Read Southern Dagaare TIT 2 Bible Online

TIT 2 - Southern Dagaare bible

TIT 2

¹Kyɛ fõõ eŋ, wullo wuluu naŋ tori ne a wul-meŋɛ.

²Yeli ko a dɔɔnyaŋne ka ba nyɔgrɔ bamenne, a taa nimizeɛ, a erɛ yɛlɛ ne yɛŋ, a taa yeldeebo naŋ e meŋɛ, a taa nɔmmo kyɛ e noba naŋ taa kannyiri.

³A lɛ ne o zu, yeli ko a pɔgenyaŋne ka ba e ka ba gyogo taa emmo, a ta e noba naŋ na saana ba taaba yoe bee a e dããnyu gbaŋgbaare; kyɛ a seŋ ka ba wullo yelsonne,

⁴ka lɛ vɛŋ ka ba toɔ̃ yele yɛlɛ teɛrɛ a pɔgsarre ka ba nɔŋ ba serebɛ ane ba bibiiri.

⁵Ba baŋ bamenne taabo, a ta waa pɔgeba naŋ sãã, kyɛ e noba naŋ kaara ba yie zu velaa, a taa nimimaaroŋ, kyɛ sigre bamenne korɔ ba serebɛ, ka lɛ vɛŋ ka a Naaŋmen yelbiri ta wa taa yofaa.

⁶A lɛ ne o zu, sɔre a bipɔlɔ ka ba baŋ bamenne taabo.

⁷Kyɛ fooŋ, wuli yelzaa poɔ ka fo waa la neɛ naŋ seŋ ne ka ba tɔglɔ fo tonsonne. Kyɛ a fo kannoo poɔ, wullo yelmennoŋ, a taa nimizeɛ,

⁸ka a fo yelyelii waa soŋ ka neɛzaa ta nyɛ fo yelfaa zaa yeli; a lɛ la ka banaŋ naŋ zɔɔrɔ ne te na di vi, ba naŋ koŋ nyɛ yelfaa zaa a na yeli kyaare ne te zuiŋ.

⁹Yeli ko gbaŋgbaare ka ba sigre bamenne korɔ a noba naŋ so ba kyɛ erɛ ka ba poore pɛllɛ ne ba yelzaa poɔ, kyɛ a ba seŋ ka ba yele yɛlɛ legre a ba nembɛrɛ nɔɛ,

¹⁰a ta zuuro, kyɛ ba e noba a ba nembɛrɛ naŋ na baŋ dɛle, ka ka yɛlɛ zaa poɔ ka ba e noba naŋ na vɛŋ ka Naaŋmen a te Faara wuluu taa kyɛl-wommu.

¹¹Bonso, a Naaŋmen garaaseɛ sããɛ la a wa ko nensaalba zaa faabo,

¹²a wullo te ka te bare yelfaare ane vɔlfaare, kyɛ vɛŋ ka a te nyɔvoɛ te naŋ taa a zenɛ bebiri wuli ka te baŋ la temenne taabo, a e noba naŋ tori kyɛ taa Naaŋmennoŋ,

¹³kyɛ ka te naŋ kyɛllɛ a maaloo bebiri te naŋ taa teɛretɔroo[3] kyaare ne ane a te Naaŋmen kpoŋ ane a te Faara Yeezu Kirista puubu naŋ na wa sãã.

¹⁴Ona la da de O meŋɛ tere ka O faa te yi yelbebe zaa poɔ kyɛ peere te ka te yi fanana a waa O meŋɛ noba naŋ kyerɛ ne tonsonne tommo.

¹⁵Yele a yɛlɛ ama; yele yɛlɛ teɛrɛ kyɛ kpaana noba ne kpeɛ̃õ. Ta wa vɛŋ ka neɛzaa erɛ fo kaabanyɛ yɛlɛ.