Read Southern Dagaare 1 Kor 5 Bible Online

1 Kor 5 - Southern Dagaare bible

1 Kor 5

¹Ba sereŋ ko ma la duoro ka peɛ̃mo toma be la a yɛ poɔ, ka noba naŋ ba puoro Naaŋmen meŋ gba koŋ sage e a peɛ̃mo toma ŋa tɔ; bonso, neɛ kaŋ taa la o saa pɔge gana ne.

²Ka a da seŋ ka yɛ kono a kyɛ digi a neɛ ŋa naŋ e a yeli ŋa yi a yɛ poɔ. Kyɛ ka yɛ wullo yɛmenne!

³Aneazaa ka N ba be yɛ zie ane n eŋɛ, N teɛroŋ eŋ be la yɛ zie; a Daana Yeezu yuori eŋɛ, N di la a neɛ ŋa naŋ e a yeli ŋa sɛrɛɛ baare aŋa N naŋ da bebe.

⁴Saŋ na yɛ naŋ maŋ wa lantaa, ka n teɛroŋ bebe, a te Daana Yeezu kpeɛ̃õ zuiŋ,

⁵yɛ de a neɛ ŋa eŋ Setaana nuuriŋ ka o sãã a o eŋɛ, ka ka o seɛ na toɔ̃ nyɛ faabo a Daana waabo bebiri.

⁶A yɛ pɔloo ba soma. Yɛ ba baŋ ka dããbile belaa lɛ la maŋ e ka a zɔŋ ba naŋ bu zaa pi be?

⁷Yɛ pɛge a dããbel-korɔ bare, a toɔ̃ e zɔŋ-bu-paala ba naŋ ba eŋ dããbile aŋa yɛ naŋ waa lɛ. Bonso ba da de la a Kirista, a Ista pilee maale bagre.

⁸Azuiŋ, yɛ e ka te maale a tigri, kyɛ ta maale ne dããbel-korɔ, potuoloŋ ane faaloŋ dããbel-korɔ, kyɛ yɛ e ka te maale a tigri ne sonnoŋ ane yelmennoŋ naŋ waa ŋa boroboro dambo.

⁹N da sɛge la a n lɛtɛ poɔ ko yɛ ka yɛ ta laŋna ne noba naŋ tonɔ peɛ̃mo toma;

¹⁰a ba e a andonɛɛ peɛ̃mo toma, bee a bombɔ-gaŋne deme, bee a nannyig-kpeɛne, bee tebɛ deme la ka N yele, ka lɛ da la, a da na ferɛ la ka yɛ yi a andonɛɛ poɔ.

¹¹Nyɛ, N sɛgrɛ korɔ yɛ la, ka yɛ ta laŋna ne neɛzaa naŋ boɔlɔ o meŋɛ Kiristabie, a kyɛ tonɔ peɛ̃mo toma bee a waa bombɔ-gaŋne soba, bee a waa tebɛ soba, zontoorɔ, dããnyukuolo, bee nannyig-kpeɛŋaa. Yɛ gba ta laŋna dire ne a neɛ ŋa tɔ.

¹²Bonso ka N na dire noba naŋ ba waa Kiristabiiri sɛrɛɛ? A banaŋ naŋ waa Kiristabiiri sɛrɛɛ naane ka yɛ na dire be?

¹³Naaŋmen na di la a banaŋ naŋ ba waa Kiristabiiri sɛrɛɛ. “Yɛ digi a potuo soba ka o yi a yɛ poɔ.”