Read Southern Dagaare 1 Kor 9 Bible Online

1 Kor 9 - Southern Dagaare bible

1 Kor 9

¹N ba so n meŋɛ be? N ba waa apostolii be? N ba nyɛ a te Daana Yeezu be? Yɛnee naane a toma N naŋ toŋ a Daana eŋɛ be?

²Ka maa ba waa apostolii noba mine zie, kyɛ yɛnee eŋ zie, N waa la kaŋ. Bonso, yɛnee la a yelwulaa naŋ wuli ka N waa la apostolii a Daana eŋɛ.

³A yeli ŋa la ka N taa a na yeli faa n meŋɛ a banaŋ naŋ na gyɛle a n yɛlɛ.

⁴Te ba taa sori na nyɛ a te bondirii ane a te bonnyuuri be?

⁵Te ba taa sori ka Kirista-bipɔge naŋ kuli serɛ beɛle te aŋa ba naŋ da maŋ beɛlɛ a te apostolii taaba ane a Daana yɔɔmine ane Sefase be?

⁶Bee Banabase ane maa yoŋ la ka a ferɛ ka te ta bare a te nuuri toma kyɛ maŋ di be?

⁷Nembuo la daŋ tonɔ sogyɛ toma kyɛ maŋ leɛ de o meŋɛ libie yɔɔ ne o meŋɛ? Nembuo la daŋ sɛle dããteere kyɛ daŋ ba di a wɔne kanzaa? Bee nembuo la maŋ kyeenɛ peere kyɛ daŋ ba nyu a beroŋ?

⁸Nensaala faŋ mɔɔ la ka N yele ne a yeli ŋa be? Lɛ ne o zu naane ka a begɛ meŋ yeli be?

⁹Bonso, ba sɛge la a Moozul begɛ poɔ, “Ta leŋ a naadɛre naŋ ŋmeɛrɛ kyi noɔre.”[2] A naadɛɛ mɔɔ yɛlɛ la ferɛ Naaŋmen be?

¹⁰Bee te zuiŋ mɔɔ naane so ka O yeli a lɛ? Serɛzaa, te zuiŋ la ka ba sɛge a, bonso, neɛ naŋ koɔrɔ weɛ seŋ ka o koɔrɔ ne teɛretɔroo[3], ka neɛ naŋ ŋmeɛrɛ a kyi meŋ seŋ ka o ŋmeɛrɛ ne teɛretɔroo ka o na nyɛ la a mine.

¹¹Ka tenee bore seeloŋ bonveɛle eŋ a yɛ poɔ, a na waa la yelkpoŋ ka te nyɛ a teŋɛzu boma mine yi a yɛ zie be?

¹²Ka noba mine wa taa sori ka ba nyɛ boma yi yɛ zie, te ba taa sori gaŋ lɛ be? Kyɛ te ba e a lɛ te naŋ da taa sori ka te e, kyɛ te di la kannyiri ka te ta wa e yelzaa ka o leɛ begraa kaŋ pigi a Kirista yelnoore sori.

¹³Yɛ ba baŋ ka a banaŋ ba naŋ de ka ba tonɔ toma a Naaŋmen die poɔ maŋ nyɛ la ba bondirii yi a Naaŋmen die poɔ, ka banaŋ naŋ tonɔ a Naaŋmen bagmaalkuuri zu toma meŋ maŋ di a boma ba naŋ de tere a Naaŋmen bagmaalkuuri zu be?

¹⁴A lɛ ne o zu la ka a Daana tere noɔre ka a banaŋ naŋ moɔlɔ a Ŋmen-yelnoore seŋ ka ba nyɛrɛ a ba bondirii a yelnoore moɔloo poɔ.

¹⁵Kyɛ N daŋ ba sage e a yeli ŋa kanzaa N naŋ da taa sori ka N e, bee N ba sɛgrɛ a ŋaa ka N toɔ̃ e a lɛ. Serɛzaa, ka maa kpi, anaŋ seɛ N naŋ e a ŋaa. Neɛzaa kontoɔ̃ pigi ma sori ka N ta ire n meŋɛ yuori!

¹⁶Ka maa moɔle a Ŋmen-yelnoore, a lɛ ba ko ma sori zaa ka N ire n meŋɛ yuori, bonso, feroo toma la ka ba de dɔgle n zu. N yuori la we ka maa ba moɔle a yelnoore!

¹⁷Bonso, ka maa da erɛ a ŋaa n meŋɛ poboɔbo eŋɛ, N na nyɛ la san-yɔɔ; kyɛ ka maa meŋɛ poboɔbo naane, lɛ eŋ, feroo toma la ka ba de ko ma.

¹⁸N san-yɔɔ pãã la boŋ? Ŋa yoŋ la: ka N moɔlɔ a Ŋmen-yelnoore korɔ noba weɛlɛ, kyɛ bare a tɔnɔ na N naŋ da taa sori ka N nyɛ a yelnoore moɔloo zuiŋ.

¹⁹Aneazaa ka N so la n meŋɛ, a taa gyeremɛ a noba zaa zie, N leɛ la gbaŋgbaa ko a noba zaa, ka ka N na toɔ̃ nyɛ noba yaga ka ba leɛ Kiristabiiri.

²⁰A Gyuumine zie, N maŋ erɛ la yɛlɛ aŋa N naŋ waa Gyuu, ka N toɔ̃ nyɛ a Gyuu noba mine ko a Kirista. A banaŋ a naŋ fere ka ba tuuro seŋ a begɛ naŋ wullo lɛ zie, N maŋ erɛ la yɛlɛ aŋa a seŋ ka N tuuro a begɛ (aneazaa ka a ba fere ka N tuuro a begɛ) ka ka N na toɔ̃ nyɛ a banaŋ naŋ tuuro a begɛ ko a Kirista.

²¹A banaŋ naŋ ba waa Gyuumine zie, N maŋ erɛ la yɛlɛ aŋa N ba waa Gyuu (aneazaa ka N ba so n meŋɛ yi a Naaŋmen begɛ zie, kyɛ a Kirista begɛ la ka N tuuro) ka ka N na toɔ̃ nyɛ a banaŋ naŋ ba waa Gyuumine ko a Kirista.

²²N leɛ la bambaala, a bambaalba zie, ka ka N na toɔ̃ nyɛ a bambaalba ko a Kirista. N waa la bonzaa a noba zaa zie, ka ka anaŋ waa wola zaa, ka N na toɔ̃ faa ba mine ko a Kirista.

²³N erɛ la ama zaa a Ŋmen-yelnoore zuiŋ, ka ka N na toɔ̃ nyɛ a yelnoore maaloo.

²⁴Yɛ ba baŋ ka zogantaa poɔ, a zozoribo zaa maŋ danna la taa ka ba zaa zo baare, kyɛ ka neŋyeni yoŋ de a kyɔɔtaa be? Azuiŋ, yɛ zoro zoobu naŋ na e ka yɛ toɔ̃ nyɛ a kyɔɔtaa.

²⁵A zozoribo maŋ baŋ la bamenne taabo yelzaa poɔ. Ba maŋ erɛ la a lɛ a na de bon naŋ maŋ wɛ, kyɛ tenee deni ba weɛrɛ.

²⁶Azuiŋ, N ba zoro zoweere bee a gbuli nu ŋmeɛrɛ aŋa neɛ naŋ ŋmeɛrɛ saseɛ.

²⁷Kyɛ N dɔgrɔ la n eŋɛ, a nyɔge o taa, ka ka maa wa moɔle a Ŋmen-yelnoore ko a noba baare, ka ba ta yeli ko ma ka N ba seŋ ne.