Read Southern Dagaare 1 Kor 2 Bible Online

1 Kor 2 - Southern Dagaare bible

1 Kor 2

¹N yɔɔmine ane n yɔɔpuuli, N naŋ da wa yɛ zie, N da ba de yelbitegrɛ bee yɛmbaŋ yɛlɛ moɔlɔ ne a Naaŋmen yelsɔglɔ ko yɛ.

²Bonso, N da ba boɔrɔ ka N baŋ yelzaa yi a yɛ zie, ka a Yeezu Kirista ba naŋ da kpa a dagaraa zu yɛlɛ yoŋ naane.

³Kyɛ N da wa la yɛ zie bambaaloŋ poɔ, a taa dabeɛ̃ ane eŋ-mii yaga.

⁴A n yɛlɛ yeluu ane a n Ŋmen-yelnoore moɔloo da ba waa yɛmbaŋ ane nɔnoɔ yɛlɛ, kyɛ a da wullo la a Vooroŋ Soŋ tontonne ane O kpeɛ̃õ,

⁵ka lɛ na vɛŋ ka a yɛ yeldeebo ta wa be nensaalba yɛŋ eŋɛ kyɛ a seŋ ka o be Naaŋmen kpeɛ̃õ eŋɛ.

⁶Anealɛzaa, te yɛlɛ yeluu waa la yɛmbaŋ yɛlɛ ko a banaŋ naŋ bere a Kiristaaloŋ poɔ, kyɛ a ba e a teŋɛzu yɛmbaŋ bee a teŋɛzu namine yɛmbaŋ, a banaŋ naŋ na wɛ.

⁷Kyɛ te yele la a Naaŋmen yɛmbaŋ yɛlɛ naŋ e yelsɔglɔ a ba sãã. A yɛmbaŋ ŋa la ka Naaŋmen da daŋ nare biŋ a te puubu eŋɛ kyɛ ka bonzaa da naŋ ba kyebe sɛre.

⁸A teŋɛ ŋa zu namine kanzaa da ba baŋ a yeli ŋa tɛgɛ; bonso, ka banaŋ da baŋ, ba da koŋ kpa a puubu Daana a dagaraa zu.

⁹Kyɛ aŋa lɛ ba naŋ da sɛge: “Bonna nimiri naŋ ba nyɛ bee ka toori woŋ, bee a kpɛ nensaalba sukyie, la bonna Naaŋmen naŋ nare biŋ a banaŋ naŋ nɔŋ O”;

¹⁰a boma ama la ka Naaŋmen da tu a Vooroŋ Soŋ zie a iri wuli te; bonso, a Vooroŋ Soŋ maŋ gyɛle la a boma zaa a te laŋne a Naaŋmen yelsɔgle zaa.

¹¹Nensaalbuo la baŋ nensaala poteɛrɛ ka a nensaala seɛ naŋ be a nensaala poɔŋ naane? Lɛ meŋ ne o zu la ka neɛzaa ba baŋ a Naaŋmen poteɛrɛ ka a Naaŋmen Vooroŋ yoŋ naane.

¹²Pampana te ba de a andonɛɛ vooroŋ, kyɛ te de la a Vooroŋ na naŋ yi Naaŋmen zie, ka lɛ vɛŋ ka te na toɔ̃ baŋ a kyɔɔtaare na Naaŋmen naŋ ko te.

¹³Kyɛ te ba yele a yɛlɛ ama ane yelbie ba naŋ wuli te ne nensaala bammo, kyɛ a waa la yɛlɛ a Vooroŋ Soŋ naŋ wuli te, ka te manna seeloŋ yɛlɛ korɔ banaŋ naŋ taa a Vooroŋ Soŋ.

¹⁴A banaŋ naŋ ba taa a Vooroŋ Soŋ, koŋ baŋ de a Naaŋmen Vooroŋ kyɔɔtaare, bonso, a waa la dambol-yɛlɛ ba zie, ka ba kontoɔ̃ baŋ a tɛgɛ, bonso, a Vooroŋ Soŋ yoŋ la na toɔ̃ e ka ba baŋ a tɛgɛ.

¹⁵Banaŋ naŋ taa a Vooroŋ Soŋ maŋ baŋ la a yelzaa, ka neɛzaa koŋ baŋ soore ba yelzaa.

¹⁶“Aŋ la baŋ a Daana poteɛrɛ a na toɔ̃ wuli O?” Kyɛ tenee eŋ taa la a Kirista poteɛrɛ.