Read Southern Dagaare 1 Kor 13 Bible Online

1 Kor 13 - Southern Dagaare bible

1 Kor 13

¹Ka maa yele yɛlɛ ne nensaalba ane malekere kɔkɔɛ kyɛ ba taa nɔmmo, N waa la gaŋgaa ba naŋ ŋmeɛrɛ ka o pɔgrɔ gɔmɔ bee buulo naŋ dɔɔnɔ.

²Ka maa taa Ŋmen-yelmanna kpeɛ̃õ, a baŋ a Naaŋmen yelsɔglɔ zaa, a taa yɛmboorɔ zaa, a taa yeldeebo zaa naŋ na toɔ̃ iri tanne gaa ne ziyuo, kyɛ ba taa nɔmmo, N ba waa bonzaa.

³Ka maa de n boma zaa poŋ ko nembaalba, a de n eŋɛ tere ka ba nyege vũũ poɔ ka ka N na toɔ̃ duoro n meŋɛ, kyɛ ba taa nɔmmo, N koŋ nyɛ tɔnɔ zaa.

⁴Nɔmmo waa la kannyiri, nɔmmo waa la nimibaaloŋ, nɔmmo ba erɛ nyuuri, bee meŋɛ wuluu, bee pɔloo,

⁵bee a erɛ too-yɛlɛ. Nɔmmo ba boɔrɔ o yoŋ tɛgɛ boma; o suuri ba ire bee a diire yelfaare binne.

⁶Nɔmmo poɔ ba pɛllɛ ne faaloŋ, kyɛ o maŋ kyellɛ la ane yelmennoŋ.

⁷Nɔmmo maŋ sagra la yelzaa, a sagra derɛ yelzaa. Nɔmmo maŋ taa la teɛretɔroo[4] ne yelzaa kyɛ maŋ di kannyiri ne yelzaa.

⁸Nɔmmo daŋ koŋ baare zaa. Kyɛ Ŋmen-yelmanneba yelyelii na baare la, ka kɔkɔsaama kyɔɔtaare baare, ka bammo meŋ baare.

⁹Bonso, a te bammo e la ŋmaara ŋmaara, ka a te Ŋmen-yelmanneba yelyelii meŋ e ŋmaara ŋmaara.

¹⁰Kyɛ ka a bon naŋ e gbuli wa wa, a o naŋ naŋ e ŋmaa na baare la.

¹¹N naŋ da waa bibile, N da maŋ yele la yɛlɛ aŋa bibile, a da maŋ teɛrɛ aŋa bibile, kyɛ ka N yɛŋ da waa bibil-yɛŋ. N naŋ da wa baa, N da bare la a bibil-yɛlɛ zaa.

¹²Pampana ŋa, te maŋ nyɛ la kyaanaa poɔ zĩĩ lɛ, kyɛ te na nyɛ la O niŋesogɔ weliweli. Pampana ŋa, N baŋ la ŋmaara ŋmaara, kyɛ N na baŋ la a zaa gbuli aŋa ba naŋ baŋ ma baare lɛ.

¹³Azuiŋ, yeldeebo, teɛretɔroo ane nɔmmo la bebe. Kyɛ a ama ata poɔ, nɔmmo la a zaa poɔ kpoŋ soba.