Read Southern Dagaare 1 Kor 6 Bible Online

1 Kor 6 - Southern Dagaare bible

1 Kor 6

¹Ka yɛ kanzaa wa taa yelbawontaa ne o tɔsoba, boŋ na wuli ka o taa o gaa ne a banaŋ naŋ ba waa Kiristabiiri zie ka ba maale a yɛlɛ, kyɛ ka a da seŋ ka o taa a yɛlɛ gaa ne a nensonne zie?

²Yɛ ba baŋ ka a nensonne la na di a andonɛɛ sɛrɛɛ be? Ka yɛnee la na di a andonɛɛ sɛrɛɛ, yɛ kontoɔ̃ di a yelbilii sɛrɛɛ be?

³Yɛ ba baŋ ka tenee la na di a malekere sɛrɛɛ be? Lɛ ka ba na wa yele a teŋɛzu yɛlɛ.

⁴Ka yɛnee pãã taa a yelbilii ama taaba, bonso, ka yɛ maŋ taa a gaa ne a banaŋ naŋ ba waa Kiristabiiri zie?

⁵N yele la a ŋaa ka n eŋ yɛ vi. Ka lɛ neɛzaa ba kye a yɛ poɔ a taa yɛŋ ka a seŋ ka o maale Kiristabie ne o tɔ yelbawontaa be?

⁶Kyɛ wola ka yɔɔ na maŋ taa o yɔɔ gaa ne sɛrediribe zie ane noba naŋ ba sage de a Kirista yɛlɛ?

⁷Serɛzaa, yɛ naŋ seɛrɛ taa a sɛrediribe zie wuli ka yɛ e fããɛ la baare. Bonso ka yɛ koŋ sage ka ba sãã yɛ poɔ kyɛ ka sɛma ba yi a poɔ? Bonso ka yɛ koŋ sage ka ba faa yɛ boma kyɛ ka yɛ vɛŋ ko ba?

⁸Kyɛ yɛmenne maŋ erɛ la faaloŋ korɔ noba kyɛ faara noba boma; a gba erɛ lɛ korɔ yɛ yɔɔmine.

⁹Yɛ mɔɔ ba baŋ ka a yelfa-erebɛ koŋ kpɛ a Naaŋmen naaloŋ be? Yɛ ta bɛllɛ yɛmenne! Banaŋ naŋ tonɔ peɛ̃mo toma, noba naŋ maala tebɛ, banaŋ naŋ tonɔ moɔrɔ toma, dɔɔ gyɛnterre, dɔbɔ naŋ maŋ gana ne ba dɔɔ taaba,

¹⁰nannyigri, a bombɔ-gaŋne deme, a dããnyukuolibo, a zontooreba, a nannyig-kpeɛne; a bama kanzaa koŋ kpɛ a Naaŋmen naaloŋ.

¹¹Kyɛ a ŋaa la ka yɛ mine da waa, kyɛ ka ba da pɛge yɛ. Yɛ da nyɛ la pɛgeyiibu, a nyɛ bo-soŋ a Daana Yeezu Kirista yuori eŋɛ ane a te Naaŋmen Vooroŋ eŋɛ.

¹²“N taa la sori ka N e yelzaa,” kyɛ a zaa naane taa tɔnɔ. “N taa la sori ka N e yelzaa,” kyɛ N koŋ sage ka kanzaa di kpeɛ̃õ N zu.

¹³“Bondiraa waa la poɔ soobo, ka a poɔ waa a bondiraa soobo,” kyɛ Naaŋmen na sãã la a bondiraa ane a puori zaa bare. A eŋɛ ba e peɛ̃mo toma bon, a Daana bon la, a Daana la so a eŋɛ.

¹⁴A Naaŋmen naŋ da e ka a Daana leɛ-iri a kuuni poɔ na e la ka te meŋ leɛ-iri a kuuni poɔ ne O kpeɛ̃õ.

¹⁵Yɛ ba baŋ ka a yɛ enne waa la a Kirista nandaare be? N pãã de a Kirista nandaare e ka a leɛ gyɛnterɛ nandaare be? A daŋ koŋ e lɛ!

¹⁶Yɛ ba baŋ ka soba na zaa naŋ laŋ gaŋ ne gyɛnterɛ ne o leɛ la eŋgan-yeni be? Bonso, ba yelee la, “A ba bayi na leɛ la eŋgan-yeni.”

¹⁷Kyɛ soba na zaa naŋ laŋ ne a Daana, laŋ ne O la ka ba waa vooroŋ yeni.

¹⁸Yɛ zagre peɛ̃mo toma! Yelbieri na zaa neɛ naŋ maŋ e ba mɔgrɔ o eŋɛ, kyɛ neɛ naŋ toŋ peɛ̃mo toma e la yelbieri mɔge o meŋɛ eŋɛ.

¹⁹Bee yɛ ba baŋ ka a yɛ enne waa la a Vooroŋ Soŋ Naaŋmen naŋ ko yɛ kpeɛbozie, ka yɛ ba la so a yɛ enne?

²⁰Ba da yɛ la ne daaroŋ naŋ ba wono, azuiŋ yɛ de a yɛ enne danna ne Naaŋmen.