Read Southern Dagaare 2 Kor 6 Bible Online

2 Kor 6 - Southern Dagaare bible

2 Kor 6

¹Te naŋ laŋ tonɔ ne a Naaŋmen zuiŋ, te sɔrɔ la yɛ meŋ ka yɛ ta de a O garaaseɛ ka o e weɛlɛ.

²Bonso, a Naaŋmen yelee la: “A saŋ naŋ da wa ta, N da kyɛlle woŋ la a yɛ yɛlɛ, kyɛ da soŋ yɛ a faabo bebiri daare.” Yɛ nyɛ, pampana ŋa la a saŋ. Yɛ nyɛ, pampana ŋa la a faabo bebiri!

³Te ba derɛ bonzaa pigre neɛzaa sori, ka ba na ta wa nyɛ saanaa zaa a te toma poɔ,

⁴kyɛ te naŋ waa Naaŋmen tontonema, te da ko la temenne garebanyɛ yelzaa poɔ: te kannyiri yaga diibu poɔ, te dɔgɛɛ poɔ, te yelwonni poɔ, te yelwolɔ poɔ,

⁵ba naŋ ŋmɛ te, ba naŋ nyɔge te eŋ nempagdie poɔ, dɔɔne poɔ, toma poɔ, te goɔŋ-bagbiruu poɔ, te kɔŋ poɔ,

⁶te sonnoŋ poɔ, te yelbammo poɔ, te kannyiri poɔ, te nimibaaloŋ poɔ, a te seere sonnoŋ poɔ ane nɔmmo naŋ waa meŋɛ poɔ.

⁷Yelmeŋɛ yeluu poɔ ane Naaŋmen kpeɛ̃õ poɔ; a laŋ ne mennoŋ zɔɔzɔɔ-boma te naŋ taa te nuduluŋ ane nugɔɔ poɔ,

⁸yuori nyaabo poɔ ane vi poɔ, yofaa ane yovelaa poɔ. Ba erɛ te la aŋa zirŋmaareba kyɛ ka te waa yelmenne deme.

⁹Te waa ŋa noba ba naŋ ba baŋ, kyɛ ka ba baŋ te velaa zaa, aŋa noba naŋ kpiire, kyɛ ka te voorɔ, aŋa noba ba naŋ dɔgre kyɛ ba ko te.

¹⁰Aŋa noba naŋ taa posaanaa kyɛ ka te taa popeɛloŋ tegitegilɛ, aŋa noba naŋ waa nandaanema kyɛ ka te erɛ ka noba yaga leɛrɛ bondaanema, aŋa noba naŋ ba taa bonzaa kyɛ taa bonzaa.

¹¹Korinti teŋɛ deme, te yeli la yɛlɛ weliweli ko yɛ, a lori te poore ko yɛ.

¹²Te nɔŋ yɛ la ne te poɔ zaa, yɛnee la ba nɔŋ te ne yɛ poɔ zaa.

¹³Azuiŋ N yele la yɛlɛ korɔ yɛ aŋa bibiiri. Yɛ meŋ lori yɛ poore.

¹⁴Yɛ ta laŋna ne noba naŋ ba sage de a Kirista yɛlɛ. Boŋ lantaa la ka mennoŋ ane faaloŋ taa? Bee boŋ lantaa la be kyaane ane ligruŋ sogɔŋ?

¹⁵Boŋ yelwontaa la ka Kirista taa ne Setaana? Bee boŋ la ka Kiristabie ne neɛ naŋ ba sage de a Kirista yɛlɛ laŋ?

¹⁶Boŋ yelwontaa la ka Naaŋmen puoruu die taa ne tebɛ die? Bonso, te waa la a Naaŋmen-vore die; aŋa Naaŋmen naŋ da yeli: “N na kpeɛrɛ la ba poɔ, kyɛ kyɛnɛ ba sogɔŋ, N na waa la ba Naaŋmen, ka ba meŋ waa N noba.

¹⁷Azuiŋ, a Daana yelee la, yɛ wa yi ba poɔ, a wɛle yɛmenne yi ba poɔ, kyɛ ta wa toɔrɔ bonzaa naŋ waa bondɛgre; lɛ la ka N na tuori de yɛ,

¹⁸ka N waa yɛ saa, kyɛ ka yɛ waa N bidɔbɔ ane N pɔgeyaare, a Kpeɛ̃õ Zaa Daana la yele.”