Read Southern Dagaare 1 Tim 1 Bible Online

1 Tim 1 - Southern Dagaare bible

1 Tim 1

¹Maa Pɔɔl, a Naaŋmen te Faara naŋ e ka N waa a Kirista Yeezu apostolii ane a Kirista Yeezu naŋ e a te teɛretɔroo,[1]

²la sɛgrɛ korɔ Timoti naŋ e n bi-meŋɛ a yeldeebo poɔ: Ka garaaseɛ, nembaalonzoe ane maaroŋ naŋ yi a Saa Naaŋmen zie ane a Kirista Yeezu, a te Daana, be fo zie.

³N kpaana fo la aŋa lɛ N naŋ da yeli a saŋ N naŋ da gɛrɛ Masedoniya paaloŋ, ka fo be a Efesu teŋɛ poɔ ka lɛ vɛŋ ka fo kanne a noba mine, ka ba ta wullo wuluu zaa naŋ e o toɔraa,

⁴a ta de ba teɛroŋ zaa eŋ sensellɛ ane a sããkommine dɔge-tu-taa yoe naŋ ba taa baaroo, a ba taa tɛgɛ kyɛ waana ne nɔkpeɛne a gaŋ a Naaŋmen wuluu naŋ be yeldeebo poɔ.

⁵Kyɛ a wuluu ŋa yelnyɔgraa la nɔmmo naŋ yire sukyirpelaa, teɛroŋ soŋ ane yeldeebo naŋ waa meŋɛ zie.

⁶A noba mine bare la a yɛlɛ ama kyɛ leɛ yele yelfoglo,

⁷a boɔrɔ ka ba e a Naaŋmen bege wulwulibo kyɛ ba baŋ bon ba naŋ yele tɛgɛ bee a baŋ a bonna eŋɛ ba naŋ yele a yɛlɛ ama.

⁸Pampana, te baŋ ka a bege soma la ka neɛŋ wa tuuro o lɛ a naŋ seŋ ne.

⁹A ŋaa tɛgɛ la ka a bege ba bebe ko a nemmenne kyɛ o bebe la ko a koŋwoŋwuluu deme ane noba naŋ ba sagra noɔre, a bebe ko a faaloŋ deme ane a yelbe-erebɛ, a bebe ko a banaŋ naŋ ba e nemmenne ane a nendɛgɛ, a bebe ko banaŋ naŋ maŋ ko ba saa bee ba ma, a bebe ko a neŋkooreba,

¹⁰a bebe ko a banaŋ naŋ tonɔ peɛ̃mo toma, dɔbɔ naŋ maŋ gana ne ba dɔɔ taaba, a bebe ko noba naŋ koɔrɔ gbaŋgbaare, a bebe ko a zirŋmaareba, a bebe ko a banaŋ naŋ maŋ pɔ kyɛ ŋmaara zirii ane yelzaa naŋ ba tu a kannoo naŋ tori,

¹¹a seŋ a yelnoore naŋ veɛlɛ ka a puubu Naaŋmen da de ko ma.

¹²N puoro la a Kirista Yeezu a te Daana bareka yaga zaa, Ona la da ko ma faŋ, bonso, O da nyɛ ma la ka N taa dɛloo ka O da kaa-iri ma ka N tonɔ O toma,

¹³aneazaa ka N daŋ e la neɛ naŋ maŋ toorɔ Naaŋmen zoma, a da dɔgrɔ noba kyɛ da waa zɔɔboɔrɔ. Kyɛ N da nyɛ la nembaalonzoe, bonso, N da erɛ la a lɛ babammo poɔ, N naŋ da ba taa yeldeebo zuiŋ.

¹⁴Kyɛ a te Daana garaaseɛ da paale ma la ne yeldeebo ane nɔmmo naŋ be a Kirista Yeezu eŋɛ.

¹⁵A yeluu ŋa sereŋ taa la dɛloo a seŋ ne deebo, ka a Kirista Yeezu da wa la a teŋɛzu ka O faa yelbe-erebɛ; kyɛ maa la e yelbieri gaŋ ba zaa.

¹⁶Kyɛ a yeli ŋa zuiŋ, ba da zo la n nembaaloŋ, ka ka a Yeezu Kirista na toɔ̃ wuli O kannyiri kpoŋ naŋ seŋ lɛ ko maa naŋ e yelbieri gaŋ neɛzaa, a e ka N waa yelmannaa ko a banaŋ naŋ na wa sage de O yɛlɛ a nyɛ nyɔvore naŋ ba taa baaraa.

¹⁷Ka a yuomo zaa Naa, a Naaŋmen yeni yoŋ naŋ koŋ baŋ kpi, ka neɛ kontoɔ̃ nyɛ O ne nimiri, nyɛ emmo ane puubu tegitegilɛ. Ameena.[2]

¹⁸N bie Timoti, N korɔ fo la a wuluu ama a seŋ a Ŋmen-yelmanna yelyelii ba naŋ da yeli kyaare ne fo, ka fõõ wa tuuro a, fo na zɔɔ la zɔɔre naŋ soma,

¹⁹a taa yeldeebo ane teɛroŋ soŋ. A noba mine naŋ da zagre a teɛroŋ soŋ ŋa bare zuiŋ, a ba yeldeebo da lee la.

²⁰Hammeneyon ane Alɛzanda da poɔ la a noba ŋa poɔ. N de ba la eŋ Setaana nuuriŋ ka ba na zanne yɛŋ a ta daŋ la to Naaŋmen zone.