Read Southern Dagaare 2 Kor 7 Bible Online

2 Kor 7 - Southern Dagaare bible

2 Kor 7

¹N poyɛŋ noba, a nɔɛ ama ba naŋ eŋ ko te zuiŋ, yɛ e ka te peere te enne ane te seere dɛgre zaa bare, a e ka sonnoŋ tori a Naaŋmen dabeɛ̃ zoobu poɔ.

²Yɛ taa te teɛroŋ a yɛ sukyie poɔ. Te da ba sãã neɛzaa, te ba eŋ neɛzaa faaloŋ poɔ, te ba faa neɛzaa bon.

³N ba yele a ŋaa a wuli ka yɛ sããɛ la, bonso, N da daŋ yelee la ka yɛ be la te sukyie poɔ, a na laŋ kpi kyɛ leɛ laŋ voorɔ.

⁴Gbɛɛ yaga ka N maŋ ŋmɛ nyaa yɛ zuiŋ, a taa pɔloo yaga yɛ zuiŋ. N paale ne la mooreteroo; a taa popeɛloŋ yaga a te dɔgɛɛ poɔ.

⁵Haali te naŋ da wa ta Masedoniya paaloŋ poɔ, a te enne da ba nyɛ pɛnnoo, kyɛ te da nyɛ la dɔgɛɛ boorɔ zaa, a zɔɔrɔ ne noba kyɛ ka dabeɛ̃ be a te sukyie poɔ.

⁶Kyɛ Naaŋmen naŋ maŋ moore ko a sukyiri gyɛremɛ deme da maa la te enne ane a Tiitu waabo.

⁷Kyɛ a ba e a o waabo yoŋ, kyɛ a mooreteroo na o naŋ da nyɛ yi yɛ zie meŋ da poɔɛ la. O naŋ da yeli ko te lɛ yɛ naŋ da nɔŋ ka yɛ nyɛ te, lɛ yɛ naŋ kono ane lɛ yɛ naŋ taa n yɛlɛ seŋ. Ka a lɛ vɛŋ ka N maaleŋ kyellɛ yaga zaa.

⁸Haali ka maa da sãã yɛ poɔ ne a lɛtɛ N naŋ da sɛge, kyɛ pampana, a ba kpɛ ma (aneazaa ka a da kpɛ ma la kyɛ N nyɛɛ la ka a lɛtɛ da sãã la yɛ poɔ ŋmaa lɛ).

⁹Pampana ŋa, N kyellɛ la, kyɛ a ba e ŋa yɛ poore naŋ da sãã zuiŋ la, kyɛ N kyellɛ la ane a yɛ posãã naŋ e ka yɛ leɛ yɛ eebo, bonso, a yɛ posaanaa da tu la Naaŋmen sori. Azuiŋ, te ba sãã yɛ sori zaa poɔ.

¹⁰Bonso, posaanaa naŋ tu Naaŋmen sori maŋ waana ne la meŋɛ leɛbo naŋ terɛ faabo kyɛ ba erɛ ka noba yele ka ba da baŋ ka lɛ. Kyɛ posaanaa naŋ tu nensaalba sori maŋ waana ne la kũũ.

¹¹Yɛ nyɛ a nimizeɛ na posaanaa naŋ tu Naaŋmen sori naŋ wa ne yɛ zie. O eɛɛ la ka yɛ taa nimizeɛ a sɔrɔ suuri diteroo a yi suuri ane dabeɛ̃ poɔ. O eɛɛ la ka yɛ nɔnɔ ka yɛ nyɛ ma, ka a yɛ enne kyerɛ ka yɛ nyɛ mennoŋ ka o bebe! Yɛ wulee la ka yɛ ba taa saanaa zaa a yɛlɛ ama poɔ.

¹²Aneazaa ka N da sɛge la a lɛtɛ ko yɛ, a da ba e ka a onaŋ soba naŋ e faa bee a onaŋ soba o naŋ sãã zuiŋ la. Kyɛ N sɛgɛɛ la ka ka yɛ na baŋ a nɔmmo na yɛ naŋ taa kyaare ne te a Naaŋmen niŋesogɔ.

¹³A ŋaa zuiŋ, te enne maaɛ la. Mooreteroo yoŋ naane ka te nyɛ, kyɛ te naŋ kyellɛ la ane a Tiitu popeɛloŋ, bonso, yɛ zaa eɛɛ la ka o teɛroŋ gaŋ ziyeni.

¹⁴Ka maa da wullo n meŋɛ yɛ zuiŋ a korɔ a Tiitu, N da ba di vi. Kyɛ a yɛlɛ zaa te naŋ da yeli ko yɛ da waa la yelmeŋɛ. Azuiŋ, a temenne te naŋ wullo a Tiitu niŋesogɔ meŋ da waa la yelmeŋɛ.

¹⁵A Tiitu sukyiri maaleŋ be la yɛ zie yaga zaa, o naŋ teɛrɛ a yɛ zaa noɔre sagoo yɛlɛ ane lɛnɛɛ yɛ naŋ da tuori de o ne dabeɛ̃ ane emmo.

¹⁶N kyellɛ la bonso, N na baŋ dɛle yɛ la yelzaa poɔ.