Read Southern Dagaare Fil 3 Bible Online

Fil 3 - Southern Dagaare bible

Fil 3

¹A baaraa zaa, n yɔɔmine ane n yɔɔpuuli, yɛ kyellɛ a Daana eŋɛ. A ba waa toɔrɔ ko ma ka N la sɛge a yɛlɛ ŋa ne a zu ko yɛ, kyɛ yɛnee eŋ zie a e la yɛlɛ naŋ na guuro yɛ velaa.

²Yɛ gu yɛmenne yi a nensaal-baare zie, a gu yɛmenne yi a yelfa-erebɛ zie, a gu yɛmenne yi a banaŋ naŋ maŋ kyerɛ noba eŋgama zie!

³Bonso, tenee la a banaŋ dɛgre ba naŋ iri, ka te puoro Naaŋmen a O Vooroŋ poɔ, kyɛ erɛ pɔloo a Kirista Yeezu eŋɛ kyɛ ba dɛle a eŋgane;

⁴aneazaa ka N meŋ taa la bon naŋ so ka N taa bambaare a eŋgane eŋɛ. Ka neɛzaa wa teɛre ka o taa la bon naŋ so ka o taa bambaare a eŋgane eŋɛ, N taa la sori gaŋ lɛ.

⁵Ba da iri la N dɛgre a bebie anii daare, ka N waa a Izerayɛl boorɔ neɛ naŋ yi a Bɛŋgyamen boorɔ poɔ, a waa Hiburu neɛ Hiburu noba naŋ dɔge; a waa Farazii neɛ a kyaare ne a bege,

⁶a da kyerɛ ka N dɔgre a puoruu laŋne noba; a kyaare ne mennoŋ yɛlɛ, N da waa la neɛ naŋ ba taa saanaa zaa a bege puliŋ.

⁷Kyɛ tɔnɔ na zaa N naŋ da nyɛ, N de a la ka a waa zaglaa a Kirista zuiŋ.

⁸A gaŋ a lɛ, N de la bonzaa ka a e zaglaa lɛ, bonso, a Kirista Yeezu N naŋ baŋ ka O waa n Daana seɛ la yaga zaa a gaŋ a anaŋ zaa N naŋ da taa. A Kirista zuiŋ N kɔŋ la bonzaa, a nyɛ ka a ba taa tɔnɔ ka ka N na toɔ̃ de a Kirista yɛlɛ,

⁹a be O eŋɛŋ a ta taa n meŋɛ mennoŋ naŋ yi a bege poɔ, kyɛ ka N taa mennoŋ naŋ yi a yeldeebo N naŋ taa a Kirista eŋɛ. A Naaŋmen mennoŋ naŋ yi yeldeebo eŋɛ.

¹⁰N boɔrɔ la ka N baŋ a Kirista ane a O kũũ poɔ leɛ-iruu kpeɛ̃õ, kyɛ laŋ ne O di dɔgɛɛ a waa ŋa lɛ O naŋ da waa a O kũũ poɔ,

¹¹ka a naŋ e wola zaa ka N toɔ̃ poɔ a kũũ leɛ-iruu poɔ.

¹²A ba e ŋa N nyɛ la a yeli ŋa baare, bee a ta N taabo zie; kyɛ N erɛ la aneɛ ka N e ka O leɛ n soobo, bonso, a Kirista Yeezu eɛɛ la ka N e O soobo.

¹³N poyɛŋ noba, N ba nyɛ ka N eɛɛ la ka o e n meŋɛ bon; kyɛ yeli yeni N naŋ erɛ la: N inni la yɛlɛ naŋ e tɔle gaa kyɛ moɔrɔ gɛrɛ niŋe ka N ta a yɛlɛ naŋ be n niŋeŋ.

¹⁴N erɛ la aneɛ a gɛrɛ niŋe ka N ta a taabo zie a nyɛ a tenvelaa[4] kyɔɔtaare na eŋɛ Naaŋmen naŋ boɔle ma eŋ a Kirista Yeezu eŋɛ.

¹⁵Yɛ vɛŋ ka te banaŋ naŋ pãã baa a ta noba taa teɛroŋ yeni; ka yɛneŋ wa taa teɛroŋ yuo a kyaare ne yelzaa, a yeli ŋa meŋ, Naaŋmen na iri o la wuli yɛ.

¹⁶Yɛ vɛŋ ka te nyɔge bon te naŋ taa kpeɛŋaa.

¹⁷N yɔɔmine ane n yɔɔpuuli, yɛ poɔ a tɔglɔ ma, kyɛ kaara a banaŋ naŋ taa ba nyɔvoɛ a seŋ lɛ yɛ naŋ nyɛ te zie.

¹⁸N da maŋ yeli la ba yɛlɛ ko yɛ, kyɛ pampana N yele la ba yɛlɛ korɔ yɛ a gba ŋmaara nentaŋ; bonso, ba yaga leɛ la a Kirista dagaraa dɔndɔnne a yi lɛ ba naŋ taa ba nyɔvoɛ.

¹⁹A ba baaroo zie e la weɛbo; ba poore e la ba ŋmemɛ, ka ba puubu be ba vi poɔ, ka ba teɛroŋ be teŋɛzu boma eŋɛ.

²⁰Kyɛ tenee e la a tenvelaa biiri, a be la ka te kyɛllɛ a Faara, a Daana Yeezu Kirista ka O yi be leɛ wa.

²¹O na kyilli la a te bambaaloŋ enne ama ka a leɛ waa a O puubu eŋgane ne a kpeɛ̃õ na naŋ e ka boma zaa wa be O puliŋ.