Read Southern Dagaare 1 Tim 4 Bible Online

1 Tim 4 - Southern Dagaare bible

1 Tim 4

¹Pampana, a Vooroŋ Soŋ yeli la weliweli ka a bebi-baare saŋ, a noba mine na zagre la a yeldeebo bare kyɛ leɛ sagra a sebɛlbɛllɛ ane sefaare wuluu,

²a yi a zirŋmaareba gagarre yɛlɛ zuiŋ. A zirŋmaareba bama teɛrɛ kpaŋɛɛ la aŋa ba naŋ de kur-toloŋ nyege ne.

³A noba bama yeli ka kultaa e la kyiiruŋ kyɛ tere noɔre ka ba ta dire bondirii mine Naaŋmen naŋ iri ka a da seŋ ka a banaŋ naŋ sage de a Naaŋmen yɛlɛ kyɛ baŋ a yelmeŋɛ na dire kyɛ puoro O bareka.

⁴Bonso, bonzaa Naaŋmen naŋ iri e la soŋ, ka a ba seŋ ka ba zagre kanzaa, ka ba naŋ wa puori bareka kyɛ dire.

⁵Bonso, a Naaŋmen yelbiri ane puoruu maŋ maale a la ka a soma.

⁶Ka fooŋ wa wuli a yɔɔmine ane a yɔɔpuuli a yɛlɛ ama, fo na waa la a Kirista Yeezu tontombi-meŋɛ ba naŋ guoli ne a yeldeebo yelbie ka fo tuuro a wulsoŋ.

⁷Ta taa yelzaa ne kɔkɔre yɛlɛ sensellɛ ane kyiire naŋ ba taa tɛgɛ. Moɔ nimiri ka fo be a Naaŋmennoŋ poɔ,

⁸aneazaa ka tɔnɔ belaa be la yelzaa neɛ naŋ maŋ e a dɔ̃ɔ̃ o kɔbɔ, kyɛ Naaŋmennoŋ taa la tɔnɔ yelzaa poɔ, a terɛ nyɔvore pampana ane a nendaare kaŋ nyɔvore naŋ na wa.

⁹A yeluu ŋa e la yelmeŋɛ kyɛ taa dɛloo a seŋ ne deebo.

¹⁰Bonso, a wa tɔ ŋaa, te kyeenɛ la wale a wono tuo, te naŋ de te teɛretɔroo[7] eŋ a Naaŋmen-vore eŋɛ zuiŋ. Ona la a noba zaa Faara, a gaŋ a zaa, a banaŋ naŋ sage de O yɛlɛ.

¹¹A yɛlɛ ama la ka a seŋ ka fo kpaala kyɛ wullo.

¹²Ta vɛŋ ka neɛzaa taa kaabanyɛ ne fo naŋ waa baapaalaa zuiŋ, kyɛ waa neɛ a yelderebɛ naŋ na tɔglɔ, fo yɛlɛ yeluu poɔ, fo eroŋ poɔ, fo nɔmmo poɔ, fo yeldeebo ane fo sonnoŋ poɔ.

¹³Moɔ nimiri kanna a gansoŋ korɔ noba, a yele yɛlɛ teɛrɛ ba, kyɛ kanna ba te ta saŋ na N naŋ na wa.

¹⁴Ta wa bara a Naaŋmen kyɔɔtaa na fo naŋ da nyɛ yi a Ŋmen-yelmanna yelyelii zie ane a puoruu laŋne nembɛrɛ naŋ da de ba nuuri pare fo zu kyɛ puori ko fo.

¹⁵De a yɛlɛ ama tonɔ ne, a kpimare a ne fo poɔ zaa ka a noba zaa na nyɛ lɛ fo naŋ baara a fo Kiristaaloŋ poɔ.

¹⁶Kaara fo meŋɛ ane a fo kannoo zu velaa; naŋ kyɛnɛ erɛ a yɛlɛ ama, bonso, ka fõõ wa erɛ a ŋaa, fo na faa la fo meŋɛ ane a banaŋ naŋ kyɛllɛ wono a fo yɛlɛ.