Read Southern Dagaare 1 Kor 11 Bible Online

1 Kor 11 - Southern Dagaare bible

1 Kor 11

¹Yɛ tɔglɔ ma aŋa N naŋ tɔglɔ a Kirista lɛ.

²N ko yɛ la garebanyɛ bonso, yɛ taa la n teɛroŋ yelzaa poɔ kyɛ tuuro a yɛlɛ zaa a seŋ N naŋ da wuli yɛ lɛ.

³Kyɛ N boɔrɔ la ka yɛ baŋ ka dɔɔ zaa zusoba la a Kirista, ka pɔge zaa zusoba e o serɛ, ka a Kirista meŋ zusoba la Naaŋmen.

⁴Dɔɔ zaa naŋ leŋ o zu pɔge kyɛ puoro bee a yele Ŋmen-yelmanna yelyelii, eŋnɛ la a Kirista vi.

⁵Kyɛ pɔge zaa naŋ ba leŋ o zu pɔge kyɛ puoro bee a yele Ŋmen-yelmanna yelyelii, eŋnɛ la a o zu vi; a waa seŋ ŋa o naŋ da poŋ o zu.

⁶Ka pɔge koŋ leŋ zutaraa pɔge o zu, lɛ eŋ, a seŋ ka o kyɛ a o zukɔɔloŋ bare. Kyɛ ka a zukɔɔloŋ kyeɛbo bee pommu wa erɛ a pɔge vi, lɛ eŋ o leŋ zutaraa.

⁷Bonso, a ba seŋ ka dɔɔ leŋ zutaraa pɔge o zu, o naŋ taa Naaŋmen meɛroŋ ane O waaloŋ zuiŋ, kyɛ pɔge eŋ taa la dɔɔ waaloŋ.

⁸Serɛzaa, ba da ba maale dɔɔ yi pɔge eŋɛ, kyɛ pɔge la ka ba da maale yi dɔɔ eŋɛ.

⁹Ba da ba iri dɔɔ pɔge zuiŋ, kyɛ dɔɔ zuiŋ la ka ba da iri pɔge.

¹⁰A yeli ŋa zuiŋ, a seŋ ka pɔge leŋ zutaraa ka a e yelwulaa ka o be la o serɛ kpeɛ̃õ puliŋ a malekere zuiŋ.

¹¹Kyɛ a Daana eŋɛ, pɔge ba so o meŋɛ dɔɔ zie, ka dɔɔ meŋ ba so o meŋɛ pɔge zie.

¹²Aŋa lɛ pɔge naŋ da yi dɔɔ eŋɛ, lɛ meŋ la ka dɔɔ maŋ tu pɔge eŋɛ yi. Kyɛ a boma zaa yi la Naaŋmen zie.

¹³Yɛmenne gyɛle nyɛ: a e la velaa ka pɔge ta leŋ o zu pɔge kyɛ puoro Naaŋmen be?

¹⁴A lɛ Naaŋmen naŋ maale nensaala mɔɔ ba wuli ka dɔɔ naŋ taa zukɔɔloŋ wogri ba eŋnɛ o meŋɛ be?

¹⁵Kyɛ ka pɔge wa taa zukɔɔloŋ wogri, a waa la o dapaaloŋ bon. Bonso, ba ko o la a zukɔɔloŋ wogri ka o maŋ leŋ pɔge.

¹⁶Kyɛ ka neɛzaa wa boɔrɔ ka o ŋmɛ nɔkpeɛne; tenee bee a Naaŋmen puoruu laŋne ba la taa yeltuuraa zaa.

¹⁷A yɛlɛ ama eŋ poɔ, N koŋ ko yɛ garebanyɛ, bonso, a saŋ yɛ naŋ maŋ wa lantaa, a ba maŋ e velaa, kyɛ faaloŋ maŋ la.

¹⁸A yeli dɛndɛŋ soba la ŋa, ba yeli ko ma la ka yɛ naŋ maŋ wa lantaa aŋa puoruu deme, ka wɛltaa maŋ be la yɛ poɔ; kyɛ N deɛ la ka yelmeŋɛ belaa be la a poɔ.

¹⁹Serɛzaa, a seŋɛɛ la ka wɛltaa be yɛ poɔ, bonso a lɛ yoŋ zie la ka a yelmenne deme na daa yi ka ba baŋ ba.

²⁰Yɛ naŋ maŋ wa lantaa, a Daana bondiraa naane ka yɛ sereŋ maŋ lantaa ka yɛ di.

²¹Bonso, a diibu saŋ naŋ maŋ wa ta, yɛ kanzaa maŋ dire la o diibu, ka kaŋ maŋ taa kɔŋ kyɛ ka kaŋ nyu kuoli.

²²Boŋ la a lɛ! Yɛ ba taa yie a na maŋ dire kyɛ nyuuro be? Bee a puoruu laŋne la ka yɛ kaabanyɛ, kyɛ eŋnɛ a banaŋ nuuri naŋ ba taa vi? Boŋ ka N na yeli ko yɛ? N ko yɛ garebanyɛ be? A yeli ŋa poɔ, N koŋ ko yɛ garebanyɛ!

²³A yeli na N naŋ da de yi a Daana zie, ona la ka N meŋ de ko yɛ. A tensogɔ na ba naŋ da de a Daana Yeezu tere, O da de la boroboro,

²⁴kyɛ O naŋ da wa puori Naaŋmen ameseɛrɛ baare, O da ŋmaa la a boroboro kyɛ yeli, “A N eŋɛ la a ŋa, yɛnee la so o. Yɛ maŋ e a ŋaa a leɛ-teɛrɛ N yɛlɛ.”

²⁵A lɛ ne o zu ka O da de a ŋmanlee a bondirii diibu baaroo puoriŋ, a yele, “A ŋmanlee ŋa la a nɔpaalaa N naŋ biŋ ne a N zẽẽ. Yɛ maŋ e a ŋaa a leɛ-teɛrɛ N yɛlɛ saŋ na zaa yɛ naŋ maŋ wa nyu a.”

²⁶Bonso, saŋ na zaa yɛ naŋ maŋ wa ɔɔ a boroboro ŋa kyɛ nyu a ŋmanlee ŋa poɔ boma, a Daana kũũ la ka yɛ maŋ moɔlɔ a te ta lɛ saŋ O naŋ na leɛ wa.

²⁷Azuiŋ, neɛ na zaa naŋ di a Daana bondiraa ŋa kyɛ nyu a Daana ŋmanlee poɔ boma kyɛ ka a ba seŋ ne a lɛ, o soba taa la saanaa a Daana eŋɛ ne O zẽẽ zuiŋ.

²⁸Yɛ maŋ gyɛle yɛmenne nyɛ kyɛ pãã baŋ ɔɔ a boroboro ŋa kyɛ nyu a ŋmanlee ŋa poɔ boma.

²⁹Bonso, banaŋ zaa naŋ di kyɛ nyu kyɛ ba baŋ a tɛgɛ, dire la kyɛ nyuuro sɛrɛɛ dɔglɔ bamenne zu.

³⁰A lɛ la so ka yɛ yaga ba taa faŋ a beɛrɛ kyɛ ka ba mine meŋ kpi.

³¹Kyɛ ka tenee di temenne sɛrɛɛ, ba koŋ la di te sɛrɛɛ.

³²Kyɛ ka a Daana wa di te sɛrɛɛ, O maŋ tage la te toori, ka ba na ta wa laŋ dɔgre te ne a andonɛɛ.

³³Azuiŋ n yɔɔmine ane n yɔɔpuuli, ka yɛnee maŋ wa lantaa ka yɛ di, yɛ maŋ kyɛlle taa.

³⁴Ka kɔŋ wa kpɛ yɛ kanzaa, o maŋ di o yiri poɔ kyɛ waana, ka ka yɛnee wa lantaa ka a ta wa ne saanaa ko yɛ. A yɛlɛ na eŋ naŋ kyɛre, N na wuli yɛ la ka maa wa wa yɛ zie.