Read Southern Dagaare EFE 6 Bible Online

EFE 6 - Southern Dagaare bible

EFE 6

¹Bibiiri, yɛ sagra a yɛ dɔgrebɔ nɔɛ a Daana eŋɛ, bonso, a ŋaa e la yelvelaa.

²“Ennɛ fo saa ne fo ma.” A ŋa la a nɔ-dɛndɛŋ naŋ taa noɔre emmo:

³“lɛ ka fo yɛlɛ na kyɛnɛ velaa, kyɛ ka fo taa nyɔvo-tɔɔre a teŋɛzu.”

⁴Saa mine, yɛ ta erɛ ka a yɛ biiri suuri ire, kyɛ yɛ guoli ba ne toori-tagebo ane a Daana wuluu.

⁵Gbaŋgbaare, yɛ sagra noba naŋ so yɛ a teŋɛzu nɔɛ, a ennɛ kyɛ zoro ba ane sukyiri yeni aŋa lɛ yɛ naŋ sagra a Kirista noɔre.

⁶Ka a ta e ŋa saŋ na ba naŋ kaara yɛ yoŋ, bee yɛ naŋ boɔrɔ ka yɛ pɛllɛ ba poɔ zuiŋ, kyɛ yɛ erɛ a lɛ yɛ naŋ waa a Kirista gbaŋgbaare naŋ tonɔ a Naaŋmen poboɔbo ne yɛ sukyie zaa.

⁷Yɛ tonɔ toma ne yɛ poɔ zaa aŋa yɛ naŋ tonɔ korɔ a Daana, kyɛ ka a ta waa ŋa yɛ tonɔ korɔ la dɔbɔ ane pɔgeba.

⁸Te baŋ ka tonsonne zaa te naŋ tonɔ te na nyɛ la a tɔnɔ ne a zu yi a Daana zie, ka te waa la gbaŋgbaare bee ka te so la temenne.

⁹Yɛ banaŋ meŋ naŋ so a gbaŋgbaare, yɛ erɛ a lɛ ne o zu korɔ a gbaŋgbaare. Yɛ ta maŋ toɔrɔ dabeɛ̃ ennɛ ba, bonso, yɛ baŋ ka yɛ zaa taa la Daana yeni naŋ be tenvelaa[14] poɔ naŋ ba erɛ nɔnne.

¹⁰A baaraa zaa, yɛ are kpeɛŋaa a Daana eŋɛ, a taa faŋ a O kpeɛ̃õ poɔ.

¹¹Yɛ de a Naaŋmen zɔɔzɔɔ-boma zaa yɛre, ka ka yɛ na toɔ̃ zɔɔtoɔ̃ a sebɛlbɛllɛ nyaayɛlɛ.

¹²Bonso, a dɔndɔnne te naŋ zɔɔrɔ ne ba waa nensaalba naŋ taa zẽẽ ane eŋgama, kyɛ te zɔɔrɔ ne la namine, a zɔɔrɔ ne kpeɛ̃õ deme, a zɔɔrɔ ne seeloŋ poɔ kpeɛ̃õ deme naŋ waa a pampana teŋɛzu ligruŋ, a zɔɔrɔ ne sefaare naŋ be a sazu ziiri zaa.

¹³Azuiŋ, yɛ de a Naaŋmen zɔɔzɔɔ-boma zaa yɛre, ka yɛ na toɔ̃ are a bebi-faare na daare, ka yɛneŋ wa e a yɛlɛ zaa baare, yɛ na toɔ̃ are la kpeɛŋaa.

¹⁴Azuiŋ yɛ pãã are kpeɛŋaa kyɛ leŋ a yelmeŋɛ yɛ seereŋ aŋa kpagre, a su a mennoŋ aŋa zɔɔre kparoo ba naŋ maŋ su pɔge a nyaa.

¹⁵Ka yɛ nɔɔteɛ yɛ naŋ eŋ e bon naŋ na soŋ yɛ ka yɛ toɔ̃ moɔle a emmaaroŋ yelnoore.

¹⁶A ama zaa puoriŋ, yɛ taa a yeldeebo bon naŋ guuro yɛ, ona la ka yɛ na toɔ̃ de kpinni ne a faaloŋ soba vũũ piime zaa.

¹⁷Yɛ de a faabo kpogli vɔgle yɛ zu kyɛ de a Vooroŋ Soŋ zɔɔzɔɔ-soɔ, ona la a Naaŋmen yelbiri.

¹⁸Yɛ puoruu zaa ane yɛ sɔroo zaa poɔ, yɛ puoro a Vooroŋ Soŋ poɔ tegitegilɛ. A ŋaa zuiŋ yɛ gu yɛmenne velaa, a kpimare puoro korɔ a nensonne tegitegilɛ.

¹⁹Yɛ puoro korɔ ma, ka ka maa wa yele yɛlɛ, ka Naaŋmen ko ma O yelbie ka N moɔlɔ a O yelnoore yelsɔglɔ kyɛ ta zoro dabeɛ̃,

²⁰bonso, a eŋɛ la ka N waa neɛ naŋ are a Kirista gbɛbogriŋ ka ba leŋ ne banzɔlɔ. Yɛ puoro korɔ ma ka n maŋ moɔle a yelbiri kyɛ ta zoro dabeɛ̃.

²¹A Takyiku na wa manne la a yɛlɛ zaa ko yɛ ka yɛ baŋ lɛ a naŋ waa ko ma ane bon N naŋ erɛ. O e la te yɔɔ-nɔnaa kyɛ e tontonɔ naŋ taa yelmeŋɛ a Daana eŋɛ.

²²A yeli ŋa zuiŋ la ka N tonɔ o yɛ zie, ka o wa vɛŋ ka yɛ baŋ lɛ a naŋ waa ko te, kyɛ yeli yɛlɛ teɛ yɛ sukyie.

²³Ka maaroŋ, nɔmmo ane yeldeebo naŋ yi a Saa Naaŋmen ane a Daana Yeezu Kirista zie be yɛ ne a noba zaa zie.

²⁴Ka Naaŋmen garaaseɛ be a yɛ zie, a yɛ banaŋ zaa naŋ nɔŋ a Daana Yeezu Kirista ne nɔmmo naŋ ba kpiire.