Read Southern Dagaare Uro 16 Bible Online

Uro 16 - Southern Dagaare bible

Uro 16

¹N korɔ la te yɔɔpuulee Feebe naŋ waa a Senkereya puoruu laŋne diikin garebanyɛ,

²ka ka yɛ tuori de o a Daana eŋɛ, a ŋa lɛ a naŋ seŋ ka a nensonne erɛ korɔ taa. Yɛ soŋ o yeli na zaa poɔ o naŋ na boɔrɔ yɛ sommo. Bonso, o waa la neɛ naŋ soŋ noba yaga ane maa meŋɛ meŋ gba.

³Yɛ puori Piriska ane Akiila ko ma, ba waa la noba naŋ laŋ ne ma tonɔ a Kirista Yeezu toma,

⁴kyɛ waa noba naŋ da woŋ tuo yaga N nyɔvore faabo zuiŋ. Bana yoŋ naane ka N puoro bareka, kyɛ N puoro la a Nemboore-yobo[23] puoruu laŋne deme meŋ zaa bareka.

⁵Yɛ puori a puoruu laŋne deme naŋ be a ba yie poɔ meŋ ko ma. Yɛ puori n poyɛŋ neɛ Epayetuse, ona la a nendɛndɛŋ naŋ da sage de a Kirista yɛlɛ a Ezeya paaloŋ poɔ.

⁶Yɛ puori Mareya naŋ da toŋ toma yaga yɛ poɔ.

⁷A puori Andironiku ane Gyuniya, naŋ waa n dɔgrebɔ, a da laŋ ne ma be a nempagdie poɔ. Ba waa la noba naŋ taa yuori a apostoliimine poɔ, a da daŋ ma leɛ Kiristabiiri.

⁸Yɛ puori Ampileatu naŋ waa n poyɛŋ neɛ a Daana eŋɛ.

⁹Yɛ puori Urebaanu, naŋ waa te tontontɔ a Kirista toma poɔ, kyɛ puori n poyɛŋ neɛ Setaaki meŋ ko ma.

¹⁰Yɛ puori Apelese ko ma, o waa la neɛ a Kirista naŋ de o yɛlɛ, a puori Aretɔbulu yideme meŋ ko ma.

¹¹Yɛ puori a n dɔgrɔ Hɛrɔdiyon, a puori a Daana noba banaŋ naŋ waa a Nasisu yideme.

¹²Yɛ puori Tirifiina ane Tirifosa naŋ waa a Daana tontonema. Yɛ puori a n poyɛŋ neɛ Pɛɛsi naŋ da toŋ toma yaga ko a Daana.

¹³Yɛ puori Urufuse, naŋ e neŋkaa-iraa a Daana eŋɛ, a puori a o ma N naŋ de ka o e n meŋ ma.

¹⁴Yɛ puori Asenkiritu, Felegon, Hɛmese, Patrobase, Hɛmaase ane a yɔɔmine ane a yɔɔpuuli banaŋ naŋ be ba zie.

¹⁵Yɛ puori Filologu, Gyuliya, Nɛruse ane o yɔɔpuulee ane Olimpase, ane a nensonne na zaa naŋ be ba zie.

¹⁶Yɛ puori taa ne puoruu naŋ soma. A Kirista puoruu laŋne deme zaa puoro yɛ la.

¹⁷N sɔrɔ yɛ la n yɔɔmine ane n yɔɔpuuli, ka yɛ baŋ ne a banaŋ naŋ maŋ waana ne wɛltaa kyɛ dɔɔnɔ noba suuri, a zɔɔrɔ ne a Naaŋmen yɛlɛ yɛ naŋ da zanne; yɛ tage yɛmenne yi ba zie.

¹⁸Bonso, a noba bama taaba ba tonɔ a te Daana Kirista toma, kyɛ bamenne vɔlaa yɛlɛ la ka ba tuuro, a maŋ de nɔnoɔ ane bɛllɛ sobie a bɛllɛ ne banaŋ naŋ ba kyele ba teɛroŋ poɔ.

¹⁹Noba zaa naŋ baŋ a yɛ noɔre tuubu zuiŋ, eɛɛ la ka n poɔ pɛllɛ ne yɛ. Azuiŋ n boɔrɔ la ka yɛ waa yɛmbaŋnema yelsonne eŋɛ kyɛ e noba naŋ ba erɛ yelfaare.

²⁰A koŋ la kɔɔre kyɛ ka a emmaaroŋ Naaŋmen ŋmore Setaana biŋ yɛ gbɛɛ puliŋ. Ka a te Daana Yeezu Kirista garaaseɛ be yɛ zie.

²¹A n tontontɔ Timoti puoro yɛ la; a lɛ ka Lusiyo, Gyason ane Sosipata meŋ naŋ waa n dɔgrebɔ puoro yɛ.

²²Maa Tɛtiyose a Pɔɔl naŋ yele a yɛlɛ ka n sɛgrɛ meŋ puoro yɛ la a Daana eŋɛ.

²³A Gayose naŋ de ma ane a puoruu laŋne deme saanoŋ puoro yɛ la. Erasetu naŋ waa a teŋkpoŋ libi-binne ane te yɔɔ Kaatuse puoro yɛ la. [

²⁴Ka a te Daana Yeezu Kirista garaaseɛ be yɛ zaa zie. Ameena.[24]]

²⁵Pampana ŋa, ka a Naaŋmen naŋ na toɔ̃ ko yɛ faŋ a seŋ a n yelnoore ane a Yeezu Kirista yɛlɛ moɔloo ane a yelsɔgle iri-wuluu ba naŋ da sɔgle bare yuomo yaga,

²⁶kyɛ ka pampana ka ba tu a Ŋmen-yelmanneba sɛgre eŋɛ yuo ka a sãã ka a Nemboore-yobo baŋ a Naaŋmen naŋ bebe tegitegilɛ nɔɛ a nyɛ yeldeebo.

²⁷Ka a Naaŋmen na yoŋ naŋ waa yɛŋ soba nyɛ puubu tegitegilɛ a Yeezu Kirista eŋɛ! Ameena.