Read Southern Dagaare Hib 10 Bible Online

Hib 10 - Southern Dagaare bible

Hib 10

¹A bege naŋ pãã waa a bonsonne naŋ na wa dasuoluŋ, kyɛ ba waa a boma meŋɛ zuiŋ, a bagmaale na ne a zu ba naŋ da maŋ maala yuoni yuoni zaa poɔ da kontoɔ̃ e ka a puoripuoribo banaŋ naŋ wa Naaŋmen zie nyɛ sonnoŋ.

²Ka a naŋ da waa lɛ a puoripuoribo da koŋ bare a bagre maaloo be, ba naŋ wa maale a bagre dayeni yoŋ kyɛ nyɛ sonnoŋ ka ba teɛroŋ poɔ ka ba ba la taa yelbieri zaa?

³Kyɛ a bagmaale ama maaloo poɔ, ba maŋ leɛ-teɛre la ba yelbebe yuoni yuoni zaa.

⁴Bonso, naadɛɛ ane boore zẽẽ koŋ baŋ vɛŋ ka neɛ yelbebe nyɛ sudi.

⁵A lɛ zuiŋ, a Kirista naŋ da wa a teŋɛzu O da yelee la: “Fo ba boɔrɔ bagmaale ane kyɔɔtaare, kyɛ fo nare la eŋɛ ko ma.

⁶Fo poɔ ba pɛle ne maale-kondi bagre[15] ane yelbebe sudi bagre.

⁷Lɛ la ka N pãã yeli, ‘Nyɛ, Naaŋmen, N waɛ la ka N toŋ fo poboɔbo toma’ (a seŋ lɛ ba naŋ sɛge N yɛlɛ a gansoŋ poɔ).”

⁸O naŋ da daŋ yeli, “Fo daŋ ba bɔ bee ka fo poɔ pɛle ne bagmaale ane kyɔɔtaare ane maale-kondi bagre ane yelbebe sudi bagre” (ba da maŋ maale la a bagre a seŋ ba naŋ sɛge a bege gane poɔ lɛ.)

⁹Lɛ la ka o da la yeli, “Nyɛ, N waɛ la ka N toŋ a fo poboɔbo toma.” Naaŋmen iri la a dɛndɛŋ bagre bare ka O toɔ̃ biŋ a ayi soba.

¹⁰A Naaŋmen poboɔbo eŋɛ la ka te nyɛ pɛgeyiibu yi O naŋ de a Yeezu Kirista eŋɛ maale bagre dayeni yoŋ.

¹¹Kyɛ Naaŋmen bagmaale wederɛ zaa maŋ are la bebiri zaa a o toma poɔ, a pullo maala a bagre na ne a zu naŋ koŋ baŋ vɛŋ ka neɛ yelbebe nyɛ sudi.

¹²Kyɛ a Kirista naŋ da wa de O meŋɛ maale bagmaale kpokpo dayeni yoŋ yelbebe sudi zuiŋ, “O da zeŋ la Naaŋmen nuduluŋ seŋ.”

¹³A pãã yi a saŋ na zaa O kyɛllɛ la “a na te ta saŋ na O dɔndɔnne naŋ na leɛ O gbɛɛ dɔgloo zie.”

¹⁴Bonso, bagre dayeni yoŋ la ka O maale ka banaŋ zaa naŋ nyɛ pɛgeyiibu na nyɛ sonnoŋ tegitegilɛ.

¹⁵A Vooroŋ Soŋ meŋ maŋ di la danseɛ ko te, bonso, O naŋ da wa yeli a ŋaa baare:

¹⁶“A nɔ-eŋnaa ŋa la ka N na eŋ ne ba a bebie na puoriŋ, a Daana la yele: N na eŋ la a N yelbie a ba sukyie poore, kyɛ sɛge a eŋ a ba teɛrɛ poɔ.”

¹⁷O da la yelee la: “N daŋ koŋ la leɛ-teɛre a ba yelbebe ane a ba yelfaare.”

¹⁸Benee yelbebe sudi naŋ be, yelbebe sudi bagre maaloo zaa ba la kyebe.

¹⁹Azuiŋ n bamine, te naŋ taa bambaare a na tu a Yeezu zẽẽ zie kpɛ a zisoŋ poɔ,

²⁰a yi a sori naŋ e paalaa kyɛ e vore O naŋ yuo ko te a patiisa poɔ (a tɛgɛ la, a tu a Yeezu zie).

²¹Te naŋ taa Naaŋmen bagmaale wederɛ naŋ waa kpoŋ ka O kaara a Naaŋmen yiri,

²²yɛ e ka te tage ta Naaŋmen zie ne sukyiri menne naŋ paale ne yeldeebo, ka ba pɛge a te sukyie yelbebe bare ka te ta taa saanaa zaa ka a dɔɔnɔ te teɛroŋ kyɛ ka ba pɛge te enne ne koɔ̃ naŋ soma.

²³Yɛ e ka te nyɔge a te yeldeebo teɛretɔroo[16] te naŋ taa kpeɛŋaa, bonso, a soba na naŋ eŋ a noɔre ŋa ko te waa la nemmeŋɛ.

²⁴Yɛ e ka te kaa nyɛ lɛ te naŋ na maŋ e a wullo taa nɔmmo ane tonveɛle.

²⁵Te ta zagra ka te laŋna taa, aŋa ba mine naŋ e milli lɛ, kyɛ te soŋnɔ taa, a maaleŋ gaŋ a zaa, yɛ naŋ nyɛ ka a Daana Waabo Bebiri tara.

²⁶Bonso, ka tenee baŋ ne a kyɛ kpãã toori erɛ yelbebe, te naŋ wa baŋ a yelmeŋɛ puoriŋ, yelbebe sudi bagmaale zaa ba la kyebe.

²⁷Kyɛ sɛrɛɛ naŋ taa dabeɛ̃ ane vũũ naŋ zɛle la na di banaŋ naŋ zɔɔrɔ ne Naaŋmen.

²⁸Neɛ na zaa naŋ wa sãã a Moozul bege ba maŋ ko o la a ba zo o nembaaloŋ, “ka noba bayi bee bata wa di danseɛ.”

²⁹Yɛ teɛre ka wola ka a dɔgroŋ na seŋ ka ba ko a banaŋ naŋ kaabanyɛ a Naaŋmen Bie, a sãã a nɔ-eŋnaa zẽẽ naŋ ko ba pɛgeyiibu kyɛ e ka a garaaseɛ Vooroŋ suuri iri?

³⁰Bonso, te baŋ la a soba na naŋ yeli, “Maa la so sane yaabo, N na yaa la.” Kyɛ laboreŋ yeli, “A Daana na di la a O noba sɛrɛɛ.”

³¹A taa la dabeɛ̃ yaga ka neɛ le a Naaŋmen-vore nuuri poɔ.

³²Kyɛ yɛ leɛ-teɛre a piiluu bebie na poɔ yɛ naŋ da wa nyɛ a yɛlɛ veɛloŋ baare, lɛ yɛ naŋ da di kannyiri a toɔ̃ are dɔgɛɛ yaga poɔ.

³³Saŋ kaŋ poɔ yɛ da maŋ nyɛ la zoma ane dɔgroŋ neŋyaga niŋeŋ, ka saŋ kaŋ meŋ ka yɛ be a banaŋ ba naŋ erɛ a lɛ poɔ.

³⁴Bonso, yɛ da maŋ zo la a banaŋ naŋ be a nempagdie poɔ nembaaloŋ kyɛ sage ne popeɛloŋ a yɛ boma faabo, yɛ naŋ da baŋ ka yɛ taa la bonkaŋ naŋ seɛ kyɛ na bebe tegitegilɛ.

³⁵Azuiŋ, yɛ ta wa bara a bambaare yɛ naŋ taa; o na ko yɛ la san-yɔɔ kpoŋ.

³⁶Bonso, a seŋ ka yɛ taa kannyiri, ka ka yɛnee wa toŋ a Naaŋmen poboɔbo toma, ka yɛ toɔ̃ nyɛ a bon O naŋ da eŋ noɔre ko yɛ.

³⁷Bonso, “belaa lɛ la kyɛre, ka a soba na naŋ waana na wa, a koŋ la kɔɔre;

³⁸kyɛ a N nemmeŋɛ na taa la nyɔvore o yeldeebo zuiŋ. N poɔ ba pɛllɛ ne neɛ naŋ leɛ puori.”

³⁹Kyɛ te ba poɔ a banaŋ naŋ leɛ puori a bɔre poɔ, kyɛ te poɔ la a banaŋ naŋ taa yeldeebo ka a lɛ e ka ba nyɛ faabo poɔ.