Read Southern Dagaare EFE 4 Bible Online

EFE 4 - Southern Dagaare bible

EFE 4

¹Maa naŋ waa nempɔgraa a Daana eŋɛ, sɔrɔ yɛ la ka yɛ taa a yɛ nyɔvoɛ a seŋ ne a boɔlɔ na eŋɛ ba naŋ da boɔle yɛ.

²Yɛ taa Sigruumilluu ane sumaaroŋ ane kannyiri, a nyɔgrɔ yɛmenne, a taa taa yɛlɛ ne nɔmmo,

³kyɛ moɔrɔ yɛ moɔbo zaa ka yɛ taa noɔre yeni a Vooroŋ Soŋ poɔ, ka emmaaroŋ laŋ yɛ taa.

⁴Eŋgan-yeni ane Vooroŋ Soŋ yeni la bebe, aŋa lɛ ba naŋ da boɔle yɛ eŋ teɛretɔroo[10] yeni boɔlaa poɔ,

⁵ka Daana yeni, yeldeebo yeni, suobu yeni,

⁶ane Naaŋmen yeni naŋ waa noba zaa Saa bebe, Ona la zuo nensaalba zaa, a tonɔ ba zaa zie kyɛ be ba zaa poɔ.

⁷Kyɛ ba da ko la te kanzaa garaaseɛ a seŋ lɛ a Kirista kyɔɔtaa naŋ be te eŋɛ.

⁸Lɛnso ka ba da yeli: “O naŋ da wa do sazu, O da nyɔge la noba poɔ O meŋɛ eŋɛ a do ne; O da ko la O noba kyɔɔtaare.”

⁹(Ka o naŋ wa yeli, “O da do la sazu,” a lɛ wuli ka O da sigi la a kpeemɛ poɔ a teŋɛ pareŋ meŋ.

¹⁰A soba na naŋ da sigi a kpeemɛ poɔ a teŋɛ pareŋ ne o zu la da do a sazu tɔɔre zaa a gaŋ a sazu baaraa zaa, ka ka O na paale boma zaa.)

¹¹A kyɔɔtaare O naŋ da tere da la ka ba mine na waa la apostoliimine, ka ba mine waa Ŋmen-yelmanneba, ka ba mine waa a yelbiri ŋmɛyaareba, ka ba mine waa noba naŋ kaara a yelderebɛ zu ane wulwulibo,

¹²ka ba nare a nensonne ka ba tonɔ tonsonne naŋ na meɛrɛ a Kirista eŋɛ ka O duoro zu,

¹³a te ta saŋ na te zaa naŋ na wa taa noɔre yeni a yeldeebo poɔ a baŋ a Naaŋmen Bie, a baa te ta lɛ a Kirista naŋ da ta.

¹⁴A ba la seŋ ka te naŋ waa bibiiri ka noba daara te viire ne ba wuluu sobie saseɛ zaa naŋ fuuro, ane ba nyaayɛlɛ a yi ba bɛlbɛl-sobie.

¹⁵Kyɛ a seŋ ka te yele a yelmeŋɛ ne nɔmmo, a baara yelzaa poɔ, a te waa ŋa a soba na naŋ e a te zu soba, Ona la a Kirista.

¹⁶O poɔŋ la ka a eŋɛ ziiri zaa wuo lantaa a e kpeɛŋaa ka a gyiile soŋnɔ ka a eŋɛ ziiri kanzaa tonɔ velaa, ka a eŋɛ baara a nyɔgrɔ taa ne nɔmmo.

¹⁷Pampana, N dire la a yeli ŋa danseɛ, kyɛ kpaala yɛ a Daana eŋɛ: yɛ ta la erɛ yɛlɛ aŋa a Nemboore-yobo[11] naŋ maŋ erɛ lɛ a ba teɛroŋ weere poɔ.

¹⁸A ba teɛroŋ be la lige poɔ, ka ba ba poɔ a nyɔvore Naaŋmen naŋ terɛ poɔ a ba sukyie naŋ dare kyɛ ka ba be babammo poɔ zuiŋ.

¹⁹Ba ba la zoro vi, kyɛ erɛ nemboŋyɛlɛ, a taa bombɔ-gaŋne kyɛ erɛ yeldɛgɛ boorɔ zaa.

²⁰A ŋaa naane ka yɛ zanne kyaare ne a Kirista!

²¹Serɛzaa yɛ da woŋ la O yɛlɛ, ka ba da wuli yɛ a seŋ a yelmeŋɛ naŋ be a Yeezu poɔŋ.

²²Ba da wuli yɛ la ka yɛ bare a yɛ saŋ kaŋ yelkorɔ eebo, a yɛ waaloŋ koraa na naŋ poɔ̃ ka o vɔlfaare bɛllɛ yɛ.

²³Yɛ vɛŋ ka yɛ sukyie ane yɛ teɛroŋ leɛ e paalaa,

²⁴kyɛ ka yɛ de a nyɔvo-paalaa pilli aŋa wagyɛ, ona ka ba maale ka o waaloŋ yi ne a Naaŋmen waaloŋ naŋ e mennoŋ ane sonnoŋ serɛzaa.

²⁵Azuiŋ, te naŋ pãã bare zirii ŋmaabo, yɛ vɛŋ ka te zaa maŋ yele a yelmeŋɛ korɔ taa, bonso te zaa waa la taa noba.

²⁶Ka yɛ suuri wa iri kyɛ yɛ ta e yelbieri; yɛ ta maŋ vɛŋ ka yɛ suuri iri te kpɛ ŋmenaa.

²⁷Yɛ ta bare vuo ko a sebɛlbɛllɛ.

²⁸A ferɛɛ la ka nannyigri bare zuubu, kyɛ maŋ de ba nuuri tonɔ ne toma naŋ seŋ ne, a na maŋ toɔ̃ nyɛ bonkaŋ soŋ ne a nembaalba.

²⁹Yɛ ta vɛŋ ka yelfaare yire yɛ nɔɛ poore, kyɛ yɛ maŋ yele yɛlɛ naŋ terɛ maaloo a seŋ a naŋ ferɛ lɛ, ka lɛ na vɛŋ ka a yɛ yelbie taa maaloo ko a banaŋ naŋ kyɛllɛ wono a.

³⁰Yɛ ta erɛ ka a Naaŋmen Vooroŋ Soŋ poɔ saana, Ona la a ŋmaaroŋ Naaŋmen naŋ eŋ yɛ a kyɛllɛ ne a faabo bebiri.

³¹Yɛ bare potuoloŋ boorɔ zaa, a bare sutoloŋ, suuri, gɔŋweere, yosãã ane kyiiritaa boorɔ zaa,

³²kyɛ taa nimimaaroŋ ne taa, a taa sukyiri baaloŋ, a dire suuri korɔ taa aŋa lɛ Naaŋmen naŋ di suuri ko yɛ a Kirista eŋɛ.