋ e a lɛ! Kyɛ a yi a ba gbɛŋmɛ eŋɛŋ la ka faabo wa a Nemboore-yobo[15] zie, ka ka lɛ e ka nyuuri kpɛ a Izerayɛl biiri.

¹²Pampana ŋa, ka a ba gbɛre ŋmeɛbo wa ko a andonɛɛ bondaanoŋ, ka a ba leebu ko a Nemboore-yobo bondaanoŋ, wola ka a na waa ka ba zaa wa poɔ a faabo poɔ!

¹³Pampana ŋa, N yele la yɛlɛ korɔ yɛnee Nemboore-yobo. A naŋ pãã waa ka N waa la a yɛ Nemboore-yobo apostolii, N ire la a n tonnoɔre ŋa yuori,

¹⁴ka ka N e ka n meŋɛ noba nyuuri iri, ka a lɛ e ka N toɔ̃ faa ba mine.

¹⁵Bonso, ka a ba gyɛbaroo wa e a andonɛɛ leɛ maale taa, boŋ ka a ba sagedeebo na waa ka kuuni poɔ leɛ-iruu naane!

¹⁶Ka a zɔŋ-buuri mine ba naŋ de tere kyɔɔtaa ka a waa wɔŋ dɛndɛŋ naŋ e soŋ, ka lɛ a zɔŋ-buuri zaa waa la soŋ; ka a teɛ nyagre wa soma, a lɛ eŋ, a ulli meŋ na soma la.

¹⁷Kyɛ ka ba naŋ da kɔɔre a teɛ ulli[16] mine bare kyɛ ka ba de yɛnee naŋ waa moɔ poɔ kããteere ulli naŋ tore yi wa tɔnne ne a zie, ka yɛ meŋ nyu a kããteɛ ŋa nyaga naŋ nyɛ maaloo koɔ̃,

¹⁸yɛ ta wullo yɛmenne aŋa yɛ seɛ la a ulli na ba naŋ kɔɔre bare. Ka yɛnee wa wullo yɛmenne, yɛ leɛ baŋ ka yɛnee naane nyɔge a nyagre taa, kyɛ a nyagre la nyɔge yɛ taa.

¹⁹Yɛ na yeli la, “Ba da kɔɔre la ulli bare kyɛ na de te tɔnne ne.”

²⁰A lɛ waa la yelmeŋɛ. Ba da kɔɔre a la bare, ba naŋ da ba sage de zuiŋ, kyɛ yɛnee are la yeldeebo yoŋ zuiŋ. Azuiŋ yɛ ta wullo yɛmenne, kyɛ yɛ taa Naaŋmen dabeɛ̃ zoobu.

²¹Ka Naaŋmen da ba bare a teɛ meŋɛ ulli, kaapɔge O koŋ bare yɛ meŋ.

²²Yɛ pãã leɛ kaa a Naaŋmen nimimaaroŋ ane O nimitoloŋ yɛlɛ. Naaŋmen taa la nimitoloŋ kyaare ne a banaŋ naŋ e yelbieri, kyɛ leɛ O nimimaaroŋ kyaare yɛ, ka yɛnee naŋ wa kyɛnɛ be a O nimimaaroŋ poɔ; ka lɛ naane, O na kyɛ la yɛ meŋ ŋmaa bare.

²³Haali a banaŋ naŋ waa a Izerayɛl noba, ka ba naŋ ba wa kpãã toori be a ba yeldeebo bataabo poɔ, ba na leɛ de ba la wa tɔnne eŋ. Bonso, Naaŋmen taa la a kpeɛ̃õ ka O la leɛ de ba tɔnne.

²⁴Ka ba naŋ da kyɛ yɛ ŋmaa yi moɔ poɔ kããteɛ eŋɛ a taa yɛ wa tɔnne kããteɛ ba naŋ sɛle eŋɛ, wola ka a koŋ e mɔlɔ ka ba leɛ de a kããteɛ meŋɛ ulli a wa tɔnne a menne kããteɛ eŋɛ.

²⁵N yɔɔmine ane n yɔɔpuuli, ka yɛ ta wa yeli ka yɛ waa la yɛmbaŋnema gaŋ lɛ a naŋ da seŋ ka yɛ waa, N boɔrɔ la ka yɛ baŋ a Naaŋmen yelsɔglaa ŋa tɛgɛ. Sukyie daroo wa la a Izerayɛl biiri mine sukyie poɔ a na te ta saŋ na a Nemboore-yobo zaa naŋ na wa sage de.

²⁶A lɛ ka a Izerayɛl noba zaa na nyɛ faabo; aŋa ba naŋ da sɛge lɛ: “A Zaayɔn teŋɛ poɔ la ka a Faara na yi wa; O na wa digi la Naaŋmen ba-emmo yi a Gyekɔb bale poɔ.”

²⁷“A N nɔ-eŋnaa N naŋ eŋ ne ba la ŋa, ka maa wa de a ba yelbebe bare.”

²⁸Ba e la Naaŋmen dɔndɔnne a yɛ zuiŋ, a kyaara ne a Ŋmen-yelnoore. Kyɛ a kyaare ne a neŋkaa-irri, ba waa la Naaŋmen poyɛŋ noba, a ba sããkommine zuiŋ;

²⁹bonso, Naaŋmen kyɔɔtaare ane O boɔlaa ba taa leɛrebaroo.

³⁰Aŋa lɛ yɛ naŋ da zagre Naaŋmen noɔre kyɛ ka pampana ka yɛ nyɛ a O nyonono a ba noɔre zagroo zuiŋ,

³¹lɛ la ka pampana ŋa ka ba waa nɔzagreba; ka ka aŋa ba naŋ da zo yɛ nyonono lɛ, ka ba na zo ba meŋ nyonono.

³²Bonso, Naaŋmen nyɔge la nensaalba zaa pɔge noɔre zagroo poɔ ka ka O toɔ̃ zo ba zaa nyonono.

³³Nyɛ a Naaŋmen bondaanoŋ, yɛŋ ane a O bammo naŋ waa zuluŋ seŋ lɛ! A O sɛrɛɛdiibu ba taa mannoo, ka a O sobie ba taa peɛroo!

³⁴“Nembuo la baŋ a Daana poteɛrɛ? Bee nembuo la yele yɛlɛ wullo a Daana?”

³⁵“Bee nembuo la ko a Daana kyɔɔtaa, a na la leɛ nyɛ kyɔɔtaa yi O zie?”

³⁶Bonso, a O zie la ka boma zaa yi, a O zie la ka boma zaa tu kyɛ wa, a O zie la ka a boma zaa be. Ona la seŋ ne puubu tegitegilɛ. Ameena.[17]