Read Southern Dagaare 1 Kor 8 Bible Online

1 Kor 8 - Southern Dagaare bible

1 Kor 8

¹Pampana ŋa, a kyaare ne bondirii ba naŋ de maale ne tebɛ, aŋa ba naŋ maŋ yeli, “te zaa taa la yelbammo.” Yelbammo maŋ waana ne la pɔloo, kyɛ ka nɔmmo yɛllɛ.

²Neɛ na zaa naŋ teɛre ka o baŋ la bonkaŋ, o ba taa a yelbammo a naŋ seŋ ka o taa sɛre;

³kyɛ neɛ na zaa naŋ nɔnɔ Naaŋmen, a Naaŋmen maŋ baŋ la a soba.

⁴A lɛ zuiŋ, a kyaare ne bondirii ba naŋ maale ko tebɛ diibu yɛlɛ, te baŋ ka, “teebo zaa ba kyebe, ka ŋmen meŋ zaa ba kyebe a teŋɛzu ka a Naaŋmen yeni na yoŋ naane.”

⁵Serɛzaa, kaŋwaa ŋmemɛ yaga na baŋ be la a sazu bee a teŋɛzu; ŋmemɛ yaga ane daanema yaga sereŋ bebe la;

⁶kyɛ tenee eŋ zie, Naaŋmen yeni yoŋ la bebe, Ona la a Saa. O zie la ka a boma zaa yi kyɛ ka te voorɔ O zuiŋ. Kyɛ Daana yeni yoŋ la bebe, a Yeezu Kirista, a Onaŋ zie a boma zaa naŋ tu yi a wa bebe kyɛ ka te tu O zie a voorɔ.

⁷Neɛzaa naane taa a yelbammo ŋa. A noba mine naŋ pãã milli ne tebɛ a wa tɔ ŋaa, ba naŋ maŋ teɛre ka a bondirii ba naŋ dire waa la bondirii ba naŋ maale ko tebɛ, kyɛ a ba yɛŋ naŋ ba kyele zuiŋ, ba maŋ teɛre ka ba sããɛ la ne a tebɛ bondirii.

⁸“Bondiraa koŋ baŋ tage te peɛle Naaŋmen.” Ka tenee ba di a, a koŋ seɛ te, ka tenee di meŋ a koŋ seɛ te.

⁹Kyɛ yɛ gu yɛmenne velaa ka a yɛmenne soobo ŋa ta wa leɛ gbɛŋmɛ-le bon ko a bambaalba a yeldeebo poɔ.

¹⁰Bonso, ka noba wa nyɛ yɛnee naŋ taa yelbammo ka yɛ zeŋ tebɛ die poɔ a dire, a lɛ koŋ ko ba faŋ ka ba dire bondirii ba naŋ maale ko tebɛ, a ba teɛroŋ naŋ ba kyele zuiŋ be?

¹¹A yɛ yelbammo zuiŋ, a yelderebɛ na naŋ waa bambaalba ka a Kirista da kpi a faa, maŋ wɛ la.

¹²Kyɛ ka yɛnee wa e yelbieri sãã a yɛ yideme poɔ, a sãã a ba teɛroŋ a saŋ a ba yɛŋ naŋ ba kyele, a Kirista la ka yɛ erɛ saana.

¹³Azuiŋ ka bondiraa diibu na e ka ba faara lere, N daŋ koŋ ɔɔ nɛne zaa a ta wa e ka ba kanzaa le.