Read Southern Dagaare 1 Kor 15 Bible Online

1 Kor 15 - Southern Dagaare bible

1 Kor 15

¹N yɔɔmine ane n yɔɔpuuli, N na leɛ-teɛre yɛ la a kyaare ne a Ŋmen-yelnoore N naŋ da moɔle ko yɛ, ka yɛ meŋ da sage de, a o poɔ meŋ la ka yɛ are.

²Ka yɛnee nyɔge kpeɛŋaa a yɛlɛ N naŋ moɔle ko yɛ, yɛ na nyɛ la faabo, ka lɛ naane, a yɛ sagedeebo na e la weɛlɛ.

³Bonso, N da de la weɛ a moɔle ko yɛ a yɛlɛ na maa meŋɛ naŋ da de: ka a Kirista da kpie la te yelbebe zuiŋ, a seŋ a gansoŋ naŋ yeli lɛ.

⁴Ka ba da ũũ O la, ka O da leɛ-iree a kuuni poɔ a beri ata daare a seŋ a gansoŋ naŋ yeli lɛ,

⁵ka O da de la O meŋɛ wuli Sefase, kyɛ de O meŋɛ pãã wuli a potuuribo pie ne bayi na.

⁶Lɛ la ka O da de O meŋɛ wuli a yɔɔmine ane a yɔɔpuuli naŋ gaŋ kɔɔraanuu ka ba zaa laŋ nyɛ O. Aneazaa ka ba mine kpie la, kyɛ ba yaga zie naŋ voorɔ la.

⁷Lɛ la ka O da de O meŋɛ wuli Gyimisi, a kyɛ pãã da de O meŋɛ wuli a apostoliimine zaa.

⁸A baaraa zaa, O da de la O meŋɛ wuli maa meŋɛ aŋa bie naŋ ba ta kyɛ ka ba dɔge.

⁹Bonso, maa la a apostoliimine zaa poɔ bile soba, ka a da ba seŋ ka ba boɔlɔ ma apostolii, N naŋ da dɔgre a puoruu laŋne zuiŋ.

¹⁰Kyɛ a Naaŋmen garaaseɛ zuiŋ la ka N waa a lɛ N naŋ waa, ka a O garaaseɛ naŋ be n zie ba e weɛlɛ. Kyɛ N toŋ gaŋ la ba zaa, aneazaa ka maa meŋɛ naane da tonɔ, kyɛ a Naaŋmen garaaseɛ naŋ be n zie la da tonɔ.

¹¹Ka maa pãã la bee ka bana la, a yeli ŋa la ka te moɔle ka yɛ da sage de.

¹²Pampana ka banaŋ wa moɔle ka Naaŋmen eɛɛ la ka a Kirista da leɛ-iri a kuuni poɔ, wola la ka yɛ mine yeli ka a kuuni poɔ leɛ-iruu kyebe?

¹³Ka a kuuni leɛ-iruu ba kyebe, ka lɛ, ba da ba e ka a Kirista leɛ-iri a kuuni poɔ;

¹⁴ka banaŋ da ba e ka a Kirista leɛ-iri a kuuni poɔ, ka lɛ, a yɛlɛ te naŋ moɔlɔ waa la weɛlɛ, ka a yɛ yeldeebo meŋ waa weɛlɛ.

¹⁵Ba gba na nyɛ te la ka te ŋmaara zirii eŋnɛ Naaŋmen, bonso, te di la danseɛ ka Naaŋmen la e ka a Kirista leɛ-iri a kuuni poɔ. Ka anaŋ waa yelmeŋɛ ka a kuuni koŋ la leɛ-iri, ka lɛ Naaŋmen ba e ka a Kirista leɛ-iri a kuuni poɔ.

¹⁶Ka a kuuni koŋ la leɛ-iri, ka lɛ, ba da ba e ka a Kirista leɛ-iri a kuuni poɔ.

¹⁷Ka a Kirista ba leɛ-iri a kuuni poɔ, a yɛ yeldeebo waa la weɛlɛ kyɛ ka yɛ naŋ kyɛnɛ be a yɛ yelbebe poɔ.

¹⁸Ka anaŋ waa lɛ, a banaŋ naŋ sage de a Kirista yɛlɛ kyɛ kpi meŋ wɛɛ la.

¹⁹Ka a te teɛretɔroo[6] te naŋ taa a Kirista eŋɛ da waa a teŋɛzu kyɛ yoŋ yɛlɛ, te yuori da la we a noba zaa poɔ.

²⁰Kyɛ serɛzaa, ba eɛɛ la ka a Kirista da leɛ-iri a kuuni poɔ. Ona la a kuuni poɔ leɛ-iruu dɛndɛŋ soba.

²¹Kyɛ kũũ naŋ tu nensaala zie wa zuiŋ, lɛ meŋ la ka a kuuni poɔ leɛ-iruu tu nensaala zie wa;

²²aŋa lɛ a noba zaa naŋ kpi Adama zuiŋ, lɛ la ka a noba zaa meŋ na la voorɔ a Kirista zuiŋ.

²³Kyɛ Naaŋmen na e la ka kanzaa leɛ-iri o iruu saŋ. Kirista la a bonwɔmɔ dɛndɛŋ soba, a pãã de a banaŋ naŋ waa a Kirista noba a O waabo saŋ.

²⁴Lɛ la ka a baaraa na ta, a saŋ O naŋ na sãã naaloŋ zaa ane faŋ zaa ane kpeɛ̃õ zaa kyɛ de a naaloŋ ko a Saa Naaŋmen.

²⁵Bonso, a ferɛɛ la ka Kirista di naaloŋ te ta a saŋ Naaŋmen naŋ na de O dɔndɔnne zaa biŋ O gbɛɛ puliŋ.

²⁶A dɔndɔn-baaraa O naŋ na sãã bare la kũũ.

²⁷Bonso, “Naaŋmen de la a boma zaa biŋ a Kirista gbɛɛ puliŋ.” Kyɛ ka a gansoŋ wa yeli, “A boma zaa be la O gbɛɛ puliŋ,” a e la weliweli ka a soba na naŋ de a boma zaa biŋ O gbɛɛ puliŋ ba poɔ.

²⁸A saŋ a Bie naŋ na wa so a boma zaa, O meŋ pãã na waa la a soba na naŋ de a boma zaa ko O soobo, a lɛ la ka Naaŋmen na dire naaloŋ a boma zaa zu.

²⁹Ka lɛ naane, wola ka a noba na naŋ de suobu a kuuni gbɛbogriŋ na e? Ka ba naŋ da koŋ e ka a kuuni leɛ-iri togitogi, bonso ka ba na ko noba suobu ba gbɛbogriŋ?

³⁰Kyɛ wola la ka te derɛ temenne eŋnɛ yelwonni poɔ wagre zaa?

³¹N yɔɔmine ane n yɔɔpuuli, a ba waa bonnoo ka N maŋ kpi la bebiri zaa yɛ yɛlɛ aŋa lɛ N naŋ ŋmeɛrɛ nyaa yɛ zuiŋ; N ŋmeɛrɛ la a nyaa ŋa a te Daana Kirista Yeezu eŋɛ.

³²Ka anaŋ da waa ka nensaaloŋ teɛretɔroo yoŋ yɛlɛ la ka N da zɔɔ ne wɛdonne a Efesu teŋɛ poɔ, boŋ tɔnɔ ka N pãã da na nyɛ? Ka ba naŋ da koŋ e ka a kuuni leɛ-iri: “Yɛ e ka te dire kyɛ nyuuro bonso, bieu te na kpi la.”

³³Yɛ ta bɛllɛ yɛmenne: “Ka fõõ tuuro kɔŋkaara, fo na mɔge la mɛmɛrɛɛ.”

³⁴Yɛ leɛ taa teɛroŋ velaa kyɛ bare yelbebe eebo. Bonso, a noba mine ba baŋ Naaŋmen togitogi. N yele la a yeli ŋa ka ka vi kpɛ yɛ.

³⁵Kyɛ neɛ kaŋ na soore la, “Wola ka ba na e ka a kuuni leɛ-iri? Eŋgane boŋ tɔ la ka ba na iri ne?”

³⁶Damboli ŋa! Bon fo naŋ bore koŋ buli ka o naŋ ba poɔ̃.

³⁷Kyɛ bon fo naŋ bore ba e a eŋɛ na o naŋ na taa, kyɛ o waa la bombiri, kaapɔge, kyi bee bombiri kaŋ.

³⁸Kyɛ Naaŋmen maŋ ko la a bombiri eŋɛ na O naŋ boɔrɔ, ka a bombiri kanzaa maŋ taa o meŋɛ eŋɛ.

³⁹Enne zaa naane yitaa, nensaalba enne taa la a boorɔ, ka donne enne taa a boorɔ, ka nuuli taa a boorɔ ka zoma meŋ taa a boorɔ.

⁴⁰Saluoni boma bebe la, ka teŋɛzu boma bebe. Kyɛ a saluoni boma taa la a veɛloŋ, ka teŋɛzu deme meŋ taa a veɛloŋ.

⁴¹A ŋmenaa taa la o veɛloŋ, ka kyuu taa o veɛloŋ, ka ŋmarbie taa a veɛloŋ. Yelmeŋɛ zaa, a ŋmarbie taa la veɛloŋ tɛɛtɛɛ.

⁴²Lɛ la ka a kuuni leɛ-iruu meŋ waa. Bon ba naŋ bore waa la bon naŋ na wɛ ka bon ba naŋ e ka o leɛ-iri ba waa bon naŋ na wɛ.

⁴³Ba maŋ bore o la ka o ba taa yuori, ka o leɛ-iri ne puubu. Ba maŋ bore o la ne bambaaloŋ, ka o leɛ-iri ne kpeɛ̃õ.

⁴⁴A nensaala eŋɛ yoŋ la ka ba maŋ ũũ kyɛ ka ba e ka o leɛ-iri ne a seeloŋ eŋɛ. Ka nensaala eŋɛ wa bebe, lɛ meŋ la ka seeloŋ eŋɛ bebe.

⁴⁵A lɛ la so ka ba da sɛge, “A nensaal-dɛndɛŋ, a Adama, da leɛ la nensaal-vore;” kyɛ ka a Adama parebaaraa[7] leɛ vooroŋ naŋ terɛ nyɔvore.

⁴⁶Kyɛ a seeloŋ naane daŋ de weɛ, a eŋɛ la daŋ de weɛ kyɛ ka a seeloŋ pãã tu.

⁴⁷A nensaal-dɛndɛŋ da yi la tɛne poɔ, a waa tɛne, ka a bayi soba yi tenvelaa.[8]

⁴⁸Aŋa lɛ a tɛne neɛ naŋ da waa, lɛ ka a banaŋ naŋ waa tɛne noba na waa. Aŋa lɛ a tenvelaa neɛ naŋ waa, lɛ la ka a banaŋ naŋ waa tenvelaa noba na waa.

⁴⁹Aŋa lɛ te naŋ taa a tɛne neɛ waaloŋ, lɛ meŋ la ka te na taa a tenvelaa neɛ waaloŋ.

⁵⁰N yɔɔmine ane n yɔɔpuuli, bon N naŋ yele la ŋa: eŋgane ane zẽẽ kontoɔ̃ di a Naaŋmen naaloŋ gbandiruŋ[9] bee ka bon naŋ na wɛ di bon naŋ koŋ baŋ wɛ gbandiruŋ.

⁵¹Yɛ kyɛllɛ, N na yeli la yelsɔglaa kaŋ ko yɛ! Te zaa koŋ kpi kyɛ ba na e la ka te zaa kyilli,

⁵²tɔntɔbaalɛ, nimiri kogruu poɔ, a eele parebaaraa naŋ wa peɛle saŋ. Bonso, ba na peɛle la a eele ka ba e ka a kuuni leɛ-iri a leɛ bon naŋ koŋ baŋ kpi kyɛ ka te meŋ kyilli.

⁵³Bonso, a ferɛɛ la ka a eŋɛ ŋa naŋ na bon poɔ̃ leɛ bon naŋ koŋ baŋ poɔ̃, ka eŋɛ naŋ na kpi leɛ bon naŋ koŋ baŋ kpi.

⁵⁴Ka a eŋɛ ŋa naŋ na poɔ̃ wa leɛ eŋɛ naŋ koŋ poɔ̃, ka eŋɛ naŋ na kpi wa leɛ eŋɛ naŋ koŋ kpi, lɛ la ka a yeluu ŋa ba naŋ sɛge biŋ na tu a tuubu: “Ba vɔle la kũũ zɔɔtoɔ̃mo poɔ.”

⁵⁵“We kũũ, yeŋ ka a fo zɔɔtoɔ̃mo be? We kũũ, yeŋ ka a fo logi tuo be?”

⁵⁶A kũũ logi tuo la yelbieri, ka yelbieri meŋ kpeɛ̃õ la a bege.

⁵⁷Kyɛ Naaŋmen seŋ ne la bareka puoruu ne O naŋ tu a te Daana Yeezu Kirista zie a ko te zɔɔtoɔ̃mo.

⁵⁸Azuiŋ, n poyɛŋ noba, yɛ are kpeɛŋaa, a ta wa leɛrɛ puori. Yɛ tonɔ a Daana toma tegitegilɛ a gɛrɛ nimitɔɔre kyɛ baŋ ka a yɛ toma koŋ waa weɛlɛ a Daana eŋɛ.