Read Southern Dagaare 2 Tim 1 Bible Online

2 Tim 1 - Southern Dagaare bible

2 Tim 1

¹Maa Pɔɔl, a naŋ e a Naaŋmen poboɔbo ka N waa a Kirista Yeezu apostolii, a noɔre O naŋ eŋ ka O na tere la nyɔvore naŋ be a Kirista Yeezu eŋɛ zuiŋ,

²la sɛgrɛ korɔ Timoti naŋ e n poyɛŋ bie: Ka a Naaŋmen Saa ane a te Daana Kirista Yeezu garaaseɛ, nembaalonzoe ane maaroŋ be fo zie.

³N puoro la Naaŋmen bareka yaga zaa (Ona la ka N puoro ne teɛroŋ soŋ aŋa n sããkommine naŋ da e lɛ) ka maa wa leɛ-teɛre fo yɛlɛ tegitegilɛ a n puoruu poɔ ŋmenaa ane tensogɔ.

⁴Ka maa wa leɛ-teɛre a fo nentaŋ ŋmaabo yɛlɛ, N maŋ taa la vɔlaa ka N nyɛ fo ka n poɔ paale ne popeɛloŋ.

⁵N leɛ-teɛre la a fo yeldeebo naŋ e meŋɛ yɛlɛ. A yeldeebo ŋa la ka fo makoma Lowesi ane fo ma Yunisi da daŋ taa, kyɛ pampana ŋa, N baŋ la velaa ka fo meŋ taa o la.

⁶A ŋaa zuiŋ, N leɛ-teɛrɛ fo la ka fo leɛ seŋ a Naaŋmen kyɔɔtaa naŋ be fo zie a yi a n nuuri N naŋ da de dɔgle fo zu kyɛ puori ko fo;

⁷bonso, dabeɛ̃ vooroŋ naane ka Naaŋmen da ko te, kyɛ O da ko te la kpeɛ̃õ ane nɔmmo ane meŋɛ bantaabo vooroŋ.

⁸A lɛ zuiŋ, ta wa zoro vi ka fo di danseɛ kyaare ne a te Daana bee maa naŋ waa a O nempɔgraa kyɛ dɛle a Naaŋmen kpeɛ̃õ a laŋ ne ma wono tuo a Ŋmen-yelnoore zuiŋ.

⁹Ona la da faa te kyɛ boɔle te ne boɔlaa naŋ e soŋ, a ba e a te toma zuiŋ kyɛ O meŋɛ poboɔbo ane O garaaseɛ zuiŋ la. O da ko te la a garaaseɛ ŋa a Kirista Yeezu eŋɛ kyɛ ka a tendaa wa bebe.

¹⁰Kyɛ pampana ŋa, ba iri o la wuli te a yi a te Faara Kirista Yeezu waabo eŋɛ. Ona la da iri kũũ bare kyɛ e ka nyɔvore naŋ koŋ baŋ la kpi tu a Ŋmen-yelnoore zie sãã veɛloŋ poɔ.

¹¹A Ŋmen-yelnoore ŋa zuiŋ la ka ba da kaa-iri ma ka N waa yelmoɔlɔ ane apostolii ane wulwullo,

¹²kyɛ a ŋaa zuiŋ la ka N wono a tuo ŋa N naŋ wono. Kyɛ vi ba kpeɛrɛ ma, bonso, N baŋ la neɛ na N naŋ dɛle. N sereŋ baŋɛɛ la ka O na toɔ̃ gu la bonna N naŋ de ko O te ta a bebiri na daare.

¹³Nyɔge kyɛ tuuro a kannoo naŋ waa meŋɛ fo naŋ da woŋ yi n zie ne yeldeebo ane nɔmmo naŋ be a Kirista Yeezu poɔ.

¹⁴Gu a bonsoŋ na ba naŋ da de ko fo taa ne a Vooroŋ Soŋ sommo naŋ be te poɔ.

¹⁵Fo baŋɛɛ la ka a banaŋ zaa naŋ be a Ezeya poɔ leɛ la puori kyɛ bare ma. Figyilose ane Hɛmogene meŋ poɔ la ba poɔ.

¹⁶Ka a Daana zo Onesiforuse yideme nembaaloŋ, bonso, gbɛɛ yaga ka o da e ka n eŋɛ maa kyɛ ba zoro a n banzɔlɔ vi.

¹⁷O naŋ da wa ta a Urom teŋɛ, o da eŋ la faŋ a bɔ wa nyɛ ma.

¹⁸Ka a Daana e ka o nyɛ nembaalonzoe yi a Daana Naaŋmen zie a bebiri na daare! Fo baŋ la velaa a toma na zaa o naŋ da toŋ a Efesu teŋɛ poɔ.