Read Southern Dagaare Uro 8 Bible Online

Uro 8 - Southern Dagaare bible

Uro 8

¹Ŋaa, saanaa zaa ba la kyebe a ko banaŋ naŋ be a Kirista Yeezu poɔ.

²Bonso, a Vooroŋ Soŋ bege naŋ terɛ nyɔvore a Kirista Yeezu poɔ, faa yɛ la yi ne a yelbieri ane kũũ bege poɔ.

³Bonso, Naaŋmen da e la bonna a bege naŋ da kontoɔ̃ e, a nensaala bambaaloŋ naŋ da e ka o ba taa faŋ zuiŋ: A Naaŋmen da toŋ la O meŋɛ Bidɔɔ ka O wa de nensaala waaloŋ naŋ e yelbieri eŋɛ, kyɛ O naŋ da boɔrɔ ka O zɔɔ ne yelbieri, O da sãã la yelbieri yi nensaaloŋ eŋɛ,

⁴ka ka lɛ na e ka a bege yelboɔre zaa naŋ tori na tu a tuubu te zie, tenee naŋ ba erɛ yɛlɛ tuuro nensaaloŋ eŋɛ, kyɛ erɛ yɛlɛ tuuro a Vooroŋ Soŋ eŋɛ.

⁵Bonso, banaŋ naŋ taa ba nyɔvoɛ a tuuro nensaaloŋ eŋɛ, maŋ de la ba yɛŋ zaa eŋ nensaaloŋ boma eŋɛ, kyɛ banaŋ naŋ taa ba nyɔvoɛ a seŋ lɛ a Vooroŋ Soŋ naŋ boɔrɔ maŋ de la ba yɛŋ zaa eŋ a Vooroŋ Soŋ boma eŋɛ.

⁶Neɛ naŋ de o teɛroŋ zaa eŋ nensaaloŋ eŋɛ na kpi la; kyɛ neɛ naŋ de o teɛroŋ zaa eŋ a Vooroŋ Soŋ eŋɛ na taa la nyɔvore ane emmaaroŋ.

⁷A ŋaa zuiŋ, neɛ naŋ de o teɛroŋ zaa eŋ eŋgannoŋ eŋɛ kyiire la Naaŋmen, a ba sigre o meŋɛ a na sagra a Naaŋmen bege; serɛzaa o kontoɔ̃.

⁸Banaŋ naŋ be a eŋgannoŋ poɔ koŋ baŋ pɛle Naaŋmen poɔ.

⁹Kyɛ yɛnee ba be a nensaaloŋ poɔ, yɛ be la a Vooroŋ Soŋ poɔ, a Naaŋmen Vooroŋ naŋ be yɛ eŋɛŋ zuiŋ. Soba na zaa naŋ ba taa a Kirista Vooroŋ ba waa a Kirista neɛ.

¹⁰Kyɛ ka a Kirista wa be a yɛ zie, aneazaa ka a yɛ enne kpie la yelbieri zuiŋ, a Vooroŋ Soŋ e la nyɔvore mennoŋ zuiŋ.

¹¹Ka a soba na Vooroŋ naŋ da e ka a Yeezu leɛ-iri a kuuni poɔ wa be yɛ poɔ, a soba na naŋ da e ka a Kirista leɛ-iri a kuuni poɔ na tu la a O Vooroŋ Soŋ meŋ naŋ be yɛ zie a ko yɛ enne naŋ na baŋ kpi nyɔvore.

¹²A lɛ zuiŋ, n yɔɔmine ane n yɔɔpuuli, te e la sandiribe, kyɛ a ba e eŋgannoŋ sane la ka te di, a na taa te nyɔvoɛ lɛ eŋgannoŋ naŋ boɔrɔ;

¹³bonso, ka yɛnee taa yɛ nyɔvoɛ lɛnɛɛ eŋgannoŋ naŋ boɔrɔ, yɛ na kpi la; kyɛ ka yɛnee tu a Vooroŋ Soŋ zie a ko a eŋɛ yel-erre, yɛ na voorɔ la.

¹⁴Bonso, banaŋ zaa a Naaŋmen Vooroŋ naŋ de ba weɛ ka ba tuuro waa la a Naaŋmen biiri.

¹⁵Bonso, ba ba ko yɛ gbaŋgbaaloŋ vooroŋ a na e ka yɛ leɛ zoro dabeɛ̃; kyɛ ba ko yɛ la vooroŋ naŋ e ka yɛ leɛ Naaŋmen biiri. Ka tenee wa koŋ boɔle, “N ba! N Saa!”

¹⁶A Vooroŋ Soŋ na ne O zu la dire danseɛ ne te vooroŋ ka te waa la Naaŋmen biiri,

¹⁷ka tenee wa waa biiri, ka lɛ te waa la gbandiribe, a waa Naaŋmen gbandiribe, ka te ne a Kirista laŋ gbandiruŋ.[9] Serɛzaa, ka te ne a Kirista wa laŋ woŋ tuo, te ne O na la laŋ nyɛ la puubu.

¹⁸N nyɛɛ la ka a dɔgɛɛ te naŋ nyɛrɛ pampana ŋa koŋ baŋ manne ne a puubu na ba naŋ na wa iri wuli te.

¹⁹Bonso, a Naaŋmen bon-iri zaa kyɛllɛ ne la eŋkyere a bebiri na daare ba naŋ na iri a Naaŋmen biiri wuli;

²⁰bonso, ba da eɛɛ la ka a Naaŋmen bon-iri ba taa tɔnɔ. A da ba e ka a Naaŋmen bon-iri poboɔbo la, kyɛ a soba na naŋ da e a lɛ poboɔbo la ka o da e ne teɛretɔroo,[10]

²¹ka ka a Naaŋmen bon-iri meŋɛ na nyɛ faabo yi gbaŋgbaaloŋ naŋ na poɔ̃ poɔ, kyɛ na nyɛ a Naaŋmen biiri faabo puubu.

²²Te baŋ ka, a wa ta zenɛ, a Naaŋmen bon-iri zaa kono hiine la aŋa pɔge poɔ naŋ beɛrɛ bidɔge poɔ;

²³kyɛ a Naaŋmen bon-iri yoŋ naane kono, kyɛ tenee meŋ naŋ taa a Vooroŋ Soŋ wɔn-dɛndɛŋ kono hiine la te pooreŋ a kyɛ kyɛllɛ a daare na Naaŋmen naŋ na de te ka te la leɛ wa waa O biiri, a nyɛ te enne faabo.

²⁴Bonso, a teɛretɔroo poɔ la ka te nyɛ faabo. Pampana ŋa, teɛretɔroo ba naŋ maŋ nyɛ ne nimiri ba e teɛretɔroo. Bonso, aŋ la maŋ taa teɛretɔroo bon o naŋ nyɛ eŋɛ?

²⁵Kyɛ ka tenee taa teɛretɔroo bon te naŋ ba nyɛ eŋɛ, te na kyɛllɛ la ne kannyiri.

²⁶A lɛ ne o zu la ka a Vooroŋ Soŋ soŋnɔ te a te bambaaloŋ poɔ; bonso, te ba baŋ lɛ a naŋ seŋ ka te maŋ puori, kyɛ a Vooroŋ Soŋ ne O zu la maŋ puoro korɔ te ne hiinuu ka noɔre yelbie koŋ baŋ manne.

²⁷Kyɛ Naaŋmen naŋ maŋ nyɛrɛ nensaalba sukyie poɔ, baŋ la a Vooroŋ Soŋ poteɛrɛ, bonso, a Vooroŋ Soŋ maŋ puoro korɔ la a nensonne a seŋ a Naaŋmen poboɔbo.

²⁸Te baŋ ka yɛlɛ zaa maŋ laŋ tonɔ la a waana ne yelsoŋ a ko banaŋ naŋ nɔŋ Naaŋmen, a banaŋ O naŋ boɔle O poboɔbo zuiŋ.

²⁹Bonso, a banaŋ O naŋ da daŋ baŋ, bana la ka O da daŋ nare bare ka ba na taa a O Bidɔɔ waaloŋ, ka ka O na toɔ̃ e a bidɛndɛŋ a yideme naŋ waa yaga poɔ.

³⁰Ka a banaŋ O naŋ da daŋ nare bare, bana meŋ la ka O boɔle, ka a banaŋ O naŋ boɔle, bana meŋ la ka O e ka ba leɛ nemmenne; ka a banaŋ O naŋ e ka ba leɛ nemmenne, bana meŋ la ka O e ka ba nyɛ puubu.

³¹Boŋ ka te pãã na yeli kyaare ne a yɛlɛ ama? Ka Naaŋmen wa are ko te, aŋ la na baŋ zɔɔ ne te?

³²Soba na naŋ da ba zagre ka O de O meŋɛ Bidɔɔ tere te zaa zuiŋ, O koŋ ko te bonzaa a laŋ ne a O Bidɔɔ be?

³³Aŋ la na de saanaa dɔgle a noba Naaŋmen naŋ kaa-iri? A Naaŋmen la maŋ e ka neɛ nyɛ sonnoŋ.

³⁴Nembuo la na tere saanaa? A Kirista Yeezu la, Ona la da kpi, õõ, Ona la ka ba da e ka O leɛ-iri a kuuni poɔ, a be a Naaŋmen nuduluŋ seŋ, a sereŋ puoro sɔrɔ korɔ te.

³⁵Aŋ la na wɛle te yi a Kirista nɔmmo poɔ? Yeltuo la be, bee woore, bee dɔgroŋ, bee kɔŋkpoŋ, bee eŋkpoŋkpoli, bee kũũ yeli, bee zɔɔzɔɔ-soɔ?

³⁶Aŋa ba naŋ da sɛge lɛ: “A yɛ zuiŋ, ba maŋ ko te la bebiri zaa; te waa ŋa peere ba naŋ boɔrɔ ka ba ko.”

³⁷Ai, a ama zaa poɔ, te gaŋ la zɔɔtoɔ̃neba a yi a soba na naŋ nɔŋ te zie.

³⁸Bonso, N baŋ taɛ la ka kũũ bee nyɔvore, bee malekere, bee namine, bee boma naŋ bebe a zenɛ, bee boma naŋ na wa, bee kpeɛ̃õ deme,

³⁹bee boma naŋ do saa, bee zizuluŋ, bee bon-iraa zaa kontoɔ̃ wɛle te yi a Naaŋmen nɔmmo na naŋ be a Kirista Yeezu te Daana eŋɛ.