Read Southern Dagaare Gal 1 Bible Online

Gal 1 - Southern Dagaare bible

Gal 1

¹Maa Pɔɔl naŋ waa apostolii (ka a ba e ka nensaalba la ko ma a toma bee ko ma a kpeɛ̃õ, kyɛ a yi la a Yeezu Kirista ane a Saa Naaŋmen naŋ e ka a Yeezu Kirista leɛ-iri yi a kũũ poɔ zie),

²ane a yɔɔmine zaa naŋ be n zie la sɛgrɛ a lɛtɛ ŋa korɔ a puoruu laŋne deme naŋ be Galesiya teŋɛ poɔ:

³Ka garaaseɛ ane maaroŋ naŋ yi a te Saa Naaŋmen ane a Daana Yeezu Kirista eŋɛ be yɛ zie.

⁴A Yeezu Kirista la de O meŋɛ tere te yelbebe zuiŋ, ka O faa te yi a zenɛ bebiri faaloŋ poɔ, a seŋ a te Saa Naaŋmen naŋ boɔrɔ lɛ.

⁵Bana la so puubu tegitegilɛ. Ameena.[1]

⁶N noɔre maaɛ la yaga ne yɛ naŋ leɛ zoro wieouŋ zaa kyɛ bara a soba na naŋ da boɔle yɛ eŋ a Kirista garaaseɛ poɔ, kyɛ leɛ tuuro yelyuo.

⁷A ba e ŋa Ŋmen-yelnoore yuo kaŋ bebe la, kyɛ a noba mine eŋnɛ yɛ la buriburi poɔ, a boɔrɔ ka ba sãã a Kirista yelnoore.

⁸Kyɛ ka teneŋ gba bee ka maleke kaŋ yi tenvelaa[2] wa moɔlɔ Ŋmen-yelnoore yuo kaŋ naŋ waa tulimo ne a onaŋ te naŋ da daŋ moɔle ko yɛ, yɛ vɛŋ ka o soba nyɛ kaa-emmo!

⁹Aŋa lɛ te naŋ da daŋ yeli, lɛ ka N la maaleŋ yele pampana, ka neɛzaa wa moɔlɔ Ŋmen-yelnoore kaŋ ka o waa tulimo ne onaŋ te naŋ da moɔle ko yɛ, yɛ vɛŋ ka a soba nyɛ kaa-emmo!

¹⁰Pampana, N mɔɔ boɔrɔ la ka nensaalba de n yɛlɛ bee ka Naaŋmen de n yɛlɛ? Bee N mɔɔ moɔrɔ la ka N pɛle nensaalba poɔ? Ka maa da naŋ kyɛnɛ pɛllɛ nensaalba poɔ, ka lɛ N da koŋ baŋ e a Kirista tontonɔ.

¹¹N yɔɔmine ane n yɔɔpuuli, N boɔrɔ la ka yɛ baŋ ka a Ŋmen-yelnoore N naŋ da moɔle ko yɛ ba yi nensaalba zie;

¹²bonso N ba de a yi nensaalba zie, bee nensaala la wuli ma, kyɛ a Yeezu Kirista meŋɛ la da iri a wuli ma.

¹³A ba e bonnoo ka yɛ da woŋ la lɛ n nyɔvore naŋ da waa a Gyuumine puoruu laŋne deme poɔ, lɛ N naŋ da dɔgrɔ a Naaŋmen puoruu laŋne deme faa zaa, a da moɔrɔ ka N sãã o bare.

¹⁴N da zanne do la zu a Gyuumine puoruu poɔ a gaŋ n pɔltaaba zaa a n noba poɔ, bonso N da e la eŋnyagroŋ soba kyaare ne a n sããkommine yelwulii.

¹⁵Kyɛ a saŋ Naaŋmen naŋ da kaa-iri ma sɛre kyɛ ka ba wa dɔge ma, O poɔ da pɛlɛɛ la ka O tu O garaaseɛ zie a boɔle ma,

¹⁶a iri a O Bidɔɔ wuli ma, ka a lɛ e ka N moɔle O yɛlɛ a Nemboore-yobo[3] poɔ. N da ba gaa te peɛre yelzaa yi neɛzaa zie,

¹⁷bee a gaa Gyɛruzɛlɛm ka N te nyɛ a banaŋ naŋ da daŋ ma leɛ a apostoliimine, kyɛ a daadaalɛ, N da gaa la Arebiya teŋɛ poɔ, a lɛ puoriŋ ka N da leɛ gaa Damasko teŋɛ.

¹⁸A yuomo ata puoriŋ, N pãã da do gaa la a Gyɛruzɛlɛm ka N te nyɛ Sefase kyɛ da be a o zie bebie pie ne anuu.

¹⁹Kyɛ N da ba nyɛ a apostolii kanzaa ka a Daana yɔɔ Gyimisi yoŋ naane.

²⁰Naaŋmen niŋesogɔŋ la ka N sɛgrɛ a yɛlɛ ama korɔ yɛ, N ba ŋmaara zirii!

²¹N pãã da gaa la Seeriya ane Silisiya tenne,

²²kyɛ a Kirista puoruu laŋne deme naŋ da be a Gyudiya poɔ da naŋ ba nyɛ ma ne nimiri;

²³kyɛ wommu yoŋ la ka ba da woŋ ka ba yeli, “A soba na naŋ da dɔgrɔ te, pampana ŋa leɛ moɔlɔ la a yeldeebo na o naŋ da moɔrɔ ka o sãã.”

²⁴Ba da puu la Naaŋmen a n zuiŋ.