Read Southern Dagaare Uro 15 Bible Online

Uro 15 - Southern Dagaare bible

Uro 15

¹Te banaŋ naŋ taa faŋ yeldeebo poɔ seŋ ka te dire kannyiri ne a banaŋ naŋ ba taa faŋ yeldeebo poɔ ne a ba bambaaloŋ, kyɛ ta boɔrɔ ka te erɛ yɛlɛ naŋ pɛllɛ temenne poore yoŋ.

²A ferɛɛ la ka te kanzaa maŋ erɛ yɛlɛ naŋ na pɛle te tɔsoba poɔ, ka ka a te teɛre soŋ e ka te teɛ ba ka ba baara.

³Bonso, a Kirista da ba pɛle O meŋɛ poɔ; kyɛ aŋa ba naŋ da sɛge lɛ, “A zoma na a banaŋ naŋ toorɔ yɛ, waa la N zoma.”

⁴Bonso, a yɛlɛ na zaa ba naŋ da sɛge a dakoroŋ saŋ, ba da sɛge a la ka a wuli te, ka ka a te kannyiri diibu ane yelteɛbo naŋ yi a gansoŋ poɔ na e ka te taa teɛretɔroo.[20]

⁵Ka a kannyiri ane a yelteɛbo Naaŋmen soŋ yɛ ka yɛ laŋkpeɛrɛ ne yɛ taaba ne yelwontaa, a seŋ a Kirista Yeezu naŋ boɔrɔ lɛ,

⁶ka ka yɛ na lantaa ne kɔkɔyeni a danna Naaŋmen a te Daana Yeezu Kirista Saa.

⁷Azuiŋ, yɛ derɛ taa saanoŋ aŋa lɛ a Kirista naŋ da de yɛ saanoŋ ka ka Naaŋmen na nyɛ puubu.

⁸Bonso, N yele korɔ yɛ la ka a Kirista leɛ la a banaŋ ba naŋ da iri ba dɛgre tontonɔ, a are a Naaŋmen yelmennoŋ gbɛbogriŋ ka ka O tu a nɔɛ ba naŋ da eŋ ko a sããkommine,

⁹kyɛ e ka a Nemboore-yobo[21] toɔ̃ iri Naaŋmen yuori a O nembaalonzoe zuiŋ. A ŋa ba naŋ da sɛge lɛ: “Azuiŋ N na moɔle la fo yɛlɛ a Nemboore-yobo poɔ, kyɛ yieli dannoo yiele iri fo yuori.”

¹⁰Ka O laboreŋ yeli: “Yɛnee Nemboore-yobo, yɛ kyellɛ ne a O noba.”

¹¹Kyɛ la maaleŋ yeli: “Yɛ danna a Daana, yɛnee a Nemboore-yobo zaa, kyɛ vɛŋ ka a noba zaa danna O”;

¹²Azaaya laboreŋ yelee la: “A Gyɛse bale neɛ na wa la, a soba na naŋ iri ka O di naaloŋ a Nemboore-yobo zu; O eŋɛŋ la ka a Nemboore-yobo na taa teɛretɔroo.”

¹³Ka a teɛretɔroo Naaŋmen paale yɛ ne popeɛloŋ ane emmaaroŋ a yɛ yeldeebo poɔ, ka ka yɛ na paale ne teɛretɔroo a Vooroŋ Soŋ kpeɛ̃õ eŋɛ.

¹⁴N yɔɔmine ane n yɔɔpuuli, maa meŋɛ ba taa bonnoo a kyaare ne yɛ, ka yɛ paale ne la yelveɛle, a paale ne yelbammo zaa kyɛ maŋ toɔ̃ wullo taa.

¹⁵Kyɛ anealɛzaa, yɛlɛ mine zuiŋ N da sɛge ko yɛ la a ba zoro dabeɛ̃ ka N leɛ-teɛre yɛ, a garaaseɛ Naaŋmen naŋ da ko ma zuiŋ,

¹⁶ka N waa a Kirista Yeezu tontonɔ a Nemboore-yobo zie. N poɔ la a Ŋmen-yelnoore toma poɔ, ka ka lɛ e ka Naaŋmen sage de a Nemboore-yobo kyɔɔtaare a Vooroŋ Soŋ naŋ pɛge ka a yi.

¹⁷A Kirista Yeezu eŋɛ, N pãã taa la sori ka N erɛ pɔloo ne a n toma n naŋ tonɔ korɔ Naaŋmen.

¹⁸Bonso, N koŋ sage yeli yelzaa ka a yɛlɛ na yoŋ a Kirista naŋ de ma toŋ ne naane, ka ka N toɔ̃ wuli a Nemboore-yobo ka ba e noba naŋ sagra noɔre ba yelbie ane ba yel-erre poɔ.

¹⁹N da moɔle la a Kirista yelnoore zaa a yi Gyɛruzɛlɛm a te ta Elarekum a tu a kpeɛ̃õ naŋ be a yelwulii ane nɔmaa toma eŋɛ ane a Naaŋmen Vooroŋ kpeɛ̃õ eŋɛ.

²⁰A lɛ zuiŋ, N deɛ la ka a e n nimizi-yeli ka N moɔle a Ŋmen-yelnoore ziiri na ba naŋ naŋ ba moɔle a Kirista yɛlɛ, ka ka N ta wa mɛ dɔgle neɛ kaŋ yiri pare zu.

²¹Kyɛ aŋa ba naŋ da sɛge lɛ: “A banaŋ ba naŋ daŋ ba yeli O yɛlɛ ko ba na nyɛrɛ la, ka banaŋ naŋ daŋ ba woŋ O yɛlɛ na baŋ a tɛgɛ.”

²²A ŋaa la so ka N da ba maŋ nyɛrɛ a vuo a na wa yɛ zie.

²³Kyɛ pampana ŋa, zie zaa naŋ ba la kyebe ko ma a paaloŋ ŋa poɔ zuiŋ, N boɔrɔ la ka N wa yɛ zie aŋa N naŋ da teɛrɛ lɛ yuomo yaga naŋ tɔle,

²⁴ka maa wa gaa Sepeen. Bonso, N taa la teɛretɔroo ka N nyɛ yɛ ka maa wa gɛrɛ, ka yɛ soŋ ma a n sori gaabo poɔ, ka maa wa e beri awola mine yɛ zie.

²⁵Pampana ŋa eŋ, N gɛrɛ la Gyɛruzɛlɛm ka N te soŋ a nensonne;

²⁶bonso, Masedoniya ane Akaya teŋɛ deme poore pɛlɛɛ la ka ba tere sommo soŋ ne a nembaalba naŋ be a Gyɛruzɛlɛm nensonne poɔ.

²⁷Ba poore da pɛlɛɛ la ka ba e a yeli ŋa, kyɛ serɛzaa, a e la ba feroo toma ka ba e a yeli ŋa, bonso, ka a Nemboore-yobo wa di a Gyuumine seeloŋ maaloo tɔnɔ, ka lɛ, a seŋ ka ba soŋ a Gyuumine ne boma ba naŋ taa.

²⁸Azuiŋ ka maa wa toŋ a toma ŋa baare, a taa a boma na ba naŋ kyeɛre te ko ba, N na tu la yɛ zie kyɛ tɔle gaa Sepeen;

²⁹kyɛ N baŋ ka ka maa wa wa yɛ zie N na wa ne la a Kirista maaloo zaa.

³⁰N yɔɔmine ane n yɔɔpuuli, N sɔrɔ yɛ la a te Daana Yeezu Kirista yuori eŋɛ ane a Vooroŋ Soŋ nɔmmo ka yɛ zaa laŋ ne ma puoro Naaŋmen nimizeɛ zaa korɔ ma,

³¹ka O na faa ma yi a banaŋ naŋ ba sage de a Yeezu yɛlɛ a be a Gyudiya paaloŋ poɔ, kyɛ e ka n toma e bon a Gyɛruzɛlɛm nensonne naŋ na sage de.

³²Ka a naŋ wa e Naaŋmen poboɔbo, ka N toɔ̃ wa yɛ zie ne popeɛloŋ a wa nyɛ pɛnnoo yɛ zie.

³³Ka a emmaaroŋ Naaŋmen be yɛ zaa zie. Ameena.[22]