Read Southern Dagaare 2 Kor 4 Bible Online

2 Kor 4 - Southern Dagaare bible

2 Kor 4

¹A Naaŋmen naŋ la ko te a tonnoɔre ŋa a O nembaalonzoe zuiŋ, te nuuri ba yoɔrɔ.

²Te zagre la a vi yɛlɛ na neɛ naŋ maŋ sɔgle. Te koŋ sage de nyaayɛlɛ bɛllɛ ne neɛzaa bee a ŋmaara zirii ne a Naaŋmen yelbiri, kyɛ te yele la a yɛlɛ weliweli ka a yelmeŋɛ na sãã kyɛ boɔrɔ ka neɛzaa nyɛ ka te waa la nemmenne a Naaŋmen niŋesogɔ.

³Haali ka a Ŋmen-yelnoore te naŋ moɔlɔ wa sɔgle, a banaŋ naŋ weɛrɛ zie la ka o sɔgle.

⁴A banaŋ naŋ ba sage de a Naaŋmen yɛlɛ eŋ, a teŋɛ ŋa zu ŋmen ligi la a ba teɛroŋ ka ba kontoɔ̃ nyɛ a Kirista yelnoore puubu veɛloŋ. A Kirista la taa a Naaŋmen waaloŋ.

⁵Bonso, temenne yɛlɛ naane ka te moɔlɔ; a Yeezu Kirista yɛlɛ la ka te moɔlɔ ka Ona la a Daana, kyɛ ka te waa yɛ gbaŋgbaare a Yeezu zuiŋ.

⁶Bonso, Ona la a Naaŋmen naŋ da yeli, “Vɛŋ ka veɛloŋ puri sãã ligruŋ poɔ.” Ona meŋɛ la e ka a O veɛloŋ kyaane a te sukyie poɔ, ka te na baŋ a Naaŋmen puubu na naŋ sãã a Kirista niŋesogɔ.

⁷Kyɛ te taa la a naboma ŋa yagraa dogre poɔ, a na wuli ka a kpeɛ̃õ ŋa naŋ ba taa mannoo yi la Naaŋmen zie, o ba yi te zie.

⁸Te nyɛ la dɔgɛɛ boorɔ zaa, kyɛ naŋ voorɔ; ka te teɛroŋ gyɛre, kyɛ ka te nuuri ba yoɔrɔ.

⁹Ba dɔgre te la, kyɛ ka Naaŋmen ba zagre te bare; ba ŋmɛ te la lɔɔ teŋɛ kyɛ ka te ba kpi.

¹⁰A maŋ taa a Yeezu kũũ ŋmaaroŋ a te enne poɔ tegitegilɛ ka ka a Yeezu nyɔvore meŋ na toɔ̃ sãã a te enne poɔ.

¹¹Te naŋ naŋ kyɛnɛ voorɔ, ba maŋ de te la tere kũũ a Yeezu zuiŋ ka ka a Yeezu nyɔvore na toɔ̃ sãã a te enne poɔ.

¹²Lɛnso ka kũũ zɔɔrɔ ne te nyɔvore, kyɛ ka yɛnee taa nyɔvore.

¹³Kyɛ aŋa lɛ te naŋ taa a yeldeebo vooroŋ na ne o zu naŋ kyaare ne a gansoŋ yɛlɛ, “N da sage deɛ la, lɛnso ka N da yeli”; te meŋ sage deɛ la, lɛnso ka te meŋ da yeli,

¹⁴bonso, te baŋ ka a soba na naŋ da e ka a Daana Yeezu leɛ-iri a kuuni poɔ meŋ na e la ka te laŋ ne a Yeezu leɛ-iri a kuuni poɔ, ka O taa te a laŋ ne yɛ a wa ne a O niŋesogɔ.

¹⁵Õõ, a ama zaa waa la lɛ yɛ zuiŋ ka ka a garaaseɛ na yaara tara noba yaga. Lɛ la ka a ameseɛrɛ puoruu na duoro saa ka Naaŋmen na nyɛrɛ puubu.

¹⁶Lɛnso te nuuri ba yoɔrɔ. Aneazaa ka a te enne korɔ la, kyɛ te maŋ nyɛ la faŋ paalaa bebiri zaa.

¹⁷A tuo belaa ŋa te naŋ nyɛrɛ pampana ŋa, nara te la ka te na nyɛ puubu naŋ ba taa baaroo ka ba kontoɔ̃ manne,

¹⁸bonso, te teɛroŋ ba be boma na nimiri naŋ na toɔ̃ nyɛ poɔ, kyɛ te teɛroŋ be la boma na nimiri naŋ kontoɔ̃ nyɛ poɔ. Bonso, boma na te naŋ nyɛrɛ na tɔle gaa la, kyɛ boma te naŋ ba nyɛrɛ na bebe la tegitegilɛ.