Read Southern Dagaare Gal 3 Bible Online

Gal 3 - Southern Dagaare bible

Gal 3

¹Yɛnee Galesiya deme dambolo ŋa! Nembuo la de o sɔyɛlɛ bɛlle nyɔge ne yɛ? Yɛ nimiriŋ la ka ba da kpa a Yeezu Kirista a dagaraa zu!

²A yelyeni yoŋ N naŋ boɔrɔ ka N baŋ yi yɛ zie la ŋa: Yɛ nyɛ la a Vooroŋ Soŋ yi a bege toma yɛ naŋ tonɔ eŋɛ bee yɛ naŋ da sage de a yɛlɛ yɛ naŋ da woŋ zie la ka yɛ nyɛ a Vooroŋ Soŋ?

³Lɛ mɔɔ ka yɛ boli seŋ be? Yɛ naŋ da piili ne a Vooroŋ Soŋ, yɛ mɔɔ leɛ boɔrɔ la ka yɛ baare ne yɛ meŋɛ faŋ be?

⁴A yɛlɛ yaga na zaa yɛ naŋ da baŋ waa la weɛlɛ be? Serɛzaa, a koŋ baŋ waa weɛlɛ.

⁵Ka lɛ pãã, Naaŋmen maŋ ko yɛ la Vooroŋ Soŋ kyɛ tonɔ toŋkpeɛne a yɛ poɔ yɛ naŋ tonɔ a bege toma zuiŋ bee yɛ naŋ sage de bonna yɛ naŋ da woŋ la?

⁶Aŋa a Aboraham “naŋ da sage de Naaŋmen yɛlɛ ka O de o ka o e nemmeŋɛ”

⁷lɛnso, fo nyɛɛ la, banaŋ zaa naŋ sagra derɛ O yɛlɛ waa la a Aboraham nyeɛmɛ.[5]

⁸Kyɛ a gansoŋ naŋ da daŋ nyɛ ka Naaŋmen na tu la yeldeebo zie a e ka a Nemboore-yobo[6] leɛ nemmenne, o da daŋ yeli la a Ŋmen-yelnoore ko Aboraham a yele, “Fo zie la ka a Nemboore-yobo zaa na nyɛ maaloo.”

⁹A ŋaa zuiŋ, banaŋ naŋ sage de, na laŋ ne la a Aboraham naŋ da sage de nyɛ maaloo.

¹⁰Kaa-emmo tuuro la banaŋ zaa naŋ dɛle a bege toma; bonso, ba sɛgɛɛ la, “Neɛ na zaa naŋ ba tuuro bee a sage de a yɛlɛ na zaa ba naŋ sɛge eŋ a bege gane poɔ waa la neɛ ba naŋ kaa-eŋ.”

¹¹Pampana a sãã la weliweli ka neɛzaa kyebe a e nemmeŋɛ Naaŋmen niŋesogɔ a bege zuiŋ; bonso, “A soba na naŋ e nemmeŋɛ na taa la o nyɔvore ne yeldeebo.”

¹²Kyɛ a bege ba dɔgle yeldeebo zu; kyɛ aŋa lɛ ba naŋ da sɛge, “Soba na zaa naŋ tonɔ a bege toma na taa la o nyɔvore a bege poɔ.”

¹³A Kirista faa te la yi a bege kaa-emmo poɔ ne O meŋɛ naŋ leɛ neɛ ba naŋ kaa-eŋ te zuiŋ; bonso ba sɛgɛɛ la, “Soba na zaa ba naŋ yagle teɛ zu waa la neɛ ba naŋ kaa-eŋ.”

¹⁴A ŋaa da eɛɛ la ka ka a Aboraham maaloo na toɔ̃ ta a Nemboore-yobo naŋ be a Kirista Yeezu eŋɛ, kyɛ ka te na toɔ̃ tu a yeldeebo eŋɛ a nyɛ a Vooroŋ Soŋ ba naŋ da eŋ noɔre ko te.

¹⁵N yɔɔmine ane n yɔɔpuuli, N de la yɛlɛ naŋ erɛ bebiri zaa nyɔvore poɔ ka a e mannoo: neɛzaa ba taa sori ka o de yeli poɔ bee a iri yeli bare a yi neɛ naŋ sɛge o poboɔbo kyaane ne o kũũ puori yɛlɛ biŋ kyɛ kpi.

¹⁶Pampana Naaŋmen da eŋ la a nɔɛ ama ko a Aboraham ane o bie; O ba yeli, “Aboraham ane o biiri,” aŋa ba naŋ waa neŋyaga; kyɛ O da yelee la, “Fo ne fo bie” ka lɛ wuli ka neŋyeni la, Ona la a Kirista.

¹⁷A n yeluu ŋa tɛgɛ la: a bege naŋ da wa yuomo kɔɔraanaare ane lezare ne pie puoriŋ ba sãã a Naaŋmen nɔ-eŋnaa O naŋ da eŋ saŋ zaa bare, ka a lɛ vɛŋ ka a nɔ-eŋnaa waa weɛlɛ.

¹⁸Bonso, ka a gbandiruŋ[7] wa yi a bege zie wa, ka lɛ o ba la yi a nɔ-eŋnaa zie wa, kyɛ Naaŋmen de la a gbandiruŋ ko Aboraham a yi a nɔ-eŋnaa zie.

¹⁹Ka boŋ pãã so ka a bege bebe? Yelfaare zuiŋ la so ka ba da tere a bege, ka o wa bebe a te ta saŋ na a bie naŋ na wa, a onaŋ ba naŋ da eŋ a noɔre tere; ka yelmaala da tu malekere zie a biŋ a yɛlɛ ama.

²⁰Pampana, yelmaala ba maala neŋyenaa yɛlɛ, kyɛ Naaŋmen waa la yeni.

²¹A bege ne a Naaŋmen nɔ-eŋnee mɔɔ ba tuoro be? A ba waa lɛ togitogi! Bonso, ka a bege ba naŋ da tere da na baŋ e ka noba nyɛ nyɔvore, ka lɛ mennoŋ da sereŋ na baŋ tu la a bege zie wa.

²²Kyɛ a gansoŋ nyɔge la boma zaa eŋ nempagdie poɔ yelbieri kpeɛ̃õ puliŋ, ka a lɛ na e ka bonna Naaŋmen naŋ da eŋ noɔre yi yeldeebo a Yeezu Kirista eŋɛ na toɔ̃ ta a banaŋ naŋ sage de.

²³Sɛre kyɛ ka yeldeebo wa, ba da nyɔge te la eŋ nempagdie poɔ a guuro te a bege puliŋ a te ta saŋ na ba naŋ na iri a yeldeebo wuli.

²⁴Azuiŋ a bege da la te dɛndɛnnɛ a te ta saŋ a Kirista naŋ da wa, ka ka te na toɔ̃ tu yeldeebo zie nyɛ sonnoŋ.

²⁵Kyɛ pampana a yeldeebo naŋ wa, te ba la be a bege kpeɛ̃õ puliŋ,

²⁶bonso a Kirista Yeezu poɔ, yɛ zaa waa la Naaŋmen biiri a yi yeldeebo eŋɛ.

²⁷Aŋa yɛ yaga naŋ da de suobu a Kirista eŋɛ, yɛ vaare la a Kirista aŋa wagyɛ.

²⁸Azuiŋ te ba la taa Gyuu neɛ bee Giriki neɛ, a ba la taa gbaŋgbaare bee noba naŋ ba waa gbaŋgbaare, a ba la taa dɔɔ bee pɔge; bonso yɛ zaa waa la yeni a Kirista eŋɛ.

²⁹Ka fõõ wa e a Kirista soobo, ka lɛ fo waa la Aboraham bie, a e gbandire a seŋ lɛ ba naŋ da eŋ a noɔre tere.