Read Southern Dagaare Hib 1 Bible Online

Hib 1 - Southern Dagaare bible

Hib 1

¹A dakoroŋ saŋ, Naaŋmen da tu la O yelmanneba zie kyɛ yeli yɛlɛ gbɛɛ yaga ane sobie tɛɛtɛɛ ko a te sããkommine.

²Kyɛ a bebi-baare ŋa poɔ, O tu la O Bidɔɔ zie a yeli yɛlɛ ko te. Ona la ka O iri ka O e a boma zaa gbandire.[1] O zie meŋ la ka O tu kyɛ iri a boma zaa.

³Ona la a Naaŋmen veɛloŋ naŋ kyuoli sãã ane a Naaŋmen waaloŋ meŋɛ zaa tɔre, kyɛ nyɔge a boma zaa taa ka a are ne a O yelbiri kpeɛ̃õ. O naŋ da wa peere yelbebe zaa bare, O da zeŋ la a Naaloŋ Soba nuduluŋ seŋ a sazu poɔ.

⁴O e la kpoŋ gaŋ malekere, O naŋ da nyɛ yuori naŋ waa kpoŋ gaŋ a malekere yuori zuiŋ.

⁵Ka a Malekere buo soba la ka Naaŋmen daŋ yeli: “Fo waa la N Bidɔɔ; zenɛ la ka N dɔge fo”? Bee a la yeli: “N na waa la o Saa, kyɛ ka o waa N Bidɔɔ”?

⁶Kyɛ laboreŋ, O naŋ da wa taa a bidɔɔ dɛndɛŋ wa ne a teŋɛzu, O yelee la: “Vɛŋ ka a Naaŋmen malekere zaa puori O”

⁷Kyɛ a malekere eŋ ka O da yeli: “O maŋ e la ka O malekere waa saseɛ, kyɛ ka O tontonema waa vũũzelɛ.”

⁸Kyɛ a O Bidɔɔ eŋ zie, O yelee la: “Oo Naaŋmen, a fo naaloŋ kogi na bebe la tegitegilɛ, ka a mennoŋ naaloŋ daŋgbale waa a fo naaloŋ daŋgbale.

⁹Fo nɔŋ la mennoŋ kyɛ kyiiri potuoloŋ. A lɛ zuiŋ, Naaŋmen, a fo Naaŋmen, sɔ fo la ne popeɛloŋ kããsoŋ a gaŋ fo taaba.”

¹⁰Kyɛ, “Daana, a piiluu saŋ, fõõ la iri a teŋɛ, ka a saluoni waa fo nuuri toma.

¹¹A na wɛ la kyɛ ka fo naŋ bebe. A zaa na kore la yi kyeɛ aŋa bonsuuri.

¹²Fo na pilli a la ka a lantaa aŋa kpar-kpoŋ, kyɛ ka ba leɛre a aŋa bonsuuri. Kyɛ a lɛ fo naŋ waa ne o zu la ka fo waa, ka a fo yuomo daŋ koŋ baŋ baare.”

¹³Kyɛ a malekere buo soba la ka O daŋ yeli: “Zeŋ a N nuduluŋ seŋ a te ta saŋ na N naŋ na e ka a fo dɔndɔnne leɛ fo gbɛɛ bimmu zie”?

¹⁴A malekere zaa ba waa seere a Naaŋmen toma poɔ, ka ba toŋ ba ka ba te toŋ ko a banaŋ naŋ na nyɛ faabo be?