Read Southern Dagaare 2 Kor 1 Bible Online

2 Kor 1 - Southern Dagaare bible

2 Kor 1

¹Maa Pɔɔl, a naŋ e a Naaŋmen poboɔbo ka N waa a Kirista Yeezu apostolii ane a te yɔɔ Timoti la sɛgrɛ korɔ a puoruu laŋne noba naŋ be Korinti teŋɛ poɔ, a de ne a nensonne zaa naŋ be a Akaya poɔ:

²Ka garaaseɛ ane maaroŋ naŋ yi te Saa Naaŋmen ane te Daana Yeezu Kirista zie be yɛ zie.

³Ka Naaŋmen, a te Daana Yeezu Kirista Saa, a nembaalonzoe Saa ane mooreteroo zaa Naaŋmen nyɛ puubu.

⁴Ona la maŋ moorɔ korɔ te a te woore zaa poɔ, ka ka te meŋ na toɔ̃ moore ko banaŋ naŋ be woore kanzaa poɔ ne a mooreteroo na te naŋ nyɛ yi Naaŋmen zie.

⁵Aŋa lɛ a Kirista dɔgɛɛ naŋ waa yaga a gore te, lɛ meŋ la ka a te mooreteroo gore a yi a Kirista zie.

⁶Ka ba naŋ wa dɔgrɔ te, a yɛ mooreteroo ane yɛ faabo zuiŋ la. Ka ba naŋ wa moorɔ korɔ te, a kannyiri yɛ naŋ taa a dɔgɛɛ yɛ naŋ nyɛrɛ poɔ mooreteroo la. A dɔgɛɛ ŋa ne o zu poɔ la ka te meŋ be.

⁷Te daŋ ba bonnɔ ne a teɛretɔroo[1] te naŋ taa yɛ eŋɛ, bonso, te baŋ ka yɛ naŋ laŋ ne te a te dɔgɛɛ poɔ, lɛ meŋ la ka yɛ poɔ a te mooreteroo poɔ.

⁸Yɔɔmine, te ba boɔrɔ ka yɛ be babammo poɔ a kyaare ne a woore na te naŋ da nyɛ a Ezeya poɔ, bonso, ba da dɔgre te la te zuo, ka te da ba la boɔrɔ ka te naŋ kyɛnɛ voorɔ.

⁹Serɛzaa, te da teɛre ka ba da tere la noɔre ka ba ko te, lɛnso ka te da ba la dɛle temenne faŋ, kyɛ da dɛle Naaŋmen, a soba na naŋ maŋ e ka a kuuni leɛ-iri.

¹⁰A soba na naŋ da faa te yi ne a dɔgɛɛ naŋ tɔgle kũũ, naŋ na kyɛnɛ faa te la. Ona la ka te de te teɛretɔroo zaa eŋ, ka O na la faa te la,

¹¹a yɛ meŋ naŋ poɔ a soŋnɔ te ne a yɛ puoruu, ka ka noba yaga na puori Naaŋmen bareka te zuiŋ, ne a maaloo te naŋ nyɛ yi a neŋyaga puoruu eŋɛ.

¹²Serɛzaa, a te pɔloo bon la a danseɛ te teɛroŋ naŋ dire: a te yel-erre a teŋɛzu, a gaŋ a zaa, a yɛ zie waa la yelmennoŋ ane Naaŋmen mennoŋ. A ba e nensaala yɛŋ, kyɛ a waa la a Naaŋmen garaaseɛ.

¹³Bonso, te ba sɛge bonzaa yɛ naŋ kontoɔ̃ sɔre a baŋ a tɛgɛ. N teɛretɔroo la ka yɛ baŋ a tɛgɛ a te ta a baaraa;

¹⁴a seŋ yɛ naŋ daŋ baŋ a te yɛlɛ ŋmaa tɛgɛ. A Daana Yeezu waabo bebiri te na waa la yɛ pɔloo bon aŋa yɛ naŋ waa te pɔloo bon lɛ.

¹⁵N naŋ da baŋ a ŋaa velaa zuiŋ, N da boɔrɔ la ka N daŋ wa yɛ zie ka yɛ na toɔ̃ nyɛ maaloo gbɛre boyi.

¹⁶N da boɔrɔ la ka N wa nyɛ yɛ ka maa wa gɛrɛ Masedoniya, kyɛ la yi be a wa yɛ zie ka yɛ wa soŋ ma ka N gaa Gyudiya.

¹⁷N mɔɔ da bonnɔ la a saŋ N naŋ da boɔrɔ ka N e a yeli ŋa be? N maŋ maale la n yɛlɛ ane nensaalba poboɔbo, a nare ka N laŋ yeli, “Õõ, õõ ane Ai, ai” a paretɛloŋ lɛ be?

¹⁸Aŋa Naaŋmen naŋ sereŋ taa yelmennoŋ lɛ, a te yelbiri a yɛ zie ba waa, “Õõ ane Ai.”

¹⁹Bonso, a Naaŋmen Bie Yeezu Kirista yɛlɛ te naŋ da moɔle ko yɛ, maa, Silvano ane Timoti ba e, “Õõ ane Ai”; kyɛ Ona eŋ zie a waa la, “Õõ” tegitegilɛ.

²⁰Bonso, a Yeezu Kirista poɔ la ka a Naaŋmen nɔ-eŋnee zaa nyɛ eebo. A ŋaa zuiŋ la ka te maŋ tu O zie kyɛ yeli, “Ka a e a lɛ,” ka Naaŋmen na nyɛ puubu.

²¹Kyɛ Naaŋmen la e ka te ne yɛ are kpeɛŋaa a Kirista poɔ, kyɛ ka O sɔ te kããsoŋ,

²²a eŋ te O ŋmaaroŋ, kyɛ ko te a O Vooroŋ Soŋ ka O be a te sukyie poɔ a waa a bon dɛndɛŋ O naŋ da ko te.

²³Kyɛ N boɔlɔ la Naaŋmen ka O e n danseɛ soba, a dɔgre ma, ka maa wa ŋmaara zirii. N naŋ da ba boɔrɔ ka n eŋ yɛ woore poɔ zuiŋ la ka N da ba leɛ wa a Korinti teŋɛ.

²⁴N ba boɔrɔ ka N wuli ka te dire la kpeɛ̃õ yɛ zu a yɛ yeldeebo poɔ, kyɛ te laŋ tonɔ ne yɛ la ka yɛ nyɛ popeɛloŋ, yɛ naŋ are kpeɛŋaa a yeldeebo poɔ zuiŋ.