Read Southern Dagaare Fil 2 Bible Online

Fil 2 - Southern Dagaare bible

Fil 2

¹Ka yelteɛbo zaa wa be a Kirista eŋɛ, ka sumaaroŋ zaa yi a O nɔmmo poɔ, ka poŋ ko taa zaa be a Vooroŋ Soŋ eŋɛ, ka nyonono ane mooreteroo zaa bebe,

²yɛ vɛŋ ka n popeɛloŋ paale: yɛ taa teɛroŋ yeni, a taa nɔmmo yeni, a taa noɔre yeni ane teɛroŋ yeni.

³Yɛ ta e yelzaa yɛmenne bombɔ-faare bee pɔloo zuiŋ, kyɛ meŋɛ sigruu poɔ, yɛ maŋ kaa yɛ taaba ka ba seɛ yɛmenne.

⁴Yɛ ta maŋ vɛŋ ka yɛ kanzaa kaara o meŋɛ yoŋ yɛlɛ zie, kyɛ yɛ maŋ kaara yɛ taaba meŋ yɛlɛ zie.

⁵Yɛ vɛŋ ka a teɛroŋ na naŋ da be a Kirista Yeezu zie ne o zu be yɛ zie,

⁶Ona, aneazaa ka O da taa la Naaŋmen waaloŋ, kyɛ O da ba de ka O ne Naaŋmen seŋ la taa ka a e bon O naŋ na nyɔge mare taa,

⁷kyɛ O da ba de O meŋɛ ka o waa bonzaa, kyɛ da de gbaŋgbaa waaloŋ, ka ba dɔge O ka O waa nensaala. Ba naŋ da nyɛ O ka O taa nensaala waaloŋ

⁸O da sigri la O meŋɛ, a da sagra noɔre a te ta saŋ O naŋ kpi; a gba te kpi dagaraa zu.

⁹A lɛ zuiŋ, Naaŋmen meŋ da zɛge O la ka O do saa yaga zaa a da ko O yuori naŋ gaŋ yuori zaa,

¹⁰ka ka a Yeezu yuori eŋɛ ka dumo zaa na gbi, a sazu poɔ, a teŋɛzu ane a teŋɛ pareŋ,

¹¹kyɛ ka zele zaa yeli ka Yeezu Kirista la a Daana ka a e puubu ko a Saa Naaŋmen.

¹²Azuiŋ n poyɛŋ noba, aŋa lɛ yɛ naŋ maŋ sagra n noɔre tegitegilɛ, ka a ba e ka a saŋ N naŋ maŋ be yɛ zie yoŋ la, kyɛ a gaŋ a zaa, saŋ na N naŋ ba maŋ wa be yɛ zie, yɛ tonɔ a yɛ faabo toma ane Naaŋmen emmo dabeɛ̃ ane miimu;

¹³bonso, Naaŋmen la tonɔ O toma yɛ poɔ, a maŋ soŋnɔ yɛ ka yɛ boɔrɔ kyɛ tonɔ a O popɛle toma.

¹⁴Yɛ erɛ yelzaa kyɛ ta ŋmoonɔ yɛlɛ bee a ŋmeɛrɛ nɔkpeɛne,

¹⁵ka yɛ na e noba naŋ ba taa saanaa zaa a e noba naŋ ba baŋ yelzaa, a waa Naaŋmen biiri naŋ ba taa saanaa zaa yɛ naŋ kpeɛrɛ neŋgoloŋ-goloŋ ane noba naŋ tuli a ba derɛ Naaŋmen yɛlɛ poɔŋ. Ba poɔŋ la ka yɛ nyegrɛ aŋa ŋmarbie a tendaa zu.

¹⁶A lɛ yɛ naŋ kpimare a nyɔvore yelbiri la na e ka N ŋmeɛrɛ nyaa a Kirista waabo bebiri ka a n zoobu ba e weɛlɛ bee ka a n toma e weɛlɛ.

¹⁷Kyɛ haali ka ba naŋ kyiri n zẽẽ bare aŋa bagmaale koɔ̃ ba naŋ bara, a yɛ Naaŋmen bagmaale ane a yɛ yeldeebo kyɔɔtaare teroo zuiŋ, n poɔ na pɛle la ka N kyellɛ a yɛ zaa zuiŋ;

¹⁸a lɛ ne o zu meŋ la ka a fere ka yɛ poore pɛle ka yɛ laŋ ne ma kyellɛ.

¹⁹A koŋ kɔɔre kyɛ N taa la teɛroŋ a Daana Yeezu eŋɛ ka N toŋ Timoti yɛ zie, ka ka N na nyɛ popeɛloŋ, ka maa wa woŋ yɛlɛ kyaare ne yɛ.

²⁰N ba taa neɛzaa aŋa a Timoti naŋ taa a yɛ maaloo yɛlɛ ne o poɔ zaa lɛ.

²¹Ba zaa kaara la bamenne yɛlɛ zie, ba ba kaara a Yeezu Kirista yɛlɛ zie.

²²Kyɛ yɛ baŋ la a Timoti tɔnɔ naŋ seŋ lɛ, aŋa bie ne o saa, o da laŋ tonɔ ne ma la a Ŋmen-yelnoore toma poɔ.

²³Azuiŋ, N moɔrɔ la ka N toŋ o wieouŋ, ka maa wa nyɛ lɛ yɛlɛ naŋ waa n zie,

²⁴kyɛ ka a Daana wa sage a koŋ kɔɔre kyɛ ka N wa yɛ zie.

²⁵N naŋ kyɛnɛ teɛrɛ la ka N toŋ Epafiroditu ka o wa yɛ zie. O e la n yɔɔ ane n tontontɔ ane n sogyɛ tɔ, a waa yɛ tontonɔ kyɛ waa n soŋnɔ n toɔrɔ poɔ;

²⁶bonso, o da boɔrɔ la ka o wa nyɛ yɛ zaa, kyɛ o poɔ da sãã la yaga ne yɛ naŋ da woŋ ka o beɛrɛ la.

²⁷Serɛzaa, o da beɛrɛ la yaga a da kyɛre belaa na kpi. Kyɛ Naaŋmen da zo la o nembaaloŋ, kyɛ o yoŋ nembaaloŋ naane ka O da zo, O da zo la n meŋ nembaaloŋ ka ka n ta taa posaanaa dɔglɔ taa.

²⁸Azuiŋ, N kyerɛ la yaga ka N toŋ o, ka ka yɛ na taa popeɛloŋ ka yɛneŋ wa nyɛ o, ka N ta la kyerɛ.

²⁹Azuiŋ yɛ tuori de o a Daana eŋɛ ne popeɛloŋ, kyɛ eŋnɛ a noba bama taaba,

³⁰o naŋ da bɛ a wa peɛlɛ kũũ a Kirista toma zuiŋ, o ba zo kũũ kyɛ leɛre yɛ zu a toŋ toma na yɛ naŋ da kontoɔ̃ toŋ ko ma.