Read Southern Dagaare 1 Kor 14 Bible Online

1 Kor 14 - Southern Dagaare bible

1 Kor 14

¹Yɛ eŋ faŋ boɔrɔ nɔmmo kyɛ moɔ nimiri boɔrɔ a Vooroŋ Soŋ kyɔɔtaare, a gaŋ a zaa, ka ka yɛ na maŋ toɔ̃ yele Ŋmen-yelmanna yelyelii.

²Bonso, banaŋ naŋ yele kɔkɔsaama ba yele korɔ nensaalba, kyɛ Naaŋmen la ka ba yele korɔ. Neɛzaa ba maŋ baŋ bonna ba naŋ yele tɛgɛ, bonso, ba maŋ yele la yelsɔglɔ a Vooroŋ Soŋ eŋɛ.

³Kyɛ soba na naŋ yele Ŋmen-yelmanna yelyelii, yele korɔ la noba, ka ba yeldeebo na baara, a yeli teɛ ba kyɛ moore ko ba.

⁴Banaŋ naŋ yele kɔkɔsaama, soŋnɔ la bamenne yoŋ, kyɛ banaŋ naŋ yele Ŋmen-yelmanna yelyelii, soŋnɔ la a puoruu laŋne noba.

⁵N na boɔrɔ la ka yɛ zaa yele kɔkɔsaama, kyɛ a gaŋ a zaa N na boɔrɔ la ka yɛ yele Ŋmen-yelmanna yelyelii. A soba na naŋ yele Ŋmen-yelmanna yelyelii gaŋ la soba na naŋ yele kɔkɔsaama kyɛ ka neɛzaa ba kyebe na iri a kɔkɔsaama tɛgɛ ka a na toɔ̃ soŋ a puoruu laŋne ka o baara.

⁶Azuiŋ, n yɔɔmine ane n yɔɔpuuli, ka maa wa yɛ zie a yele kɔkɔsaama kyɛ ba yele yɛlɛ Naaŋmen naŋ iri wuli ma, bee yelbammo yɛlɛ, bee a yele Ŋmen-yelmanna yelyelii, bee a wullo yɛ, wola ka N na e soŋ yɛ?

⁷A lɛ ne o zu la ka a waa bon-ŋmeɛre naŋ ba voorɔ zie, ka ba ŋmeɛrɛ ka a kono, aŋa wulee bee pɛnnaa. Ka ba naŋ ŋmeɛrɛ ka kanzaa ba kono o konni, wola ka neɛ na e baŋ bonna ba naŋ peɛlɛ bee a ŋmeɛrɛ?

⁸Ka a eele ba wa koŋ lɛ a naŋ seŋ ka o koŋ, aŋ la na nare ka o yi zɔɔre?

⁹Lɛ meŋ la ka a waa yɛ zie, ka yɛnee yele kɔkɔsaama ka a ba e weliweli, wola ka neɛ na e baŋ bonna yɛ naŋ yele? Yɛ na deɛ yele la yɛlɛ bara saseɛ poɔ.

¹⁰Yelmeŋɛ zaa, kɔkɔtɛɛtɛɛ be la a teŋɛzu, kyɛ kanzaa ba kyebe ka a o yelbie ba taa tɛgɛ.

¹¹Ka maa pãã ba baŋ a kɔkɔre yelbie tɛgɛ, N na waa la saana a soba na naŋ yele a yɛlɛ zie, ka o meŋ waa saana n zie.

¹²Lɛ meŋ la ka a waa yɛ zie, yɛ naŋ kyerɛ ka yɛ nyɛ a Vooroŋ Soŋ kyɔɔtaare, yɛ moɔ nimiri ka yɛ de a tonɔ ne ka a puoruu laŋne na baara duoro.

¹³Azuiŋ, neɛ naŋ yele kɔkɔsaama seŋ ka o puori sɔre kpeɛ̃õ naŋ na e ka o maŋ toɔ̃ iri a tɛgɛ.

¹⁴Ka maa puoro yele kɔkɔsaama, n seɛ maŋ puoro la kyɛ n yɛŋ ba erɛ bonzaa.

¹⁵Wola ka N pãã na e? N na puori la ne a Vooroŋ Soŋ, kyɛ la puori ne n teɛroŋ meŋ; N na yiele la puubu yieluŋ ne a Vooroŋ Soŋ, kyɛ la yieli ne n teɛroŋ meŋ.

¹⁶Ka lɛ naane, ka fõõ puori Naaŋmen ameseɛrɛ ne a Vooroŋ Soŋ yoŋ, wola ka neɛ naŋ ba baŋ a tɛgɛ na yeli, “Ameena”[5] sɔge a fo ameseɛrɛ puoruu, a soba naŋ pãã ba baŋ yɛlɛ na fo naŋ yele?

¹⁷A fo ameseɛrɛ puoruu na toɔ̃ veɛlɛ la, kyɛ a onaŋ soba eŋ ba nyɛ sommo zaa.

¹⁸N puoro la Naaŋmen ameseɛrɛ ane N naŋ yele kɔkɔsaama gaŋ yɛ zaa;

¹⁹anealɛzaa, a puoruu laŋne poɔ, N na boɔrɔ la ka N yeli yelbie anuu naŋ taa tɛgɛ ko a noba ka N wuli ba gaŋ kɔkɔsaama yelbie turi pie.

²⁰N yɔɔmine ane n yɔɔpuuli, yɛ ta taa bibil-yɛŋ yɛ teɛrɛ poɔ, kyɛ yɛ waa bilɛɛre faaloŋ eebo poɔ, kyɛ waa nembɛrɛ yɛ teɛrɛ poɔ.

²¹Ba sɛge la a begɛ gane poɔ: “Noba naŋ yele kɔkɔsaama ane saama nɔɛ la ka N na de yeli yɛlɛ ko a noba ŋa; kyɛ anealɛzaa, ba koŋ kyɛlle woŋ a N yɛlɛ.” A Daana la yeli.

²²Azuiŋ, kɔkɔsaama yeluu ba waa yelwulaa ko yelderebɛ, kyɛ a waa la yelwulaa ko a yelbaderebɛ. Ka Ŋmen-yelmanna yelyelii ba waa yelwulaa ko a yelbaderebɛ, kyɛ a waa la yelwulaa ko a yelderebɛ.

²³Azuiŋ, ka a puoruu laŋne noba zaa wa lantaa a yele kɔkɔsaama, ka noba naŋ ba poɔ yɛ poɔ bee noba naŋ ba sage de a Kirista yɛlɛ wa kpɛ, ba koŋ yeli ka yɛ yaara la be?

²⁴Kyɛ ka yɛ zaa yele Ŋmen-yelmanna yelyelii, ka neɛ naŋ ba sage de a Kirista yɛlɛ bee neɛ naŋ ba poɔ yɛ poɔ wa kpɛ, o na nyɛ la o saanaa ba zaa naŋ yele ka a lɛ di o sɛrɛɛ.

²⁵Ka a neɛ naŋ ba sage de a Kirista yɛlɛ sukyiri yelsɔglɔ wa sãã baare, o soba na le vɔgle la muro a Naaŋmen niŋesogɔ kyɛ puori O, a yele, “Naaŋmen sereŋ be la yɛ sogɔŋ.”

²⁶N bamine, wola pãã ka a seŋ ka yɛlɛ erɛ? Ka yɛnee maŋ wa lantaa, yɛ kanzaa maŋ taa la yieluŋ, ka kaŋ taa wuluu, ka kaŋ taa yel-iriwulaa, ka kaŋ taa kɔkɔsaana bee a na baŋ iri kɔkɔsaama tɛgɛ. Yɛ vɛŋ ka a yɛlɛ zaa yɛ naŋ erɛ soŋ a puoruu laŋne ka o baara.

²⁷Ka neɛ kaŋ wa yele kɔkɔsaana, vɛŋ ka ba e noba bayi bee bata gaŋ noba bata, kyɛ ka kaŋ maŋ yeli kyɛ ko o tɔ kyɛ ka kaŋ maŋ iri a tɛgɛ.

²⁸Kyɛ ka neɛzaa ba wa kyebe a na toɔ̃ iri a kɔkɔsaama tɛgɛ, vɛŋ ka ba e gbilli lɛ a puoruu laŋne noba poɔ, kyɛ yele korɔ bamenne ane Naaŋmen.

²⁹Yɛ vɛŋ ka noba bayi bee bata yele Ŋmen-yelmanna yelyelii, kyɛ ka a banaŋ naŋ kyɛre gyɛle nyɛ a yɛlɛ ba naŋ yeli.

³⁰Kyɛ ka neɛ kaŋ naŋ zeŋ peɛle wa nyɛ yel-iriwulaa kaŋ, vɛŋ ka a soba na naŋ daŋ yele a yɛlɛ e gbilli.

³¹Bonso, yɛ yeni yeni zaa na toɔ̃ yeli la Ŋmen-yelmanna yelyelii kyɛ ko taa, ka a noba zaa na toɔ̃ zanne kyɛ yeli yɛlɛ teɛtaa.

³²A Ŋmen-yelmanneba la taa a Ŋmen-yelmanneba vooroŋ faŋ,

³³bonso, Naaŋmen ba dɔɔnɔ yɛlɛ laŋna taa, O waa la maaroŋ Naaŋmen. (Aŋa a naŋ waa lɛ a nensonne puoruu laŋne yie zaa poore,

³⁴a seŋ ka a pɔgeba e gbilli a puoruu laŋne yie noba poɔ. Bonso, ba ba ko ba sori ka ba yeli yɛlɛ, aŋa lɛ a begɛ meŋ naŋ yeli, ka a ba seŋ ka ba e wederebɛ.

³⁵Ka ba naŋ wa boɔrɔ ka ba baŋ yelzaa, ba soore ba serebɛ a ba yie poore, bonso, a waa la vi ka pɔgɔ yeli yɛlɛ a puoruu laŋne noba poɔ.

³⁶Yɛ zie la ka a Naaŋmen yelbiri da piili be? Bee yɛ yoŋ la ka o ta?)

³⁷Ka neɛzaa wa teɛre ka o waa la Ŋmen-yelmanna, bee ka o taa la a Vooroŋ Soŋ kpeɛ̃õ, o soba seŋ ka o baŋ ka a yɛlɛ N naŋ sɛgrɛ korɔ yɛ waa la a Daana noɔre.

³⁸Neɛzaa naŋ ba wa sage de a yɛlɛ ŋa, yɛ ta wa sagra o soba yɛlɛ.

³⁹Azuiŋ, n bamine, yɛ moɔ nimiri boɔrɔ ka yɛ yele Ŋmen-yelmanna yelyelii, kyɛ yɛ ta pigi a kɔkɔsaama yeluu,

⁴⁰kyɛ a seŋɛɛ la ka yɛ erɛ a yɛlɛ zaa velaa, a erɛ ka a tuuro taa velaa.