Read Southern Dagaare Fil 4 Bible Online

Fil 4 - Southern Dagaare bible

Fil 4

¹Azuiŋ, n yɔɔmine ane n yɔɔpuuli, n poyɛŋ noba N naŋ nɔŋ, a taa vɔlaa ka N wa nyɛ yɛ, n popeɛloŋ ane n dapaaloŋ noba, yɛ are kpeɛŋaa a Daana eŋɛ a ŋaa poɔ.

²N sɔrɔ la Yuodiya ane Sintɛkye ka ba taa teɛroŋ yeni a Daana eŋɛ.

³Serɛzaa, N sɔrɔ la fo meŋ n tontontɔ naŋ taa yelmeŋɛ, soŋ a pɔgeba bama, bonso, ba da be la n lamboriŋ ka te di dɔgɛɛ a Ŋmen-yelnoore toma poɔ, a laŋ ne Kelɛmɛnte a de ne a n tonton-taaba na zaa yoe ba naŋ sɛge eŋ a nyɔvore gane poɔ.

⁴Yɛ kyellɛ a Daana eŋɛ tegitegilɛ, N laboreŋ yelee la, yɛ kyellɛ.

⁵Yɛ vɛŋ ka neɛzaa baŋ yɛ sumaaroŋ yɛlɛ. A Daana peɛlɛɛ la.

⁶Yɛ ta vɛŋ ka bonzaa yɛlɛ fere yɛ, kyɛ yelzaa poɔ, yɛ maŋ de puoruu, sɔroo ane bareka puoruu a vɛŋ ka Naaŋmen baŋ yɛ yelboɔre zaa.

⁷Lɛ la ka a Naaŋmen maaroŋ naŋ zuo bammo zaa na gu yɛ sukyie ane yɛ teɛrɛ a Kirista Yeezu eŋɛ.

⁸A baaraa zaa, n poyɛŋ noba, bonna zaa naŋ e yelmeŋɛ, bonna zaa naŋ taa yuori, bonna zaa naŋ taa mennoŋ, bonna zaa naŋ pɛgeyi fanana, bonna zaa naŋ waana ne popeɛloŋ, bonna zaa naŋ seŋ ne garebanyɛ teroo, ka bonzaa bebe a veɛlɛ, ka yelzaa wa bebe a seŋ ne puubu, yɛ teɛrɛ a yɛlɛ ama yɛlɛ.

⁹Yɛ naŋ kyɛnɛ erɛ a yɛlɛ na yɛ naŋ da zanne kyɛ de, a woŋ kyɛ nyɛ yi n zie, lɛ ka a maaroŋ Naaŋmen na be yɛ zie.

¹⁰N kyellɛ la yaga zaa a Daana eŋɛ ne pampana yɛ naŋ la leɛ taa n yɛlɛ. Serɛzaa, yɛ taa la n yɛlɛ kyɛ da ba nyɛ vuo a na wuli a.

¹¹A ba e ŋa N yele wullo ka a ferɛ ma la; bonso, N maale la n teɛroŋ ka n nimiri maŋ paale ne bonna zaa N naŋ taa.

¹²N baŋ la lɛ a naŋ maŋ waa ka maa wa taa belaa, kyɛ la baŋ lɛ a naŋ maŋ waa ka maa wa taa bon-yaga. Yelzaa poɔ ane zie zaa, N zanne la a yelsɔglaa ŋa, lɛ N naŋ maŋ di tege ane lɛ N naŋ na maŋ taa kɔŋ. Lɛ neɛ naŋ maŋ taa bon-yaga ane lɛ neɛ naŋ maŋ dire boma naŋ.

¹³N na baŋ e la yelzaa a yi a soba na naŋ korɔ ma faŋ zie.

¹⁴Lɛ na zaa naŋ la, yɛ da wuli la yɛ nimimaaroŋ ko ma ne yɛ naŋ da soŋ ma a n woore poɔ.

¹⁵Yɛnee Filipae deme, yelmeŋɛ zaa, yɛ baŋ ka a Ŋmen-yelnoore piiluu saŋ, N naŋ da yi Masedoniya gɛrɛ, a puoruu laŋne kanzaa da ba ko ma ba bonzaa a kyaare ne teroo ane deebo, ka yɛ yoŋ naane.

¹⁶Bonso, saŋ na N naŋ da be Tɛsalonika teŋɛ poɔ gba, yɛ da tere la sommo gbɛɛ yaga ka ba wa ko ma.

¹⁷A ba e ŋa a kyɔɔtaare la ka N boɔrɔ, kyɛ a tɔnɔ yɛ naŋ na nyɛ a kyɔɔtaare teroo puoriŋ la ka N boɔrɔ.

¹⁸Ba yɔɔ ma la ka a ta ka N taa ka a gaŋ lɛ N naŋ boɔrɔ. N taaɛ la ka a seŋ ma ne a kyɔɔtaare yɛ naŋ da tere ka Epafiroditu wa ko ma. A waa la kyɔɔtaare nyuu naŋ noma kyɛ e bagmaale bon naŋ seŋ ne deebo kyɛ pɛllɛ Naaŋmen poɔ.

¹⁹A n Naaŋmen na ko yɛ la bonzaa yɛ naŋ boɔrɔ yi a O puubu bondaanoŋ naŋ be a Kirista Yeezu eŋɛ.

²⁰Ka a te Saa Naaŋmen nyɛ puubu tegitegilɛ. Ameena.[5]

²¹Yɛ puori a nensonne zaa naŋ be a Kirista Yeezu eŋɛ. A yɔɔmine naŋ be n zie puoro yɛ la.

²²A nensonne zaa puoro yɛ la, a gaŋ a zaa a Naa Siiza yideme puoro yɛlɛ la.

²³Ka a Daana Yeezu Kirista garaaseɛ be yɛ seere poɔ.