Read Southern Dagaare Uro 12 Bible Online

Uro 12 - Southern Dagaare bible

Uro 12

¹Azuiŋ n yɔɔmine ane n yɔɔpuuli, N sɔrɔ yɛ la ne a Naaŋmen nyonono zoobu, ka yɛ de yɛ enne ka a e kyɔɔta-voɛ, naŋ waa soŋ, ka Naaŋmen na sage de. A ŋaa la a yɛ seeloŋ poɔ Naaŋmen puoruu.

²Yɛ ta tuuro a teŋɛzu yeltuuri, kyɛ yɛ leɛ yɛ eebo a yi a yɛmpaalaa yɛ naŋ nyɛ yi Naaŋmen zie, ka yɛ na toɔ̃ baŋ bon naŋ e Naaŋmen poboɔbo; bon naŋ soma a seŋ ne deebo kyɛ ba taa faaloŋ zaa.

³A yi a garaaseɛ ba naŋ ko ma zuiŋ, N yele korɔ la neɛzaa naŋ be yɛ poɔ, ka o ta teɛre ka o meŋɛ do gaŋ la lɛ a naŋ da seŋ ka o teɛre. Kyɛ yɛ kanzaa maŋ sigre o meŋɛ kyɛ di o meŋɛ sɛrɛɛ a seŋ lɛ Naaŋmen naŋ ko yɛ yeni yeni zaa yeldeebo a seŋ lɛ.

⁴Aŋa enda-yeni naŋ maŋ taa nandaare yaga lɛ, kyɛ a nandaare zaa naane maŋ tonɔ toŋ yeni.

⁵Azuiŋ, a tenee naŋ waa yaga, waa la enda-yeni a Kirista eŋɛ, ka a te yeni yeni zaa lantaa waa taa noba.

⁶Te taa la kyɔɔta-tɛɛtɛɛ a seŋ lɛ ba naŋ ko te a garaaseɛ: ka Ŋmen-yelmanna yelyelii la, a soba erɛ seŋ a o yeldeebo;

⁷ka tonteroo la, a soba tonɔ a lɛ; ka wuluu la a soba o wullo noba;

⁸ka fõõ wa e neɛ naŋ yele yɛlɛ teɛrɛ noba, yele teɛrɛ noba; ka noba sommo la, soŋnɔ noba ne nɔmmo; ka fõõ waa wederɛ, erɛ a lɛ ne fo nimizeɛ zaa; ka fõõ wa e nembaaloŋ zoro, erɛ lɛ ne popeɛloŋ.

⁹Yɛ vɛŋ ka yɛ nɔmmo waa meŋɛ; yɛ kyiiri faaloŋ, kyɛ kpimare bon naŋ soma eŋɛ;

¹⁰yɛ nɔnɔ taa ne yɔɔloŋ nɔmmo; yɛ vɛŋ ka yɛ kanzaa noba emmo maŋ zuo o tɔsoba deni.

¹¹Yɛ vɛŋ ka yɛ enne kyerɛ ne a toma; yɛ taa nimizeɛ ne a seeloŋ poɔ yɛlɛ, a tonɔ a Daana toma.

¹²Yɛ kyellɛ ne teɛretɔroo,[18] a taa kannyiri yɛ dɔgɛɛ diibu poɔ, kyɛ kpimare puoro tegitegilɛ.

¹³Yɛ maŋ kyeɛre boma soŋ ne a nensonne a naŋ wono; a derɛ saama, saanoŋ.

¹⁴Yɛ maala banaŋ naŋ dɔgrɔ yɛ, yɛ maala ba kyɛ ta kaara eŋnɛ ba.

¹⁵Yɛ laŋ kyellɛ ne banaŋ naŋ kyellɛ, a laŋ kono ne banaŋ naŋ kono.

¹⁶Yɛ taa noɔre yeni ne taa, a ta erɛ pɔloo, kyɛ laŋna ne banaŋ naŋ ba e yuori noba, a ta wullo ka yɛ baŋ la yɛŋ zuo lɛ yɛ naŋ baŋ.

¹⁷Yɛ ta de faaloŋ yɔɔ ne neɛzaa naŋ e yɛ faaloŋ; kyɛ yɛ maŋ moɔrɔ ka yɛ erɛ yɛlɛ naŋ soma noba zaa zie.

¹⁸Ka anaŋ na toɔ̃ nyɛ eebo yɛ zie, yɛ taa emmaaroŋ ne a noba zaa.

¹⁹N poyɛŋ noba, yɛ daŋ ta wa derɛ yɛmenne zɔɔre a zɔɔrɔ, kyɛ yɛ maŋ bare vuo ko a Naaŋmen supuriyaaraa; bonso, ba sɛgɛɛ la, “Maa la so san-yaabo, N na yaa la a sane, a Daana la yeli.”

²⁰Ai, “Ka kɔŋ wa kpɛ fo dɔndɔnne, ko ba bondirii ka ba di; ka kɔŋnyuuri wa kpɛ ba, ko ba koɔ̃ ka ba nyu. Bonso, ka fooŋ wa erɛ a lɛ, fo na gbɔgrɔ la vũũsaalbie dɔglɔ ba zuriŋ.”[19]

²¹Yɛ ta vɛŋ ka faaloŋ toɔ̃ yɛ, kyɛ yɛ de yelsoŋ toɔ̃ ne faaloŋ.