Read Southern Dagaare 1 Kor 12 Bible Online

1 Kor 12 - Southern Dagaare bible

1 Kor 12

¹N yɔɔmine ane n yɔɔpuuli, N ba boɔrɔ ka yɛ be babammo poɔ a kyaare ne a Vooroŋ Soŋ kyɔɔtaare yɛlɛ.

²Yɛ baŋ ka yɛ naŋ da waa noba naŋ da ba puoro Naaŋmen, ba da bɛlle yɛ la ka yɛ bɔre gaa tebɛ naŋ kontoɔ̃ yeli yɛlɛ zie.

³Azuiŋ, N boɔrɔ la ka yɛ baŋ ka neɛzaa naŋ yele yɛlɛ a Naaŋmen Vooroŋ eŋɛ kontoɔ̃ yeli, “Vɛŋ ka ba kaa-eŋ a Yeezu!” ka neɛzaa kontoɔ̃ yeli, “Yeezu la a Daana” ka a Vooroŋ Soŋ eŋɛ naane.

⁴Kyɔɔtaare tɛɛtɛɛ la bebe, kyɛ a Vooroŋ Soŋ ne O zu zie la ka a zaa yi;

⁵ka tomparɛɛ yaga bebe, kyɛ a Daana ne O zu la ka ba zaa tonɔ terɛ;

⁶ka yeltɛɛtɛɛ meŋ bebe, kyɛ a Naaŋmen ne O zu la erɛ a zaa a noba zaa zie.

⁷A Vooroŋ Soŋ kyɔɔtaare maŋ sãã la kanzaa zie, a ba zaa maaloo zuiŋ.

⁸A Vooroŋ Soŋ maŋ ko la kaŋ yɛlɛ yeluu yɛŋ, kyɛ ko kaŋ meŋ yɛlɛ yeluu bammo, kyɛ a Vooroŋ ne O zu la terɛ a zaa.

⁹A Vooroŋ Soŋ ne O zu maŋ ko la kaŋ yeldeebo, ka kaŋ meŋ nyɛ baalba sammo kyɔɔtaare yi a Vooroŋ Soŋ ne O zu zie.

¹⁰O maŋ ko la kaŋ toŋseɛlɛ tommo kpeɛ̃õ, a ko kaŋ meŋ Ŋmen-yelmanna yɛlɛ yeluu, a ko kaŋ yɛŋ ka o na maŋ baŋ se-tɛɛtɛɛ, a ko kaŋ kpeɛ̃õ ka o na toɔ̃ yele kɔkɔsaama, a ko kaŋ a faŋ ka o na maŋ iri a kɔkɔsaama pare.

¹¹A ama zaa waa la a Vooroŋ Soŋ ne O zu toma ka O poŋ ko a noba zaa a seŋ O naŋ boɔrɔ lɛ.

¹²Aŋa lɛ a eŋɛ naŋ waa yeni kyɛ taa nandaare yaga ka a nanda-yaga lantaa a waa eŋgan-yeni, lɛ la ka a waa a Kirista zie.

¹³Bonso, a Vooroŋ yeni poɔ la ka ba da ko te zaa a suobu ka te waa eŋgan-yeni; Gyuumine bee Giriki noba, gbaŋgbaare bee noba naŋ so bamenne, a kyɛ e ka te zaa nyu a Vooroŋ yeni.

¹⁴Serɛzaa, a eŋɛ ba taa nanda-yeni yoŋ, kyɛ nandaare yaga la ka o taa.

¹⁵Ka a gbɛre na yeli, “N naŋ ba waa nu zuiŋ, N ba waa a eŋɛ zie kaŋ,” a lɛ koŋ baŋ vɛŋ ka o ba waa a eŋɛ zie kaŋ.

¹⁶Ka toori meŋ na yeli, “N naŋ ba waa nimiri zuiŋ, N ba waa a eŋɛ zie kaŋ,” a lɛ koŋ baŋ vɛŋ ka o ba waa a eŋɛ zie kaŋ.

¹⁷Ka a eŋɛ zaa da waa nimiri, a eŋɛ da na e la wola a wono yɛlɛ? Ka a eŋɛ zaa da waa toori, a eŋɛ da na e la wola a wono nyuu?

¹⁸Kyɛ a naŋ waa ŋaa, Naaŋmen la maale a nandaare tɛɛtɛɛ eŋ a eŋɛŋ a seŋ O naŋ boɔrɔ lɛ.

¹⁹Ka a zaa da waa nanda-yeni, yeŋ ka a eŋɛ da na be?

²⁰Kyɛ a naŋ waa ŋaa, a nandaare waa la yaga kyɛ ka a eŋɛ waa bon-yeni.

²¹A nimiri kontoɔ̃ yeli ko a nu, “N ba taa fo yel-eraa,” ka zu meŋ kontoɔ̃ yeli ko gbɛɛ, “N ba taa yɛ yel-eraa.”

²²A lɛ yoŋ naane, a eŋɛ nandaare na naŋ waa ŋa a ba taa faŋ meŋ ferɛɛ la ka a bebe.

²³A eŋɛ nandaare na te naŋ nyɛ ka a ba seŋ ne emmo, a na la ka te maŋ pɔge ne emmo, ka a nandaare na naŋ ba taa gyeremɛ yaga la ka te maŋ eŋnɛ yaga;

²⁴kyɛ a nandaare na naŋ taa gyeremɛ yaga na, a ba fere ka te eŋnɛ a. Kyɛ Naaŋmen mɛ la a eŋɛ velaa zaa, a e ka ba korɔ a eŋɛ benee naŋ ba taa gyeremɛ emmo yaga,

²⁵ka ka a eŋɛ nandaare ta wa zɔɔrɔ taa, kyɛ ka a na soŋnɔ taa.

²⁶Ka a eŋɛ nandaa kaŋ wa wono tuo, a eŋɛ nandaare zaa maŋ wono la tuo; ka a nandaa kaŋ wa nyɛ yuori, a zaa maŋ laŋ ne o la a kyellɛ.

²⁷Pampana, yɛnee la a Kirista endaa kyɛ waa nandaare tɛɛtɛɛ.

²⁸Kyɛ Naaŋmen kaa-iri la noba a puoruu laŋne poɔ, ka a danweɛ deme waa a apostoliimine, ka a Ŋmen-yelmanneba tu, ka wulwulibo tu; a bama puoriŋ, ka yelkpeɛ-erebɛ tu, ka a banaŋ naŋ taa baalba sammo kyɔɔtaare tu, ka noba sommo ane wederebɛ tu, a pãã de ne kɔkɔsaama.

²⁹Ba zaa waa la apostoliimine be? Ba zaa waa la Ŋmen-yelmanneba be? Ba zaa waa la wulwulibo be? Ba zaa tonɔ la toŋseɛlɛ be?

³⁰Ba zaa la taa a baalba sammo kyɔɔtaare be? Ba zaa la yele kɔkɔsaama be? Ba zaa la maŋ ire a kɔkɔsaama tɛgɛ be?

³¹Yɛ moɔ nimiri boɔrɔ a kyɔɔtaare naŋ waa bɛrɛ. N na wuli yɛ la sori na naŋ maaleŋ veɛlɛ gaŋ a zaa.