Read Southern Dagaare 2 Tim 4 Bible Online

2 Tim 4 - Southern Dagaare bible

2 Tim 4

¹A Naaŋmen ane a Kirista Yeezu naŋ na di a voba ane a kuuni sɛrɛɛ niŋesogɔ la ka N sɔrɔ fo yããyãã ka a Kirista leɛ waabo ane a O naaloŋ zuiŋ,

²moɔlɔ a Naaŋmen yelbiri; ka a naŋ waa wola zaa, kpimare moɔlɔ; a erɛ ka ba sagra derɛ, a kpaana ba kyɛ yele yɛlɛ teɛrɛ ba ne kannyiri kpoŋ a fo wuluu poɔ.

³Bonso, a saŋ waana la ka noba koŋ la derɛ wulsonne. Kyɛ ba naŋ taa tobo naŋ noma yɛlɛ wommu eŋɛ, ba na bɔ la wulwulibo ko bamenne ka ba yele yɛlɛ ba naŋ boɔrɔ ka ba woŋ,

⁴kyɛ furi ba tobo a yelmeŋɛ kyɛlloo eŋɛ a bɔre tu sensellɛ puori.

⁵Kyɛ fõõ eŋ, taa meŋɛ sigruu tegitegilɛ, a dire kannyiri, a tonɔ a Naaŋmen yelbiri ŋmɛyaara toma, a tonɔ a fo toma ka a baare velaa.

⁶Maa eŋ, ba de ma la maale ne bagre baare aŋa ba naŋ bare koɔ̃, ka a saŋ ta ka N yi a teŋɛzu.

⁷N zɔɔ la zɔɔre naŋ soma, N zo la a zoobu baare, N taa la a yeldeebo velaa.

⁸A yi ŋaa gɛrɛ, ba nare la a mennoŋ nazupili biŋ kyɛllɛ ne ma, ona la ka a Daana, a sɛredi-meŋɛ na ko ma a bebiri na daare. Maa yoŋ naane ka O na ko, kyɛ O na ko la a banaŋ zaa naŋ kyɛllɛ a O leɛ waabo.

⁹E aneɛ wa n zie wieouŋ,

¹⁰bonso, Dɛmase naŋ nɔŋ a teŋɛ ŋa zu yɛlɛ bare ma la kyɛ gaa Tɛsalonika teŋɛ; Kirisɛnse meŋ gaa la Galesiya, ka Tiitu gaa Dalemaseya.

¹¹Luka yoŋ la be n zie. Taa Marko waana ne, bonso, o taa la sommo a n toma poɔ.

¹²N toŋ la Takyiku ka o gaa Efesu teŋɛ.

¹³Ka fooŋ wa waana, taa a kpar-kpoŋ na N naŋ da inni bare Kapuse yiri a Turose teŋɛ poɔ waana ne ma. De a gama na naŋ taa sɛgre meŋ, a gaŋ a zaa a doŋgama na naŋ ba taa sɛgre waana ne.

¹⁴A kurkuro na ba naŋ boɔlɔ Alɛzanda e ma la yelfaare yaga; a Daana na yɔɔ la a o yelfaare sane.

¹⁵A seŋ ka fo meŋ gu fo meŋɛ velaa ne o, bonso, o da zɔɔ ne la a Naaŋmen yelbiri te naŋ moɔlɔ kpeɛŋaa zaa.

¹⁶A dɛndɛŋ saŋ N naŋ da yele yɛlɛ ka n faa n meŋɛ, neɛzaa da ba tu n puori kyɛ ba zaa da zo kyɛ bare ma la. N sɔrɔ la ka Naaŋmen ta de a yeli ŋa dɔgle ba zu!

¹⁷Kyɛ a Daana da are ko ma la, a ko ma faŋ ka ka O na tu n zie moɔle a Ŋmen-yelnoore zaa pabo, ka a Nemboore-yobo[1] zaa woŋ a. Lɛnso ka ba da faa ma yi a gbeŋni noɔreŋ.

¹⁸A Daana na faa ma la yi yelfaa zaa poɔ, a faa ma a O tenvelaa[2] naaloŋ zuiŋ. Ona la so a puubu tegitegilɛ. Ameena.[3]

¹⁹Puori Piriska ane Akiila ane Onesiforuse yideme.

²⁰Erasetu eŋ be la Korinti teŋɛ poɔ; Turofimu beɛrɛ la ka N bare o Miletu teŋɛ poɔ.

²¹E aneɛ kyɛ wa n zie sɛre kyɛ ka a sakyɔre saŋ ta. Yubuluse ane Puden ane Liinuse ane Kelɔdiya ane a yɔɔmine ane a yɔɔpuuli zaa puoro fo la.

²²Ka a Daana be fo seɛ poɔ. Ka O garaaseɛ meŋ be yɛ zaa zie.