Read Southern Dagaare Fil 1 Bible Online

Fil 1 - Southern Dagaare bible

Fil 1

¹Maa Pɔɔl ane Timoti naŋ e a Kirista Yeezu tontonema la sɛgrɛ a lɛtɛ korɔ a nensonne zaa naŋ be a Kirista Yeezu eŋɛ a de ne a besɔp[1] mine ane a diikin[2] mine naŋ be a Filipae teŋɛ poɔ:

²Ka a te Saa Naaŋmen ane a Daana Yeezu Kirista garaaseɛ ane maaroŋ be yɛ zie.

³N maŋ puori la Naaŋmen bareka saŋ na zaa N naŋ maŋ wa teɛrɛ yɛ yɛlɛ,

⁴a maŋ puoro ne popeɛloŋ korɔ yɛ zaa tegitegilɛ a n puoruu zaa poɔ,

⁵yɛ naŋ poɔ soŋnɔ tonɔ a Ŋmen-yelnoore toma a yi a piiluu saŋ a wa tɔ a pampana zuiŋ.

⁶N ba bonnɔ ne a yeli ŋa, ka a soba na naŋ da piili a tonsoŋ yɛ poɔ na toŋ a la ka a te baare, a te ta a Yeezu Kirista waabo daare.

⁷A seŋɛɛ la ka N teɛrɛ a yɛ zaa yɛlɛ ŋaa, bonso, yɛ taa la n yɛlɛ yɛ sukyie poore, N ne yɛ zaa naŋ taa a Naaŋmen garaaseɛ zuiŋ, N naŋ da be nempagdie poɔ ane saŋ na zaa N naŋ da zɔɔrɔ a Ŋmen-yelnoore zuiŋ.

⁸Bonso, Naaŋmen di la N danseɛ ne lɛ N naŋ kpiire yɛ yɛlɛ ne a Kirista Yeezu nembaalonzoe.

⁹A n puoruu la ŋa, ka ka a yɛ nɔmmo la maaleŋ baara yaga yaga zaa kyɛ paale ne yelbammo ane yɛlɛ tɛgɛ bammo,

¹⁰ka a soŋ yɛ ka yɛ maŋ toɔ̃ kaa-iri yeli naŋ soma, ka a Kirista waabo daare ka yɛ e noba naŋ waa soŋ a ba taa saanaa zaa,

¹¹a taa a Yeezu Kirista mennoŋ, a Naaŋmen puubu ane O dannoo zuiŋ.

¹²N poyɛŋ noba, N boɔrɔ la ka yɛ baŋ ka a yɛlɛ na naŋ pɔge ma sereŋ soŋɛɛ la ka a Ŋmen-yelnoore ŋmɛyaare,

¹³ka a lɛ vɛŋ ka a nakpoŋ yiri guguribo ane a noba kyɛlɛɛ na zaa baŋ ka a Kirista zuiŋ la ka ba nyɔge ma eŋ a nempagdie poɔ.

¹⁴A N pɔgebo ŋa vɛŋɛɛ la ka a yɔɔmine ane a yɔɔpuuli yaga zie ba bonnɔ a Daana eŋɛŋ kyɛ moɔlɔ a yelbiri ne gandaaloŋ kyɛ ba zoro dabeɛ̃ zaa.

¹⁵A noba mine moɔlɔ la a Kirista yɛlɛ ne nyuuri ane yentaaloŋ, kyɛ ka ba mine moɔlɔ ne teɛroŋ soŋ.

¹⁶A bama moɔlɔ la a Kirista yɛlɛ ne nɔmmo, a baŋ ka ba eŋ ma la a kyɛ N naŋ zɔɔrɔ a Ŋmen-yelnoore zɔɔre zuiŋ.

¹⁷A banaŋ eŋ moɔlɔ la a Kirista yɛlɛ bamenne boɔbo yɛlɛ, ba ba moɔlɔ ne teɛroŋ soŋ, kyɛ ba teɛroŋ la ka ba e ka a n dɔgroŋ do zu a nempagdie poɔ.

¹⁸Boŋ ka a lɛ na e? Ka a naŋ waa wola zaa, ka ba moɔlɔ la a Kirista yɛlɛ ne teɛroŋ faa bee teɛroŋ soŋ, kyɛ ba moɔlɔ la O yɛlɛ ka N poɔ pɛllɛ ne a lɛ. Serɛzaa, N na kyɛnɛ kyellɛ la,

¹⁹bonso, N baŋ ka a yɛ puoruu ane a Yeezu Kirista Vooroŋ na soŋ la ka a yeli ŋa wa ne n faabo.

²⁰N kyɛllɛ ne la n poɔ zaa ane teɛretɔroo[3] ka N koŋ di vi yelzaa poɔ, kyɛ N naŋ yele a yɛlɛ a ba zoro dabeɛ̃ togitogi zaa zuiŋ, a Kirista na nyɛ la puubu pampana aŋa lɛ O naŋ maŋ nyɛ puubu n eŋɛŋ tegitegilɛ, ka N voorɔ la bee ka N kpie la.

²¹Bonso, maa eŋ zie, ka maa voorɔ, N voorɔ korɔ la a Kirista, ka maa kpi meŋ, a na e la tɔnɔ ko ma.

²²Ka maa na voorɔ a n eŋgane poɔ, a wuli ka N taa la toma naŋ taa tɔnɔ, kyɛ N ba baŋ a onaŋ soba N naŋ na iri.

²³A ama ayi feere ma la yaga zaa: N boɔrɔ la ka N yi a kyɛ a te be a Kirista zie, bonso a lɛ la seɛ yaga zaa;

²⁴kyɛ ka maa naŋ kyɛnɛ be a eŋgane poɔ, a lɛ la ferɛ yaga yɛ zuiŋ.

²⁵N naŋ baŋ a yeli ŋa ta zuiŋ, N baŋ ka N na kyɛnɛ be la yɛ zaa zie, a yɛ niŋe gaabo ane a yɛ popeɛloŋ a yeldeebo poɔ zuiŋ,

²⁶ka ka N na poɔ yɛ poɔ ka te erɛ pɔloo a Kirista Yeezu eŋɛ ka maa wa leɛ wa yɛ zie.

²⁷Yeli yoŋ naŋ ferɛ la ka yɛ taa a yɛ nyɔvoɛ ka a seŋ ne lɛ a Kirista yelnoore naŋ wullo, ka maa wa nyɛ yɛ bee ka maa ba wa, kyɛ woŋ yɛ yɛlɛ, N na baŋ ka yɛ are la kpeɛŋaa ne noɔre yeni, a laŋ moɔrɔ ne teɛroŋ yeni a kyaare ne a Ŋmen-yelnoore yeldeebo,

²⁸ka a yɛ dɔndɔnne koŋ baŋ tɔ dabeɛ̃ eŋ yɛ sori zaa poɔ. Bana eŋ zie a ŋaa e la yelwulaa naŋ wullo ba weɛbo, kyɛ wullo yɛnee faabo. A Naaŋmen tontonne la a zaa.

²⁹Bonso, O ko yɛ la sori ne O poɔ zaa, ka ka yɛ na ta sage de a Kirista yɛlɛ yoŋ, kyɛ yɛ na dire la dɔgɛɛ O zuiŋ meŋ;

³⁰yɛ naŋ dire a dɔgɛɛ na ne a zu yɛ naŋ da nyɛ ka N di kyɛ woŋ pampana ka N naŋ kyɛnɛ dire a la.