Read Southern Dagaare II Tesa 2 Bible Online

II Tesa 2 - Southern Dagaare bible

II Tesa 2

¹Te yɔɔmine ane te yɔɔpuuli, a kyaara ne a te Daana Yeezu Kirista waabo ane te naŋ na te lantaa a O zie yɛlɛ, te sɔrɔ yɛ la,

²ka yɛ ta vɛŋ ka yɛ teɛrɛ gyɛrre bee ka dabeɛ̃ kpɛ yɛ wieouŋ lɛ, ka seeloŋ poɔ la bee ka yelbie la bee ka lɛtɛ la ka yɛ nyɛ ka a wuli seŋ ŋa te zie la ka o yi, a yele ka a Daana bebiri taɛ la baare.

³Yɛ ta vɛŋ ka neɛzaa bɛlle yɛ sori zaa poɔ, bonso, a bebiri na koŋ wa sɛre ka a nɔzagra ba daŋ de weɛ wa, kyɛ ka ba iri a koŋwoŋwuluu soba wuli; ona la ka ba nare biŋ a na sãã.

⁴O maŋ zɔɔrɔ la kyɛ duoro o meŋɛ gaŋ kaŋwaa ŋmen bee bonzaa ba naŋ puoro, ka ka o na zeŋ o dakogi zu a Naaŋmen die poɔ kyɛ boɔlɔ o meŋɛ Naaŋmen.

⁵Yɛ ba leɛ-teɛre ka N da yeli la a yɛlɛ ama ko yɛ N naŋ da naŋ kyɛnɛ be yɛ zie be?

⁶Kyɛ yɛ baŋ la bon naŋ pigre o sori pampana, ka ka ba na iri o wuli ka a o saŋ wa ta.

⁷Bonso, a koŋwoŋwuluu soba yelsɔglaa gba tonɔ la toma, kyɛ a soba na yoŋ naŋ pigi o sori pampana la iri o bare.

⁸A lɛ saŋ la ka ba na e ka a koŋwoŋwuluu soba sãã, ona la ka a Daana Yeezu na de O noɔre saseɛ sãã ne, kyɛ ka a O waabo sãã o bare kpɛlɛŋ kpɛlɛŋ ka o koŋ la bebe.

⁹A koŋwoŋwuluu soba waabo sããɛ la weliweli ne a Setaana naŋ erɛ yɛlɛ ne kpeɛ̃õ, yelwulii, zirŋma nɔmaa toma,

¹⁰ane potuoloŋ bɛllɛ boorɔ zaa a bɛllɛ ne a banaŋ naŋ weɛrɛ, ba naŋ zagre ka ba nɔŋ a yelmeŋɛ a nyɛ faabo zuiŋ.

¹¹A ŋaa zuiŋ la ka Naaŋmen vɛŋ ka nimisɔɔ kpoŋ kpɛ ba, ka ba sage de zirii yɛlɛ,

¹²ka ka banaŋ zaa naŋ ba sage de a yelmeŋɛ kyɛ ka ba poore pɛllɛ ne faaloŋ na nyɛ weɛbo.

¹³Te yɔɔmine ane te yɔɔpuuli, a Daana poyɛŋ noba, a ferɛɛ la ka te puoro Naaŋmen bareka yɛ zuiŋ, bonso, Naaŋmen kaa-iri yɛ la ka yɛ waa a wɔŋ dɛndɛŋ naŋ na tu a Vooroŋ Soŋ pɛgeyiibu ane yɛ naŋ sage de a yelmeŋɛ zuiŋ a nyɛ faabo.

¹⁴A yeli ŋa zuiŋ la ka Naaŋmen tu a yelnoore te naŋ moɔlɔ zie a boɔle yɛ ka ka yɛ na toɔ̃ nyɛ a te Daana Yeezu Kirista puubu.

¹⁵A lɛ zuiŋ n yɔɔmine ane n yɔɔpuuli, yɛ pãã are kpeɛŋaa kyɛ tuuro a yɛlɛ na te naŋ da wuli yɛ, ka noɔre yelbie la bee ka lɛtɛre la.

¹⁶Pampana, ka a te Daana Yeezu Kirista meŋɛ ane a te Saa Naaŋmen, a Onaŋ naŋ nɔŋ te a tu garaaseɛ zie a ko te mooreteroo naŋ ba taa baaroo ane teɛretɔroo[1] meŋɛ,

¹⁷kyɛ maa yɛ sukyie a ko ba faŋ tonsonne ane yelbie zaa eŋɛ.