Read Southern Dagaare EFE 1 Bible Online

EFE 1 - Southern Dagaare bible

EFE 1

¹Maa Pɔɔl, a naŋ e a Naaŋmen poboɔbo ka N waa a Yeezu Kirista apostolii la sɛgrɛ a lɛtɛ ŋa korɔ a nensonne naŋ be Efesu teŋɛ poɔ a taa yelmennoŋ a e yeni a Yeezu Kirista poɔ.

²Ka a te Saa Naaŋmen ane a Daana Yeezu Kirista garaaseɛ ane maaroŋ be yɛ zie.

³Ka a Naaŋmen, a te Daana Yeezu Kirista Saa nyɛ puubu. O na la maale te a Kirista eŋɛ ne seeloŋ maaloo boorɔ zaa naŋ be a sazu paaloŋ poɔ,

⁴aŋa lɛ O naŋ da kaa-iri te a Kirista eŋɛ kyɛ ka a tendaa wa piili, a e ka te waa nensonne naŋ koŋ taa saanaa zaa kyɛ be O niŋesogɔ nɔmmo poɔ.

⁵O daŋ narɛɛ la ka O de te ka te tu a Yeezu Kirista zie a leɛ O biiri a kyaare ne O poboɔbo,

⁶ka a e puubu ko a O garaaseɛ kyɔɔta-kpoŋ O naŋ de ko te weɛlɛ a O Poyɛŋ Bie eŋɛ.

⁷A O Poyɛŋ Bie zẽẽ zie la ka te tu nyɛ faabo, a nyɛ yelbebe sudi yi a O garaase-tɛɛtɛɛ naŋ ba poɔrɔ,

⁸O naŋ de ko te yaga lɛ. A Naaŋmen yɛmbammo ane O yɛlɛ tɛgɛ bammo eŋɛ,

⁹O vɛŋɛɛ la ka te baŋ O poboɔbo yelsɔglɔ a kyaare ne O yelboɔre O naŋ nare biŋ a Kirista eŋɛŋ.

¹⁰O narɛɛ la ka ka a saŋ wa ta, O na de la boma zaa naŋ be O poɔ lantaa, boma naŋ be sazu ane boma naŋ be a teŋɛzu.

¹¹A Kirista poɔ meŋ la ka te leɛ gbandiribe,[1] O naŋ da daŋ nare biŋ kyaare ne te a yi a soba na naŋ na toɔ̃ e yɛlɛ zaa a O poboɔbo poɔ, a kyaare ne O yelwuluu ane O poboɔbo,

¹²ka ka a te banaŋ naŋ daŋ de te teɛretɔroo[2] eŋ a Kirista eŋɛ, na de te nyɔvoɛ danna ne O yuori a korɔ O puubu.

¹³A Kirista poɔ meŋ la ka yɛ da woŋ a yelmeŋɛ yelbiri, a Ŋmen-yelnoore naŋ faa yɛ, yɛ naŋ da sage de O, a pãã nyɛ a Vooroŋ Soŋ ba naŋ da eŋ noɔre tere, ka O e yelwulaa.

¹⁴A te gbandiruŋ nɔ-eŋnaa la ŋa te naŋ taa kyaare ne a faabo te naŋ nyɛ a waa a Naaŋmen meŋɛ noba, a na danna O yuori a korɔ O puubu.

¹⁵N da woŋ la a yɛ yeldeebo yɛ naŋ taa a Yeezu Kirista eŋɛ ane a nɔmmo yɛ naŋ taa ko a nensonne zaa. A ŋaa zuiŋ

¹⁶N ba nagra ka N puori Naaŋmen bareka a yɛ zuiŋ, N naŋ maŋ wa teɛre yɛ yɛlɛ n puoruu poɔ.

¹⁷N puoro la ka a te Daana Yeezu Kirista Naaŋmen, a puubu Saa, ko yɛ yɛŋ ane yɛlɛ iri wuluu seɛ ka yɛ na toɔ̃ baŋ O.

¹⁸A ŋaa la na e ka a yɛ sukyie vɛle ka yɛ na baŋ bon naŋ la a teɛretɔroo na eŋɛ O naŋ boɔle yɛ, a baŋ bon naŋ la a nensonne gbandiruŋ bondaanoŋ,

¹⁹a baŋ a O kpeɛ̃õ naŋ ba taa mannoo naŋ be tenee a yelderebɛ zie, a seŋ a O faŋ kpoŋ naŋ tonɔ toma lɛ.

²⁰Naaŋmen kpeɛ̃õ la da tonɔ a Kirista eŋɛ saŋ na ba naŋ da e ka O leɛ-iri yi a kũũ poɔ a e ka O zeŋ a O nuduluŋ seŋ a tenvelaa[3] poɔ,

²¹a do gaŋ zukaareba, kpeɛ̃õ, gandaaloŋ ane naaloŋ zaa, a kyɛ do gaŋ yuori zaa ba naŋ pore pampana ane yuori zaa ba naŋ daŋ na pore.

²²Kyɛ O de la boma zaa biŋ a O gbɛɛ puliŋ a e ka O leɛ a boma zaa zusoba a ko a puoruu laŋne.

²³A puoruu laŋne la a Kirista eŋɛ. Ona la maŋ paale a puoruu laŋne ka o e gbuli kyɛ maŋ paale yelzaa ne O meŋɛ.