Read Southern Dagaare TIT 3 Bible Online

TIT 3 - Southern Dagaare bible

TIT 3

¹Leɛ-teɛre ba ka ba sigre bamenne korɔ namine ane a teŋɛ nembɛrɛ, a e noba naŋ sagra noɔre, a maŋ nare ka ba toŋ tonsonne zaa,

²kyɛ ta yele yelfaare korɔ neɛzaa, a bare zɔɔre, a taa nimibaaloŋ kyɛ korɔ noba zaa gyeremɛ.

³Bonso, temenne da waa la dambolo saŋ kaŋ naŋ tɔle, a ba sagra nɔɛ, a waa noba naŋ da bɔre, a waa vɔlfa-boorɔ zaa ane a eŋgane yelboɔre gbaŋgbaare, a da waa potuodeme, a erɛ nyuuri kyɛ kyiire taa.

⁴Kyɛ a Naaŋmen te Faara sonnoŋ ane O nimimaaroŋ nɔmmo naŋ da wa sãã,

⁵O da faa te la ka a ba e ka te naŋ da toŋ mennoŋ toma zuiŋ la, kyɛ O nembaalonzoe zuiŋ la ka O tu a koɔ̃ suobu deebo eŋɛ a leɛ dɔge te kyɛ ko te a Vooroŋ Soŋ ka te leɛ e nempaalba.

⁶A Vooroŋ Soŋ ŋa la ka O tu a te Faara Yeezu Kirista zie kyɛ kyiri paale te yaga zaa lɛ,

⁷ka ka tenee wa leɛ nensonne a O garaaseɛ zuiŋ, te pãã na nyɛ la a nyɔvo-babaaraa teɛretɔroo[4] gbandiruŋ.[5]

⁸A yeluu ŋa e la yelmeŋɛ. N boɔrɔ la ka fo maaleŋ yele a yɛlɛ ama, ka a banaŋ naŋ wa sage de a Naaŋmen yɛlɛ e noba naŋ na kpimare tonsonne tommo eŋɛ. A yɛlɛ ama veɛlɛ la kyɛ taa tɔnɔ ko neɛzaa.

⁹Kyɛ bare dambol-nɔkpeɛne ŋmeɛbo, sããkommine dɔge-tu-taa yoe yɛlɛ, wɛltaa ane zɔɔre naŋ kyaare ne a bege, bonso, a ba taa tɛgɛ ane tɔnɔ zaa.

¹⁰Ka neɛŋ wa waana ne wɛltaa ka fo yeli yɛlɛ ko o gbɛre boyi bee bota kyɛ ka o ba leɛ o eebo, ta la taa yelzaa ne o soba.

¹¹Fo baŋ ka a neɛ ŋa tɔsoba teɛroŋ sããɛ la ka o waa yelbe-erɛ, a dire o meŋɛ sɛrɛɛ.

¹²Ka maa wa toŋ Atemase bee Takyiku ka o wa fo zie, e aneɛ wa n zie a Nikopolise teŋɛ poɔ, bonso, N boɔrɔ la ka N be a be ka a ɔɔkpoŋ saŋ te baare.

¹³Mɔ fo moɔbo zaa a e ka Zɛnase a bege baŋna ane Apolose tu a sori, kyɛ ka fo kaa soŋ ka yelzaa ta fãã ba.

¹⁴Vɛŋ ka a noba zanne ka ba kpimare tonsonne tommo, a maŋ toɔ̃ soŋ a banaŋ a naŋ wono ka ka ba ta wa e noba naŋ ba taa tɔnɔ.

¹⁵A banaŋ zaa naŋ be n zie puoro fo la. Puori a banaŋ naŋ nɔŋ te a yeldeebo poɔ. Ka a garaaseɛ be yɛ zaa zie.