Read Southern Dagaare Uro 9 Bible Online

Uro 9 - Southern Dagaare bible

Uro 9

¹N yele la a yelmeŋɛ a Kirista eŋɛ, N ba ŋmaara zirii. N zoma di la danseɛ a Vooroŋ Soŋ eŋɛ.

²N taa la posãã-kpoŋ ka n sukyiri dɔɔnɔ ma yaga zaa a ba taa baaroo.

³Bonso, N da na nɔnɔ la ka N meŋɛ da na waa neŋkaa-ennaa, ka ba ŋmaa ma iri bare a Kirista eŋɛ, a n noba zuiŋ, noba naŋ waa n zẽẽ noba, a nensaaloŋ poɔ.

⁴Ba waa la Izerayɛl biiri ka Naaŋmen da e ka ba leɛ O bibiiri, ka ba so a puubu, a nɔ-eŋnee, a bege ane a O puoruu yɛlɛ ane a nɔɛ O naŋ da eŋ ko ba.

⁵Bana la so a sããkommine, a ba boorɔ poɔ la ka a Mɛzaaya[11] yi a nensaaloŋ poɔ, Ona la di naaloŋ a noba zaa zu. Ka Naaŋmen nyɛ puubu tegitegilɛ. Ameena.[12]

⁶A ba e ŋa a Naaŋmen yelbiri da e kpaaɛ la. Bonso, a Izerayɛl biiri zaa naane sereŋ waa a Izerayɛl noba,

⁷ka a Aboraham biiri meŋ zaa naane sereŋ waa o biiri; kyɛ, “A Aziki biiri la ka ba na boɔlɔ fo biiri.”

⁸A ŋaa tɛgɛ la, ka a ba e biiri ba naŋ dɔge a nensaaloŋ poɔ la waa a Naaŋmen biiri, kyɛ a nɔ-eŋnaa biiri la waa O boorɔ noba.

⁹Bonso, ŋaa la ka a nɔ-eŋnaa da yeli, “A saŋ ŋa tɔ, N na leɛ waana ka Saara taa la bidɔɔ.”

¹⁰A zaa naane lɛ; yeli kaŋ naŋ yi ne a yeli ŋa da e la Orebɛka zie, saŋ na o serɛ a te sããkoma Aziki naŋ da e ka o taa o biiri poɔ.

¹¹Haali sɛre kyɛ ka ba wa dɔge ba, bee ka ba da wa e yelsoŋ bee yelfaa zaa, (ka ka bon naŋ so ka Naaŋmen maŋ kaa-iri noba naŋ kyɛnɛ bebe gɛrɛ,

¹²ka a ta e ka toma zuiŋ la kyɛ ka a e O boɔlaa zuiŋ) ba da yeli ko la a Orebɛka, “A bikpoŋ na tonɔ korɔ la a bibile.”

¹³Aŋa ba naŋ da sɛge lɛ: “N da nɔŋ la Gyekɔb, kyɛ da kyiiri Esɔ.”

¹⁴Boŋ ka te pãã na yeli? Naaŋmen mɔɔ boorɔ la bo-kyɛnkyagre be? A koŋ baŋ waa lɛ togitogi!

¹⁵Bonso, O da yeli ko la Moozul: “N na zo la nyonono ne soba na zaa N naŋ boɔrɔ ka N zo o nyonono, kyɛ taa nembaaloŋ ne soba na zaa N naŋ boɔrɔ ka N zo o nembaaloŋ.”

¹⁶A lɛ zuiŋ a ba e nensaala poboɔbo bee o toma zie, kyɛ Naaŋmen naŋ zoro nembaaloŋ zie la ka a yi.

¹⁷Bonso, a gansoŋ yeli ko la Faaro, “N zɛge fo la ka fo do ka N wuli N kpeɛ̃õ naŋ be fo poɔ, ka ka ba na moɔle N yuori a tendaa zaa poɔ.”

¹⁸A lɛ zuiŋ la ka O pãã maŋ taa nyonono ne soba na zaa O naŋ boɔrɔ ka O zo o nyonono, a kyɛ dare soba na zaa sukyiri O naŋ boɔrɔ.

¹⁹Fo pãã na yeli ko ma la, “Ka boŋ pãã so ka O naŋ kyɛnɛ nyɛrɛ te saanaa? Ka aŋ la na toɔ̃ zɔɔ ne Naaŋmen poboɔbo?”

²⁰Kyɛ nembuo sereŋ la fõõ nensaala, a na ŋmɛ nɔkpeɛne ne Naaŋmen? Bon ba naŋ meɛrɛ mɔɔ na toɔ̃ soore la a o meɛrɛ, “Bonso ka fo mɛ ma a ŋaa?”

²¹A dogmeɛrɛ ba taa faŋ a na de a yagraa o naŋ meɛrɛ ne, mɛ ne bon naŋ taa yuori ane bon naŋ ba taa yuori be?

²²Naaŋmen naŋ da boɔrɔ ka O wuli O supuriyaaraa, kyɛ e ka ba baŋ O kpeɛ̃õ, O da nyɔge la O meŋɛ a di kannyiri yaga ne a noba O suuri naŋ iri ne yaga zaa, bana ka ba da nare bare ka ba wɛ.

²³O da e la a lɛ ka ka ba baŋ O puubu naŋ e kpoŋ seŋ lɛ a ko noba na O naŋ zoro ba nyonono, bana la ka O da daŋ nare biŋ O puubu eŋɛ;

²⁴a laŋ ne te meŋ O naŋ da boɔle, a ba e a Gyuumine yoŋ poɔ kyɛ a Nemboore-yobo[13] meŋ poɔ.

²⁵Aŋa O naŋ da sereŋ yeli a Hozeya gane poɔ lɛ: “Banaŋ naŋ da ba waa N noba, N na boɔle ba la ‘N noba,’ ka noba na N naŋ da ba nɔŋ, N na boɔle ba la N ‘poyɛŋ noba.’ ”

²⁶“Kyɛ a zie na ne o zu ba naŋ da yeli ko ba, ‘Yɛ ba waa N noba,’ be la ka ba na boɔlɔ ba a Naaŋmen-vore biiri.”

²⁷Kyɛ Azaaya ŋmeɛrɛ la kpɛlle a kyaara ne Izerayɛl, “Aneazaa ka a Izerayɛl biiri da waa yaga aŋa mane biiree, kyɛ ba fẽẽ zie la na nyɛ faabo;

²⁸bonso, a Daana na di la a andonɛɛ sɛrɛɛ wieouŋ zaa ane lɛ a naŋ seŋ ka a waa.”

²⁹Aŋa lɛ Azaaya naŋ da daŋ yeli: “Ka a boma zaa Daana da ba bare a noba mine ko te ka ba voorɔ, te zaa da na baare ŋa Sodom, kyɛ da e ka te waa ŋa Gomora.”

³⁰Boŋ ka te pãã na yeli? A Nemboore-yobo naŋ da moɔ nimiri boɔrɔ sonnoŋ, da nyɛ la mennoŋ, ona la, mennoŋ naŋ yi yeldeebo zie;

³¹kyɛ a Izerayɛl biiri naŋ waa noba naŋ da moɔ nimiri boɔrɔ mennoŋ yire a bege poɔ, ba toɔ̃ tu a bege ka a tori.

³²Boŋ pãã da so ka a ba waa lɛ? Bonso, ba da ba bɔ a mennoŋ ne yeldeebo, kyɛ da erɛ aŋa toma eŋɛ la ka mennoŋ yire. Ba da ŋmɛ la gbɛre a gbɛŋmɛ-le kuuri eŋɛ,

³³aŋa ba naŋ da sɛge lɛ: “Yɛ nyɛ, N binne la kuuri Zaayɔn poɔ naŋ na e ka noba ŋmɛ gbɛɛ, piiri naŋ na e ka ba le, kyɛ soba na zaa naŋ sage de O yɛlɛ koŋ di vi.”