Read Southern Dagaare 2 Kor 9 Bible Online

2 Kor 9 - Southern Dagaare bible

2 Kor 9

¹Pampana, a ba e feroo ka N sɛge ko yɛ a kyaare ne a nensonne tonteroo yɛlɛ,

²bonso, N baŋ la lɛ a yɛ eŋɛ naŋ kyerɛ seŋ. A yɛ eŋkyeroo la a yeli naŋ so ka N taa pɔloo a yɛ zuiŋ a Masedoniya noba zie, a yele ka a Akaya teŋɛ noba nare baarɛɛ la a deyɛŋ zaa; kyɛ ka a yɛ eŋkyeroo e ka ba yaga zie vaa-iri a eŋ faŋ.

³Kyɛ N tonɔ la a yɔɔmine a yɛ zie, ka a temenne te naŋ wullo a yɛ zuiŋ a yeli ŋa poɔ ta wa e zaglaa kyɛ ka yɛ na toɔ̃ nare aŋa N naŋ daŋ yeli ka yɛ nare baarɛɛ la.

⁴Ka lɛ naane, ka a Masedoniya noba mine wa tu ma wa, a wa nyɛ ka yɛ naŋ ba nare baare, a na waa la vi kpoŋ te zie; yɛ ta vɛŋ ka ba wa yeli yelzaa kyaare ne a yɛ toma ŋa.

⁵Lɛnso ka N da teɛre ka a ferɛɛ la ka N e ka a yɔɔmine de weɛ wa yɛ zie, a wa e ka yɛ nare a kyɔɔta-yaga yɛ naŋ da eŋ noɔre ka yɛ na tere la. Ka maa wa ta ka a nare bare, ka a koŋ e feroo yeli kyɛ waa yɛmenne poboɔbo yeli.

⁶A yeli la ŋa: a soba na naŋ bore gara gara na kyɛ la belaa, ka soba na naŋ bore velaa meŋ kyɛ yaga.

⁷A seŋɛɛ la ka yɛ kanzaa maŋ tere seŋ o teɛroŋ naŋ wuli lɛ, kyɛ ka a ta waa posaanaa bee feroo, bonso, Naaŋmen nɔnɔ la neɛ naŋ tere ne popeɛloŋ.

⁸Naaŋmen na baŋ ko yɛ la maaloo boorɔ zaa ka a gore, ka yɛ na taa bonzaa ka a seŋ tegitegilɛ, a na maŋ tere yaga a tonveɛle zaa zuiŋ.

⁹Aŋa ba naŋ da sɛge lɛ: “O maŋ yaara bara la, a maŋ ko a nandaanema; a O mennoŋ bebe la tegitegilɛ.”

¹⁰A soba na naŋ terɛ a boreborɔ bomboorɔ, kyɛ terɛ bondirii, na ko yɛ la kyɛ e ka a yɛ bomboorɔ erɛ yaga, kyɛ e ka a yɛ mennoŋ kyeɛbo e yaga.

¹¹A yɛ kyɔɔtaare yaga yɛ naŋ terɛ zuiŋ, O na e la ka yɛ kpɛ naaloŋ boorɔ zaa poɔ. Lɛ la ka noba na tu te zie a puoro Naaŋmen ameseɛrɛ.

¹²Bonso, a toma ŋa yɛ naŋ tonɔ ba korɔ a nensonne ba boma ba naŋ boɔrɔ yoŋ, kyɛ o eɛɛ la ka noba yaga puoro Naaŋmen ameseɛrɛ.

¹³A tonnoɔre ŋa ba naŋ tegre nyɛ zie, yɛ maŋ puuro la Naaŋmen a yɛ Kirista yelnoore sagedeebo eŋɛ ane a yɛ kyɔɔtaa yɛ naŋ tere ka ba pono korɔ ba ane a noba zaa,

¹⁴kyɛ ka ba taa yɛ vɔlaa a puoro korɔ yɛ, a Naaŋmen garaaseɛ O naŋ ko yɛ ka o waa kpoŋ zuiŋ.

¹⁵Naaŋmen taa la ameseɛrɛ ne a O kyɔɔtaa naŋ ba taa mannoo!