Read Southern Dagaare EFE 5 Bible Online

EFE 5 - Southern Dagaare bible

EFE 5

¹Azuiŋ, yɛ tɔglɔ Naaŋmen yɛ naŋ waa O poyɛŋ biiri,

²a taa nɔmmo aŋa lɛ a Kirista naŋ da nɔŋ te lɛ, a de O meŋɛ tere ka ba maale ne bagre naŋ nyuuro noɔ Naaŋmen zie.

³Kyɛ peɛ̃mo toma ane dɛgre boorɔ zaa, bee bieri gba ba seŋ ka ba porɔ a yɛ poɔ, aŋa a naŋ ba seŋ ka a lɛ be a nensonne poɔ.

⁴Yɛ ta vɛŋ ka vi yɛlɛ, dambol-yɛlɛ ane kɔkɔr-yɛlɛ yire yɛ zie togitogi, kyɛ yɛ vɛŋ ka bareka puoro la yire yɛ zie.

⁵Yɛ baŋ a yeli ŋa velaa, ka neɛ naŋ tonɔ peɛ̃mo toma, bee nendɛgre bee bombɔ-gaŋne soba (a tɛgɛ la neɛ naŋ be tebɛ yɛlɛ poɔ) ba taa gbandiruŋ[12] a Kirista ane a Naaŋmen naaloŋ poɔ.

⁶Yɛ ta vɛŋ ka neɛzaa bɛlle yɛ ne yelfoglo, bonso a yɛlɛ ama zuiŋ la ka Naaŋmen supuriyaaraa waana a banaŋ naŋ zagra O noɔre eŋɛ.

⁷Azuiŋ yɛ ta laŋna ne ba.

⁸Bonso, saŋ kaŋ yɛ da be la ligruŋ poɔ kyɛ pampana, a Daana eŋɛ, yɛ be la kyaane poɔ. Yɛ taa yɛ nyɔvoɛ aŋa kyaane biiri,

⁹bonso, ba maŋ nyɛ la a kyaane yel-erre yelzaa naŋ soma, ane yelzaa naŋ tori ane yelzaa naŋ e yelmeŋɛ poɔ.

¹⁰Yɛ e aneɛ kyɛ bɔ a baŋ yɛlɛ naŋ pɛllɛ a Daana poɔ.

¹¹Yɛ ta de yɛ nu poɔrɔ a ligruŋ toma naŋ ba taa tɔnɔ poɔ, kyɛ yɛ maŋ wuo a pare ka a yi sãã.

¹²Bonso, a e la vi ka neɛ yeli a yɛlɛ ama taaba noba naŋ maŋ sɔglɔ erɛ,

¹³kyɛ yɛlɛ na zaa a kyaane naŋ maŋ wa iri wuli maŋ sãã la ka ba nyɛ,

¹⁴bonso, bonzaa naŋ maŋ wa sãã waa la kyaane. Azuiŋ la ka ba yeli: “Gɔŋgbire, iri! Iri a kũũ poɔ, ka a Kirista kyaane eŋ fo.”

¹⁵A lɛ zuiŋ yɛ baŋ yɛ gbɛkyɛnne, a ta erɛ yɛlɛ aŋa noba naŋ ba taa yɛŋ, kyɛ yɛ erɛ ŋa yɛmbaŋnema,

¹⁶a tonɔ tonsonne a saŋ ŋa poɔ, bonso, a bebie waa la faa.

¹⁷A lɛ zuiŋ, yɛ ta waa dambolo, kyɛ yɛ baŋ bon a Daana poboɔbo naŋ waa.

¹⁸Yɛ ta nyu dãã kuoli, bonso a lɛ e la faaloŋ; kyɛ yɛ paale ne a Vooroŋ Soŋ,

¹⁹a yiele dannoo yiele ane puubu yiele ane seeloŋ poɔ yiele a yɛ poɔ. Yɛ yiele ne kɔkɔnoɔ a danna a Daana yɛ sukyie poore,

²⁰a puoro a Saa Naaŋmen bareka tegitegilɛ yelzaa poɔ a te Daana Yeezu Kirista yuori eŋɛ.

²¹Yɛ sigre yɛmenne korɔ taa, yɛ naŋ ennɛ a Kirista zuiŋ.

²²Pɔgebɔ yɛ sigre yɛmenne korɔ yɛ serebɛ aŋa yɛ naŋ sigre yɛmenne korɔ a Daana lɛ.

²³Bonso, a serɛ la a pɔge zu soba aŋa a Kirista naŋ e a puoruu laŋne zu soba lɛ. Ona la a puoruu laŋne Faara.

²⁴Aŋa lɛ a puoruu laŋne naŋ sigre o meŋɛ korɔ a Kirista, a lɛ meŋ la ka a seŋ ka pɔgeba sigre bamenne korɔ ba serebɛ yelzaa poɔ.

²⁵Serebɛ, yɛ nɔŋ yɛ pɔgeba, aŋa lɛ a Kirista naŋ da nɔŋ a puoruu laŋne a de O meŋɛ tere a puoruu laŋne zuiŋ,

²⁶ka ka O de a yelbiri pɛge ne o aŋa koɔ̃ ka o e soŋ.

²⁷Lɛ la ka O na toɔ̃ de a puoruu laŋne ka o veɛlɛ a nyegrɛ ko O meŋɛ, ka o ta taa mhal[13] bee nyoremɔ bee faaloŋ zaa. Õõ, lɛ la ka a puoruu laŋne na waa soŋ a ba taa dɛgre zaa.

²⁸A lɛ meŋ ne o zu, serebɛ yɛ nɔŋ yɛ pɔgeba aŋa lɛ yɛ naŋ nɔŋ yɛmenne enne. Soba na zaa naŋ nɔŋ o pɔge nɔŋ la o meŋɛ.

²⁹Bonso, neɛzaa ba kyiire o meŋɛ eŋɛ, kyɛ o maŋ guolo la a o eŋɛ a kaara o zu velaa, aŋa lɛ a Kirista naŋ erɛ korɔ a puoruu laŋne,

³⁰te naŋ waa O eŋɛ nandaare zuiŋ.

³¹“A ŋaa zuiŋ la ka dɔɔ na maŋ bare o saa ane o ma, kyɛ laŋ ne o pɔge ka a ba bayi leɛ eŋgan-yeni.”

³²A yeli ŋa e la yelsɔgl-kpoŋ ka N de a Kirista ane a puoruu laŋne yɛlɛ manna ne.

³³A naŋ waa lɛ, yɛ kanzaa seŋ ka o nɔŋ o pɔge aŋa o meŋɛ, ka a pɔge meŋ ennɛ a o serɛ.